الەم ەلدەرى شىلىم شەگۋدى شەكتەپ جاتىر

استانا. قازاقپارات - تەمەكىنىڭ قاۋىپسىز ءتۇرى جوق. ونى اراتۇرا تارتۋدىڭ ءوزى ادامزاتتى قۇردىمعا سۇيرەيدى. الدىمەن، اۋىز قۋىسى قابىنادى، ودان ءارى تۇتاس اعزا السىرەيدى. دۇنيەجۇزىلىك دەنساۋلىق ساقتاۋ ۇيىمى كەيىنگى زەرتتەۋىندە وسىنداي توقتامعا كەلگەن.

ولار شىلىمنىڭ اسەرىن انىقتاۋ ءۇشىن 128 ادامعا سىناق جۇرگىزدى. ناتيجەسى - تەمەكى شەگەتىندەردىڭ اۋىز قۋىسىندا Fusobacterium, Campylobacter جانە Tannerella forsythia سياقتى زياندى باكتەريالار ءومىر سۇرەدى. مۇنىڭ سوڭى اۋىز قۋىسى وبىرىن تۋعىزۋى مۇمكىن.

شىلىم شەگەتىندەر اراسىندا ءولىم-ءجىتىم كوپ

شىلىم شەگۋدەن ءولىم- ءجىتىم كورسەتكىشى وڭتۇستىك-شىعىس ازيا مەن شىعىس ەۋروپا ايماعىندا جوعارى. بۇل ەلدەردە جىل سايىن ءار 100 مىڭ ادامعا شاققاندا 150 ءولىم تىركەلەدى. ال جاس مولشەرى بويىنشا الپىستى القىمداعاندار مەن جەتپىستەن اسقاندار شىلىمنىڭ قۇربانى بولادى ەكەن. كەيىنگى زەرتتەۋلەر زياندى ادەتتەن ءولىم قۇشقانداردىڭ جاسارىپ بارا جاتقانىن دالەلدەپ وتىر. ەلۋدى ەڭسەرگەندەر اراسىندا دا تەمەكى تۇتىنىنە تۇنشىعىپ، كوز جۇمعاندار كوبەيگەن. وڭتۇستىك- شىعىس ازيا شىعىس ەۋروپا 50-69 جاستاعىلار 70 جانە ودان جوعارى جاستاعىلار تەمەكى شەگىپ، كوز جۇمادى.

تەمەكى تارتپاساڭ، ءومىرىڭ ۇزارادى

جەتپىس جاسقا دەيىن تەمەكى شەگىپ، ودان ءارى قويىپ كەتكەن ادامنىڭ دا ءومىر جاسى ۇزارادى. ميچيگان ۋنيۆەرسيتەتىنىڭ عالىمدارى وسىلاي دەيدى. ولاردىڭ ايتۋىنشا، بۇل زەرتتەۋ ونداعان جىلدار بويى تەمەكى تارتقان ادامنىڭ اعزاسى قالىپقا كەلمەيدى دەگەن سىڭارجاق پىكىردى تەرىستەيدى. سىناق ناتيجەسىندە تەمەكى شەگۋدى قويعان 75 جاستاعى ادامنىڭ ءومىر ءسۇرۋ ۇزاقتىعى ورتاشا ەسەپپەن 8 ايعا ۇلعايعانىن كورسەتتى. شىلىمنان نەعۇرلىم ەرتە باس تارتقان سايىن سوعۇرلىم، اۋرۋ قاۋپى ازايىپ، ءومىر ءسۇرۋ ۇزاقتىعى ارتا تۇسەدى.

