الداعى جىلى اباي وبلىسىندا وڭىردەگى ەڭ ءىرى ەت وڭدەۋ زاۋىتى ىسكە قوسىلادى

استانا. KAZINFORM - بۇل تۋرالى ق ر اۋىل شارۋاشىلىعى ءمينيسترى ايداربەك ساپاروۆتىڭ اباي وبلىسىنا ساپارى بارىسىندا ءمالىم بولدى.

مينيسترلىكتىڭ باسپا ءسوز قىزمەتىنىڭ حابارلاۋىنشا، ايداربەك ساپاروۆ ساپار بارىسىندا اباي وبلىسىنداعى اگرارلىق جوبالاردىڭ ىسكە اسىرىلۋ بارىسىمەن تانىستى.

مينيستر وندا مال شارۋاشىلىعى مەن اۋىل شارۋاشىلىعى ونىمدەرىن قايتا وڭدەۋ باعىتىنداعى جوبالاردىڭ ورىندالۋ بارىسىمەن، سونداي-اق ەگىن جيناۋ جۇمىستارىنىڭ قارقىنىنا نازار اۋداردى.

«پرەزيدەنتتىڭ تاپسىرماسىنا سايكەس، اگرارلىق سەكتورداعى مەملەكەتتىك ساياساتتىڭ باسىم باعىتى - ءونىمدى تەرەڭ وڭدەۋ مەن ونىڭ قوسىلعان قۇنىن ارتتىرۋعا باعىتتالعان. وسى باعىتتا اباي وبلىسىنىڭ بەلسەندىلىگى جوعارى ەكەنىنە كۋا بولدىق»، - دەدى ايداربەك ساپاروۆ.

مينيستر «ARAI- EAST FOOD» كاسىپورنىنا باردى. بۇل كاسىپورىن «حالال» ستاندارتى بويىنشا شۇجىق جانە ەت دەليكاتەستەرى ونىمدەرىن وندىرۋگە مامانداندىرىلعان.
جىلدىق ءوندىرىس قۋاتى - 1,8 مىڭ توننا دايىن ءونىم، سونداي-اق، 100 دەن استام ءونىم تۇرلەرىن قامتيدى.

ودان كەيىنگى نىسان - «Eurasia Agro Semey» كومپانياسى دا وڭىردەگى ءىرى جوبالاردىڭ ءبىرى - ەت وڭدەۋ زاۋىتىنىڭ قۇرىلىسىن ىسكە اسىرىپ جاتىر. بۇل جوبا بولاشاقتا تولىق وندىرىستىك تسيكلدى قامتيتىن ەت كلاستەرىنىڭ وزەگىنە اينالماق.
جوبانىڭ جالپى ينۆەستيتسيا كولەمى - 7,7 ميلليارد تەڭگە، ونىڭ ىشىندە 4,5 ميلليارد تەڭگە سولتۇستىك قازاقستان وبلىسىنىڭ تابىستى تاجىريبەسىن تاراتۋ اياسىندا بولىنبەك. قۇرىلىس جۇمىستارى بيىل باستالدى، قازىرگى تاڭدا مەتالل كونسترۋكتسيالارىن ورناتۋ جۇمىستارىنىڭ p ى اياقتالىپ، قاجەتتى جابدىقتار مەن ماتەريالداردىڭ جەتكىزۋشىلەرى انىقتالعان.

بولاشاق ەت كومبيناتى تاۋلىگىنە 70 باس ءىرى قارا جانە 700 باس ۇساق مالدى سويۋعا ارنالعان زاماناۋي جەلىلەرمەن جابدىقتالادى. سونىمەن قاتار تاۋلىگىنە 17 توننا ءونىم وندىرەتىن شۇجىق جانە كونسەرۆى سەحتارى جۇمىس ىستەيتىن بولادى. جالپى وندىرىستىك قۋاتى جىلىنا 11,4 مىڭ توننا دايىن ءونىمدى قامتيدى. نىساندى پايدالانۋعا بەرۋ كەلەسى جىلدىڭ تامىز ايىنا جوسپارلانىپ وتىر.

