الداعى كۇندەرى 38 گرادۋسقا دەيىن ىستىق بولادى

استانا. KAZINFORM - قازگيدرومەت 6، 7، 8-مامىرعا ارنالعان اۋا رايى بولجامىن جاريالادى.

الداعى كۇندەرى قازاقستانداعى اۋا رايىنا وڭتۇستىك تسيكلون اسەر ەتەدى. 6-8-مامىر ارالىعىندا ەلىمىزدىڭ باتىسىندا، سولتۇستىك-باتىسىندا جانە سولتۇستىگىندە، ال 8-مامىردان باستاپ ورتالىق، شىعىس جانە وڭتۇستىك وڭىرلەردە جاڭبىر جاۋىپ، نايزاعاي ويناپ، كەي جەرلەردە بۇرشاق تا جاۋادى.

6-7-مامىردا باتىس قازاقستان جانە اتىراۋ وبلىستارىندا، 7-مامىردا ماڭعىستاۋ وبلىسىندا، ال 7-8-مامىردا اقتوبە وبلىسىندا قاتتى جاۋىن-شاشىن جاۋادى. قاراعاندى وبلىسىندا عانا جاۋىن-شاشىن جاۋمايدى.

ەلدىڭ وڭتۇستىك-باتىسىندا، 8-مامىردا وڭتۇستىك-شىعىسىندا قۇمدى داۋىل سوعادى.

6-مامىردا پاۆلودار جانە اباي وبلىستارىندا، 6-7-مامىردا شىعىس قازاقستان وبلىسىندا تۇنگى جانە تاڭعى ۋاقىتتا ۇسىك ءجۇرۋى مۇمكىن.

«كۇندىز اۋا تەمپەراتۋراسى ءارتۇرلى بولادى: باتىستا 23-30 گرادۋستان 21-26 گرادۋسقا دەيىن تومەندەيدى. سولتۇستىك-باتىس، سولتۇستىك جانە شىعىس وڭىرلەردە 20-25 گرادۋستان 24-29 گرادۋسقا دەيىن كوتەرىلەدى. ورتالىقتا 27-35 گرادۋسقا دەيىن جىلىنسا، وڭتۇستىك جانە وڭتۇستىك-شىعىستا 38 گرادۋسقا دەيىن اپتاپ ىستىق بولادى»، - دەپ جازىلعان حابارلامادا.