الداركوسە المانياعا بارعاندا

  استانا. قازاقپارات - بەرليندە ۇلتتىق فولكلوردىڭ تانىمال وبرازدارى جەرگىلىكتى جۇرتقا كورسەتىلدى.

مادەني ءىس-شارانى گەرمانيا سىرتقى ىستەر مينيسترلىگى مەن قازاقستان، ازەربايجان، يران، قىرعىزستان، پاكىستان، تۇرىكمەنستان، تۇركيا مەن وزبەكستان ەلشىلىكتەرى ۇيىمداستىردى. جيىندا ءار ۇلت ءوز مادەنيەتىندەگى ۇقساس كەيىپكەرلەردى ءتۇرلى قويىلىمدار مەن كورمەلەر ارقىلى كورسەتتى.

اتاپ ايتساق، الداركوسە شىقبەرمەس شىعايبايمەن نەمىسشە سويلەسىپ، ايلاسىن اسىرىپ تۇر. تاپقىر الداردىڭ ءوزى دە، سالعان ءانى دە، نەمىس بالالارىنا تاڭسىق دۇنيە ەكەنى انىق. گەنزەل مەن گرەتەلدى، قىزىل تەلپەك پەن راپۋنتسەلدى جاتتاپ وسكەن بالاقايلار الداركوسەنىڭ ءار امالىنا ەرەكشە نازار اۋداردى. قازاق مادەنيەتىمەن ەندى تانىسىپ جاتقان ەرەسەكتەر دە ءىس- شارانىڭ ماڭىزدىلىعىنا باسا ءمان بەرىپ، ەلىمىزگە ساياحاتتاپ كەلۋگە قىزىعۋشىلىعىنىڭ ارتقانىن ايتتى.

«وسىنداي مادەني ءىس- شارالاردىڭ ءبىز ءۇشىن ماڭىزى زور. ءبىز سەلەندورف اۋدانى بولىپ باس قوسىپ، وزگە مادەنيەتتەردىڭ وزىق تۋىندىلارىنا كۋا بولىپ وتىرمىز. مۇنداي ءىس- شارالار وي بوستاندىعىنا جەتەلەيدى. كۇندەلىكتى كۇيبەڭ تىرشىلىكتەن ءبىر ءسات دەمالىپ، جاڭا يدەيالارعا قول جەتكىزۋگە بولادى. وسى ۋاقىتقا دەيىن قازاقستاندا بولىپ كورمەپ ەدىم، ەندى الداعى ۋاقىتتا ساياحاتتاپ بارسام با دەگەن وي كەلىپ تۇر»، دەيدى شتەگليتس- سەلەندورف اۋدانىنىڭ بۋرگوميسترى مارەن شەللەنبەرگ.

«بۇل جيىننىڭ ۇيىمداستىرىلۋىنا قاتىسۋشى ەلدەر مەن گەرمانيانىڭ سىرتقى ىستەر مينيسترلىگى وكىلدەرى زور ۇلەسىن قوستى. وتە سالماقتى دەڭگەيدە ءوتىپ جاتىر. مەن يسلام مادەنيەتى مەن ورتالىق ازيانى زەرتتەيتىن مامان رەتىندە وسىنداي، بالالار تاربيەسىندە قولدانىلاتىن قوجاناسىر مەن الداركوسە وبرازدارى ەرەكشە قىزىق مىسالدار دەپ باعالار ەدىم. ءبىز ءۇشىن بۇل وبرازداردى گەرمانيا بالالارىنا جاقىن ەتە ءتۇسۋ زور جەتىستىك. سەبەبى ءار وقيعانىڭ وزىندىك تاربيەلىك ءمانى، ايتار اقىلى بار»، دەيدى Cultur Cooperation ۇيىمىنىڭ وكىلى كاتلين گەبەل.

اتالعان جيىن بارىسىندا قويىلىمداردان بولەك كورەرمەنگە نەمىس سۋبتيترىمەن ش. ايمانوۆتىڭ «الداركوسە» فيلمى مەن «الداركوسە» انيماتسيالىق سەريالارىنان ءۇزىندى كورسەتىلدى. ۇلتتىق مۋزىكالىق اسپاپتاردان ءان مەن كۇي توگىلدى. كورشىلەس ەلدەرمەن قاتار قولونەر بۇيىمدارى كورمەسى ۇيىمداستىرىلىپ، قازاقى داستارقان جايىلدى.

سونداي-اق الداركوسەدەن بولەك ورتالىق ازيا مەن جەرورتا تەڭىزى - بالقان ايماعى حالىقتارىنىڭ ەرتەگى كەيىپكەرلەرى دە ساحناعا شىقتى.

مارجان ءابىش

egemen.kz