ساپار بارىسىندا مينيستر «پريرەچنوە» اگروفيرماسىنا دا باردى. بۇل شارۋاشىلىق اسىل تۇقىمدى مال جانە وسىمدىك شارۋاشىلىقتارىمەن اينالىسادى. مۇندا 2900 باس ءىرى قارا، 248 باس جىلقى بار، سونداي-اق 1860 گەكتار سۋارمالى جەر پايدالانىلادى.

كاسىپورىن بازاسىندا 14 مىڭ توننا ءونىم ساقتايتىن كوكونىس قويماسى جۇمىس ىستەيدى. 2025- 2026 -جىلدارى ينۆەستيتسيا كولەمى 4 ميلليارد تەڭگە بولاتىن 10 مىڭ باسقا ارنالعان بورداقىلاۋ الاڭىنىڭ قۇرىلىسى جوسپارلانعان.

اگروفيرما اسىل تۇقىمدى مال زاۋىتى جانە 1-3 رەپرودۋكتسيالى كارتوپ تۇقىمىن وندىرەتىن شارۋاشىلىق مارتەبەسىنە يە. 

مۇندا Valley ،Zimmatic جانە Reinke ماركالى 28 سۋارۋ جۇيەسى ورناتىلعان.

كوكونىس القاپتارىن ارالاۋ كەزىندە مينيستر ءوندىرىستىڭ ۇيىمداستىرۋشىلىعى جوعارى ەكەنىن جانە سۋ رەسۋرستارىن ءتيىمدى پايدالانىپ وتىرعانىن اتاپ ءوتتى.

«مەملەكەت باسشىسىنىڭ ايرىقشا نازارىنىڭ، ۇكىمەتتىڭ جۇيەلى قولداۋىنىڭ جانە اۋقىمدى ينۆەستيتسيالاردىڭ ارقاسىندا سوڭعى ەكى جىلدا اگرارلىق سالا شىنايى دامۋ كەزەڭىنە كوتەرىلدى. اۋىل شارۋاشىلىعىندا 35 -جىلدان بەرى ەڭبەك ەتىپ كەلەمىن، مۇنداي كەشەندى قولداۋدى العاش رەت كورىپ وتىرمىن»، - دەدى اگروفيرمانىڭ باس ديرەكتورى مۇحيت تۇمابايەۆ.

جۇزدەسۋ سوڭىندا ايداربەك ساپاروۆ اباي وبلىسىندا جۇزەگە اسىرىلىپ جاتقان جوبالاردىڭ ەلدىڭ اۋىل شارۋاشىلىعىن دامىتۋ ءۇشىن ستراتەگيالىق ماڭىزى بار ەكەنىنە توقتالدى.

«ءوڭىردىڭ مال شارۋاشىلىعى مەن قايتا وڭدەۋ سالاسىنىڭ الەۋەتى زور. بۇل جوبالار - جاي عانا ينۆەستيتسيالار ەمەس، بۇل اۋىلدىڭ دامۋىن، حالىقتىڭ جۇمىسپەن قامتىلۋىن جانە وتاندىق ءونىمنىڭ باسەكەگە قابىلەتتىلىگىن ارتتىرۋعا باعىتتالعان جاڭا يندۋستريالىق بازا. مينيسترلىك الداعى ۋاقىتتا دا فەرمەرلەردى قولداۋدى، بىرلەسكەن ءىس-قيمىلدى جانە زاماناۋي تەحنولوگيالاردى ەنگىزۋدى جالعاستىراتىن بولادى»، - دەدى مينيستر.

وسىعان دەيىن اۋىل شارۋاشىلىعى جەرلەرىنىڭ سيفرلىق كارتاسى ازىرلەنىپ جاتقانى تۋرالى جازدىق.