الەم جۇلدىزى جانە بەيبىتشىلىك ەلشىسى: فرانتسيالىق جۋرنال ديماش قۇدايبەرگەن تۋرالى ماقالا جاريالادى

استانا. KAZINFORM - فرانسيانىڭ Planète Paix جۋرنالىنىڭ 2024 -جىلدىڭ 23-  قىركۇيەگىندەگى سانىندا قازاقستاندىق ءانشى ديماش قۇدايبەرگەن تۋرالى ماقالا جاريالاندى، دەپ حابارلايدى dimashnews.com.

Planète Paix فرانسياداعى بەيبىتشىلىكپەن بايلانىستى وزەكتى ماسەلەلەرگە ارنالعان اي سايىن شىعاتىن جالعىز جۋرنال.

جۋرنالى شىعارۋ ىسىنە فرانسيادا جانە ودان تىس جەرلەردە تانىمال جۋرناليستەر، قوعامدىق ۇيىمداردىڭ كوشباسشىلارى، جەكەلەگەن شەنەۋنىكتەر، ارتىستەر مەن ساراپشىلار قاتىسادى. بۇل جۋرنالعا بەيبىتشىلىككە ۇمتىلعان بارلىق دەڭگەيدەگى ادامداردىڭ پىكىرى مەن ارەكەتىن كورسەتۋگە مۇمكىندىك بەرەدى.

«ديماش قۇدايبەرگەن: الەم جۇلدىزى جانە بەيبىتشىلىك ەلشىسى» اتتى ماقالادا اۆتور ءانشىنى قازاقستان اتىنان حالىقارالىق دەڭگەيدە ونەر كورسەتەتىن جەتەكشى ارتيست رەتىندە كورسەتەدى. سونداي- اق وندا ديماشتىڭ بالالىق شاعى مەن بۇگىنگى كۇنگە دەيىنگى شىعارماشىلىق جولى تۋرالى باياندالادى.

اۆتور ديماشتىڭ ءوز شىعارمالارىندا بەيبىتشىلىك پەن بىرلىككە شاقىراتىنىن ايتادى، ال ونىڭ «ءبىر اسپاننىڭ تاريحى» اتتى اۆتورلىق تۋىندىسى وسىنىڭ جارقىن كورىنىسى دەۋگە بولادى.

2024 -جىلدىڭ اقپانىندا قازاقستاندىق ءانشى ب ۇ ۇ- نىڭ كوشى- قون بويىنشا حالىقارالىق ۇيىمىنىڭ ەرىكتى وڭىرلىك ەلشىسى قىزمەتىنە تاعايىندالدى.

بۇعان قوسا ديماشتىڭ بەيبىتشىلىك پەن بىرلىك فيلوسوفياسى ول ءوزى «Dears» دەپ اتايتىن ونەرىنە ءتانتى ازاماتتار تاراپىنان قولداۋ تاۋىپ وتىر.

جىل سايىن ءانشىنىڭ ءتۇرلى مەملەكەتتەردەگى فاناتتارى ديماشتىڭ ءىسىن قولداپ، گۋمانيتارلىق جانە ەكولوگيالىق باستامالاردى جۇزەگە اسىرادى.