الەم چەمپيوناتى: قازاقستان ايەلدەر قۇراماسى ءۇشىنشى مارتە جەڭىسكە جەتتى

استانا. KAZINFORM - شايبالى حوككەيدەن قازاقستان قىزدار قۇراماسى ەكىنشى ديۆيزيوننىڭ ا توبىندا ءۇشىنشى جەڭىسىنە قول جەتكىزدى.

اتالعان ويىندار 7-ساۋىردەن باستاپ اندوررا مەملەكەتىندە ءوتىپ جاتىر. جارىستى قازاقستاندىق حوككەيشىلەر ءساتتى وتكىزىپ كەلەدى.

بۇگىنگى ويىندا ولار يسلانديا قۇراماسىمەن كەزدەستى. كەزدەسۋ بارىسىندا جيناقى قيمىلداپ، قارسىلاسىنا كوپ گول سوعۋعا تىرىستى.

ەل قۇراماسىنان ەكاتەرينا كۋتسەنكو نەبارى 1-مينۋتتا ەسەپ اشسا، ودان كەيىن ديلناز ساياحات قىزى 5، مۋنيرا ساياحات قىزى 11-مينۋتتا گول سوقتى.

ال 14-مينۋتتا الەكساندرا شەگاي مەرگەندىك تانىتسا، 19-مينۋتتا كارينا فەلزينك كوزدەگەن نىسانادان ءمۇلت كەتكەن جوق.

بۇدان كەيىن مۋنيرا ساياحات قىزى 23، اناستاسيا ورازبايەۆا 33-مينۋتتا باسىمدىقتى ارتتىرسا، وعان يسلانديالىق حوككەيشىلەر نەبارى ەكى گولمەن جاۋاپ قايىردى.

ەسكە سالساق، بۇدان بۇرىن ەل قۇراماسى مەكسيكانى 4:2، تايۆاندى 3:0 ەسەبىمەن تىزە بۇكتىردى.

ەندى قازاقستاندىق حوككەيشىلەر 11-ساۋىردە بەلگيا قۇراماسىمەن كەزدەسەدى.

قازاقستاندىق حوككەيشىلەر بىلتىر وڭتۇستىك كورەيانىڭ سۋۆون قالاسىندا ءبىرىنشى ديۆيزيوننىڭ ۆ توبىندا سىنعا ءتۇستى.

بارلىق ويىندا جەڭىلىپ، ءبىر ساتىعا تومەن ديۆيزيونعا تومەندەدى.