الەم ساحناسى قازاق اقىندارىن كۇتىپ جۇر

استانا. KAZINFORM - ديماش ۇلتىمىزدىڭ ماقتانىشى. ديماش ارقىلى الەم قازاقتى تاعى ءبىر قىرىنان جاقىن تاني ءتۇستى. ديماشتى كورىپ قانشالاعان اتا-انادا:‹‹بالامىز ديماش سياقتى بولسا ەدى-اۋ›› دەگەن، قانشاما قىز-جىگىتتەردە›› بىزدە ديماشتاي بولساق، شىركىن ‹‹!دەيتىن ارمان ويانعانىن مەجەلەۋ قيىن ەمەس.

ديماشتاي الەم ساحناسىنىڭ شاڭىن شىعارعان ءانشى بولۋ مىڭنىڭ ەمەس ميلليوننىڭ بىرىنىڭدە ماڭدايىنا بۇيىرا بەرمەيتىن باقىت. ول ۇشىن ەڭ اۋەلى تابيعات سيلاعان تاماشا داۋىس بولۋى كەرەك. ونان سوڭ ىزدەنىسىڭ، ەڭبەگىڭ، مۋزيكالىق ءبىلىمنىڭ بولۋى شارت.

ەڭبەكتەنۋ، ءبىلىم الۋ ءار ادام بالاسىنىڭ قولىنان كەلەتىن شارۋا بولعانىمەن تابيعي دارىعان داۋىس بارلىق ادام قولىنان جاساي سالاتىن ەرەكشەلىك ەمەس. الايدا، تۋما دارىعان ەرەكشەلىك بولماسا دا ءوزىنىڭ ونەرى، ءبىلىمى، كۇش-قايراتى جانە تالانتىمەن الەم ساحناسىنا كوتەرىلگەن قازاقتىڭ ۇل-قىزدارى جوق ەمەس. عىلىم-ءبىلىم، سپورت، كوركومونەر تاعى باسقا سالالاردا حالقارا نازارىنا ىلىنگەن قارا دومالاق ۇلدارىمىز بەن قارا كوز قىزدارىمىزدىڭ سانى كوبەيىپ كەلە جاتقانى كوڭىلىمىزدى توعايتادى.

تۋما دارىنسىز-اق ۇزاق ۋاقىت قۇلشىنىس جاساۋ ارقىلى الەم ساحناسىنا الشاڭداي باسىپ بارىپ، دۇنيە جۇزىلىك شولپانعا اينالىپ، ابرويىمىزدى اسقاقتاتىپ قايتاتىنداي قازاقتىڭ عاجاپ ءبىر ونەرى بار، ول- اقىندار ايتىسى.

اقىندار ايتىسى ادامنىڭ اقىل-وي تالانتىن جەتىلدىرەتىن، شابىت پايدا قىلاتىن عاجاپ تا، عالامات ونەر. ايتىس-ادامزات اقىل-پاراساتىنىڭ تەڭدەسسىز اسىلى. مينود، سەكۋنتتىق ۋاقىت ىشىندە قارسى جاعىن جەڭۋ ۇشىن ءسوز مارجاندارىن ءتىزىپ، توگىلتە جىر قۇراۋ وڭاي قابىلەت ەمەس. قارسىلاسىن بىرجولاتا جەڭۋ ۇشىن قيىننان قيىستىرىپ، جۇمباق ايتاتىن اقىندار بولعان. ال ونىڭ ارىپتەسى سونشاما قىسقا ۋاقىتتا سول جۇمباقتى دۇرىس شەشىپ، جاۋابىن ولەڭمەن جەتكىزگەن. تاعى ءبىر عاجاپتانارلىعى، ايتىس اياقتالعان سوڭ ءوزىنىڭ ايتقانمەن قارسى جۇبىنىڭ قۇراعان سونشاما قالىڭ ولەڭدەرىن ەستە ساقتاپ قالپىن قۇراتپاي جاتقا ايتىپ بەرەتىن اقىندار بولعانىن بىلەمىز. اقىنداردا ارتىق مي بارما دەپ تاڭعالاسىڭ!

ميداعى وسىنداي كەرەمەت جاسامپازدىق قۋات پەن سونشاما عالامات ەسكە ساقتاۋ قابىلەتى ادام اقىل-پاراساتى شىرقاۋ شىڭعا شىققاندا پايدا بولادى. ەرەن تالانت، تەلەگەي شابىت بولماي بۇلايشا ايتىس جاساۋ مۇمكىن ەمەس. ارينە اقىنداردىڭ بارىندە تالانت بار دەپتە ايتا المايمىز، بۇل كوكبورى اقىندارعا عانا دارىعان.

ادامنىڭ اقىل-پاراساتى بەينە كۇن نۇرىنا ۇقسايدى. ادەتتە كۇن نۇرى ءبىر تال اعاش شىرپىسىن جاندىرا الماۋى مۇمكىن، ال كۇن ساۋلەسىن لۋپا نەمەسە دوڭەس لينزا ارقىلى ءبىر نۇكتەگە شوعىرلاندىرساق اعاش شىرپىسن لەزدە وتقا اينالدىرادى. ءتىپتىدە كوپ كۇن نۇرىن شوعىرلاندىرۋ ارقىلى تەمىردىڭ ءوزىن بالقىتۋعا بولادى. جاي ادامداردا اقىل-ويىن شوعىرلاندىرۋ قابلەتى بولمايدى، ال تالانىتتى ادامدار كۇن نۇرىن شوعىرلاندىرعانداي اقىل-پاراساتىن شوعىرلاندىرا الادى.

