الەمگە ايگىلى حارلامپيەۆتى جىققان موڭعول بالۋانى

استانا. قازاقپارات - سامبو كۇرەسىن العاش ويلاپ تاۋىپ الەم دارەجەسىندە وركەندەتكەن اتاقتى بالۋان اناتولي اركادەۆيچ حارلامپيەۆ سول كۇرەس ءتۇرىن موڭعوليادا وركەندەتۋ ماقساتىمەن كەلىپتى.

ءسويتىپ ءجۇرىپ كەزدەيسوق كەزىگىپ قالعان موڭعول كۇرەسىنىڭ بالۋانى بۋرا كوتەرىپ «بۋرا» جاميان (1899-1979) دەپ اتالىپ كەتكەن قارماۋدى جىگىتپەن تانىسىپ بالۋان ەكەنىن بىلگەن سوڭ انە-مىنەگە قاراتپاي تۋرا جەكپە جەككە شاقىرادى.

جانىندا جۇرگەن وكىمەت ادامدارى دەرەۋ موڭعول بالۋانىنا: الەمگە ايگىلى بالۋان، ءارى كەڭەس وداعىنىڭ ادامىمەن قارسىلاسپاۋدى ەسكەرتەدى. ءبىراق موڭعولدىڭ اتاقتى بالۋانى:

- مەن ەشقاشان وتىرىك كۇرەسە المايمىن - دەيدى دە شاپپا-شاپ ۇستاسا كەتىپ كوزدى اشىپ جۇمعانشا سونداي ءبىر جىلدامدىقپەن اتاقتى حارلامپيەۆتى جاۋىرىنىمەن شالقاسىنان لاقتىرا سالىپتى.

الەمگە ايگىلى بالۋان ارتىنشا تىلشىلەرگە سۇحبات بەرگەندە:

- مەن الەمنىڭ نە ءبىر بالۋاندارىمەن كۇرەستىم، جەڭىلىپ كورگەم جوق. ال مىنا موڭعول بالۋانىنىڭ ماعان ىستەگەن ءادىسى مەن كوز ىلەسپەگەن جىلدامدىعىنا مەن ءالى تاڭ قالىپ وتىرمىن - دەگەن ەكەن.

ال كەڭەس وداعىنىڭ اسا بەدەلدى ادامىن جىعىپ كەتكەنى ءۇشىن موڭعول بالۋانىنا وكىمەتتەن قاتاڭ ەسكەرتۋ جاسالىپتى.

Фото: Байыт Қабанұлының жеке мұрағатынан

بايىت قابان ۇلىنىڭ facebook پاراقشاسىنان الىندى