الداعى كۇندەرى اۋا رايى قانداي بولادى؟

استانا. KAZINFORM - سينوپتيكتەر 25-27-ءساۋىر ارالىعىنا ارنالعان اۋا رايى بولجامىن جاريالادى.

وڭتۇستىك تسيكلون اسەرىنەن 25-27-ءساۋىر ارالىعىندا ەلىمىزدىڭ وڭتۇستىك جارتىسىندا، 25-ساۋىردە ەلىمىزدىڭ سولتۇستىك-باتىسىندا جاڭبىر جاۋادى، سولتۇستىك-باتىستا تۇندە جاڭبىر مەن قار بولجانادى.

رەسپۋبليكانىڭ وڭتۇستىگىندە جانە وڭتۇستىك-شىعىسىندا قاتتى جاڭبىر جاۋىپ، نايزاعاي وينايدى، بۇرشاق جاۋۋى دا مۇمكىن. قالعان اۋماقتا انتيتسيكلون اسەرىنەن جاۋىن-شاشىنسىز اۋا رايى ساقتالادى. رەسپۋبليكا بويىنشا ەكپىندى جەل سوعادى، تۇندە سولتۇستىك جانە شىعىس وبلىستاردا تۇمان تۇسەدى.

«سۋىق اۋا بىرتە-بىرتە ەلىمىزدىڭ وڭتۇستىك وبلىستارىنا اۋىسادى، وندا اۋا تەمپەراتۋراسى تۇندە 0-12 گرادۋسقا دەيىن، كۇندىز 10-20 گرادۋسقا دەيىن تومەندەيدى، سولتۇستىك وبلىستاردا سۋىق ساقتالادى. 25-ساۋىردە مۇندا تۇندە 0-8 گرادۋس ايازعا دەيىن، كۇندىز 5-13 گرادۋسقا دەيىن تومەندەيدى، سودان كەيىن سولتۇستىكتە كۇندىز اۋا تەمپەراتۋراسى بىرتىندەپ جوعارىلايدى»، - دەپ جازىلعان مالىمەتتە.