الدەكىمدەر بيشىمبايەۆتىڭ ۇكىمىن 100 ميلليون تەڭگەگە جەڭىلدەتپەك بولعان
استانا. قازاقپارات – 24 جىلعا سوتتالعان قۋاندىق بيشىمبايەۆتىڭ ادۆوكاتىنىڭ ءبىرى ەرلان عازىمجانوۆ Tengri TV عا بەرگەن سۇحباتىندا الدەكىمدەر ەكس-ءمينيستردىڭ ۇكىمىن جەڭىلدەتۋگە تىرىسقانىن ايتتى.
ادۆوكات ولار ءوزىن سوت جۇيەسىنىڭ قىزمەتكەرى رەتىندە تانىستىرعانىن ايتادى.
«بەلگىسىز ايەل قۋاندىق بيشىمبايەۆتىڭ اناسىنا حات جازىپ، ءوزىن سوت جۇيەسىنىڭ قانداي دا ءبىر قىزمەتكەرى رەتىندە تانىستىردى. 100 ميلليون تەڭگەگە بيشىمبايەۆتىڭ ۇكىمىن جەڭىلدەتۋگە كومەكتەسەتىنىن ايتتى. ول بيشىمبايەۆتىڭ اناسىن كوندىرۋگە تىرىستى، «جالعىز ۇلىڭىز، نەلىكتەن ونى تاعدىر تالقىسىنا قالدىرىپ جاتىرسىز؟» دەدى. ارينە، ونىڭ اناسى ۇسىنىستان باس تارتتى. كەيىنىرەك ول ايەل بالاسىمەن بىرگە پاتەرگە كەلدى.
بيشىمبايەۆتىڭ اناسى ونى الدىمەن بۇعاتتاپ تاستاعان بولاتىن، سودان كەيىن ول پاتەرگە كەلدى. ونىڭ ۇسىنىسىنان بىرنەشە رەت باس تارتىلسا دا، ول قايتا-قايتا كەلۋىن توقتاتپادى. وسىدان كەيىن ونى قۇقىق قورعاۋ ورگاندارى بايقاپ، تىركەپ الدى. كەيىن ۇستالدى»، - دەدى ول.
ەسكە سالايىق، بۇعان دەيىن عازىمجانوۆ قىزمەتى ءۇشىن بيشىمبايەۆتان قانشا العانىن ايتقان بولاتىن.