الەم ەلدەرى شىلىم شەگۋدى شەكتەپ جاتىر

الەمدە العاشقىلاردىڭ ءبىرى بولىپ قوعامدىق جانە جۇمىس ورىندارىندا تەمەكى شەگۋگە تىيىم سالعان ەل - يرلانديا. بۇل ەل وسىدان 20 جىل بۇرىن دەنساۋلىق ساقتاۋ سالاسىنا ۇلكەن رەفورما ەنگىزىپ، زاڭدى تۇردە جۇزەگە اسىردى. كەيىنگى زەرتتەۋگە سۇيەنسەك، قازىر يرلانديادا شىلىم شەگۋشىلەر سانى ازايىپ، ۇلت ساۋلىعى ايتارلىقتاي جاقسارا ءتۇستى. جۇرەك- قان تامىرلارى، تىنىس الۋ جولدارى اۋرۋلارىنىڭ كورسەتكىشى تومەندەدى.

ۋرۋگۆاي

اراعا ەكى جىل سالىپ، وڭتۇستىك امەريكاداعى ۋرۋگۆاي شىلىمعا شەكتەۋ قويدى. قۇجات جۇزىندە زاڭداستىردى. سونداي-اق تەمەكى ونىمدەرىن جارنامالاۋعا تىيىم سالدى. قۇقىق بۇزعاندارعا الدىمەن، ەسكەرتۋ جاسالادى. وعان توقتاماسا مەكەمەنى 1 ايعا دەيىن جاۋىپ تاستايدى.

جاڭا زەلانديا

جاڭا زەلانديا دا جاستار مەن جاسوسپىرىمدەرگە تەمەكى ساتۋعا تولىق تىيىم سالماق. جاڭا قۇجات بويىنشا، 15 جاسقا دەيىنگى جەتكىنشەكتەرگە تەمەكى ساتىلمايدى.

يندونەزيا

ال يندونەزيا بيلىگى تاقاۋدا شىلىم ساۋداسىنىڭ ەڭ تومەنگى جاس شەگىن 18-دەن 21 جاسقا كوتەردى. سونداي-اق 2026 -جىلدان باستاپ تەمەكى ونىمدەرىن جارنامالاۋعا تولىق تىيىم سالدى. وسىلايشا ەل ۇكىمەتى بىرتىندەپ تۇرعىندار اراسىندا تەمەكى شەگۋدى تەجەۋگە كۇش سالىپ كەلەدى. جەرگىلىكتى دەنساۋلىق ساقتاۋ مينيسترلىگىنىڭ دەرەگى بويىنشا، ەلدەگى 70 ميلليون شىلىم شەگۋشىنىڭ %7,4 10 مەن 18 جاس ارالىعىنداعى جەتكىنشەكتەر.

ۇلى بريتانيا

ۇلىبريتانيا ۇكىمەتى «شىلىمسىز ۇرپاق» باعدارلاماسى اياسىندا جاستار مەن جاسوسپىرىمدەرگە قاتاڭ شەكتەۋ قويادى. زاڭ 2027 -جىلى كۇشىنە ەنەدى. پرەمەر-مينيستر كيم ستارمەردىڭ ايتۋىنشا، ۇلى بريتانيادا جىل سايىن تەمەكىگە تاۋەلدى 80 مىڭ ادام كوز جۇمادى.

سيتاتا كيم ستارمەر، ۇلى بريتانيا پرەمەر- ءمينيسترى:

بۇل دەنساۋلىق ساقتاۋ سالاسىنا ۇلكەن اۋىرتپالىق تۋعىزىپ وتىر. سول سەبەپتى ءبىز حالىق كوپ جۇرەتىن قوعامدىق جەرلەر، مەيرامحانالار مەن دەمالىس ورىندارىندا، ەمدەۋ جانە ءبىلىم بەرۋ مەكەمەلەرىندە تەمەكى شەگۋگە تىيىم سالۋدى قاراستىرىپ جاتىرمىز.

ءبىراز ەل زياندى ادەتتى تۇبەگەيلى جويۋدى ماقسات ەتسە، كەيبىرى بۇل ماسەلەنى بالاما ونىمدەر قولدانۋ ارقىلى شەشكىسى كەلەدى. ءبىراق بيلىكتىڭ بۇل ارەكەتى قانشالىقتى جۇزەگە اسادى؟ ازىرگە بەلگىسىز. بەلگىلىسى قوعامدا شىلىم شەگۋدى قويىپ كەتىپ جاتقاندار تىم از.

24.kz