ايتىس اقىندارىندا مىنە وسىنداي اقىل-پاراساتىن شوعىرلاندىرا الاتىن قابىلەت بار. مۇنداي ەرەكشەلىك بولماسا قاس قاققانداي ۋاقىتتا ولەڭ جاسامپازداۋ، جۇمباق جاساۋ نە جۇمباق شەشۋ، وزىنىڭ جانە قارسىلاسىنىڭ ولەڭىن جاتقا الۋدىڭ مۇمكىندىگى جوق. ەگەر ايتىس اقىندارىندا عالىمداردىڭ ءبىلىمى جانە تاپقىرلىق قۋاتى بار بولسا نەمەسە عالىمداردا ايتىس جاساي الاتىن قابلىەتكە يە بولسا ادامزاتتىڭ جاسامپازدىق ورەسى بۇگىنگىدەن بەس ەسە جوعارى دەڭگەيگە كوتەرىلگەن بولار ەدى.

ايتىس ونەرىن حالقاراعا تانىتۋ ۇلكەن ماقسات. اقىندار ايتىسىن باسقا حالىقتار ەكى ادامنىڭ ولەڭمەن سوز تالاستىرۋى، باسەكەلەسۋى رەتىندە ءتۇسىنۋى مۇمكىن. ايتىسىتىڭ كەرەمەتىن قازاق ءتىلىن تولىق بىلەتىندەر سەزىنە الادى. الايدا، باسقا حالىقتارعا ايتىستىڭ قۇدىرەتىن تانۋ ءۇشىن قازاق ءتىلىن ۇيرەنىڭدەر دەپ تالاپ قويا المايمىز. دەسەدە باسقا ۇلتتىڭ تىلىندە ايتىسۋ ارقىلى دا ايتىستىڭ عالاماتىن تۇسىندىرۋگە بولماس پا؟

بۇل مۇمكىن بە دەرمىز. بالعىنبەك يماشوۆ پەن رينات زايىتوۆتىڭ ورىسشا ايتسىن ەستىدىك. ورىس تىلىندە ايتىسۋعا بولادى ەكەن، اعىلشىن، قىتاي، فرانسۋز، اراپ، جاپون جانە باسقا بارلىق تىلدەردە نەگە ايتىسۋعا بولماسقا. بۇل ۇشىن ەكى ءتۇرلى شارت ازىرلەۋ كەرەك. ءبىرى، قازاق تىلىندە جوعارى دەڭگەيدە، ايتىسا الاتىن بولۋ قاجەت ياعني اقىندىق تالانت قالىپتاستىرۋ. ەكىنشىسى، باسقا ۇلتتاردىڭ ءتىلىن جەتەسىنە جەتكىزە وتىرىپ ۇيرەنۋ، سول تىلدە ولەڭ جازا الاتىن، ولەڭ قۇراي الاتىن ورەگە جەتۋ. بۇل ۇزاق جىلدىق قۇلشىنىس ارقىلى قولعا كەلەتىن ەڭبەك جەمىسى. كۇنى ەرتەڭ سول ورەگە جەتكەن اقىندارىمىزدىڭ ءبىر توبى لوندون، نيۋيورك قالاسىنىڭ تورىندە قوڭىر دومبىراسىن كۇمبىرلەتىپ، اعىلشىن تىلىندە ايتىس جاساپ، سول ەلدەردىڭ جۇرتىن ءدال بىزدەگىدەي قىران كۇلكىگە قارىق قىلىپ، تاڭعالتىپ، تامساندىرىپ ايتىستىڭ قىزىعىنا قارىق قىلىپ جاتاتىن كەزدىڭ دە كۇنى ۇزاقتا بولماسا كەرەك. فرانسۋز ءتىلىن بىلەتىندەرى پاريجدە، قىتاي تىلىنە جەتىلگەندەرى پەكيندە، جاپون تىلىنە جۇيرىكتەرى توكيودا...ءار ەلدىڭ ءتىلىن مەڭگەرگەندەرى سول ەلدەر ساحناسىندا ايتىستىڭ دوداسىندا جۇرسە ايتىس اقىندارىنىڭ بەدەلى ديماش سياقتى حالقارالىق ءان شولپاندارىنان كەم بولماس ەدى. بىرەر مايدان ايتىسى ءۇشىن نەشە ميلليون دوللاردى قالتاعا باسىپ، اياعى جەرگە تيمەي قايتۋى عاجاپ ەمەس. ەسكەرگەن ادامعا بۇدا ءبىر تۇنىپ تۇرعان ۇلكەن بيزنس. سەنىمىمىز بەكەم، قۇلشىنىسىمىز جەتەرلىك بولسا ايتىس اقىندارىمىزعا ۇلى ساحنالاردىڭ الىستىعى جوق.

الەم ساحناسى قازاق اقىندارىن كۇتىپ جۇر.

كۇرەس قۇماروۆ