الداعى 6 جىلدا قازاقستان اۆتوجولدارعا 15 ميلليارد دوللار ينۆەستيتسيا تارتپاقشى - مارات قارابايەۆ

كولىك ءمينيسترى مارات قارابايەۆ «New Silk Way» حالىقارالىق كولىك-لوگيستيكالىق بيزنەس-فورۋمىنىڭ اشىلۋىندا 2030-جىلعا دەيىن سالانى دامىتۋ باعىتىندا ىسكە اساتىن سۇيەكتى جوبالارعا توقتالدى، دەپ حابارلايدى قازاقپارات ءتىلشىسى.

«ترانسكاسپي حالىقارالىق كولىك مارشرۋتىنىڭ وتكىزۋ قابىلەتىن 5 ەسە ارتتىراتىنداي الەۋەت بار ەكەنىن ايرىقشا اتاعىم كەلەدى. بۇل ءدالىز ارقىلى قىتاي حالىق رەسپۋبليكاسىنان ەۋروپاعا دەيىن جۇك 18 كۇن ءجۇرىپ بارادى. بۇل – ق ح ر مەن ەۋروپا اراسىنداعى ەڭ قىسقا جول»، - دەگەن مينيستر وسى جولدىڭ بويىنداعى وزگە ەلدەرمەن بىرلەسە اتقارىپ جاتقان شارۋالارعا توقتالدى.

ايتۋىنشا، اتالمىش دالىزبەن جۇك تاسىمالداۋ قۇنى الداعى 5 جىلدا وزگەرمەيدى.

«ازەربايجان، گرۋزيا، قازاقستان ەلدەرىنىڭ تەمىرجول اكىمشىلىكتەرى بىرلەسكەن كاسىپورىن قۇردى. ول كاسىپورىن وسى مارشرۋتتىڭ ءون بويىندا تاسىمال وپەراتورىنىڭ قىزمەتىن اتقارادى. الداعى بەس جىلعا تاسىمال قۇنىن بەكىتىپ قويدىق. بۇل جۇك تاسىمالداۋشىلاردى قىزىقتىراتىن فاكتور. ياعني، تاسىمال قۇنى 5 جىل بويى وزگەرمەيدى»، - دەيدى مارات قارابايەۆ.

ونىڭ سوزىنشە، قازاقستان قىتاي مەن ەۋروپا اراسىنداعى جۇك اينالىمىنان مەيلىنشە كوبىرەك تابىس كورۋ ءۇشىن اۆتوجول ينفراقۇرىلىمىنا دا ءبىراز ينۆەستيتسيا تارتپاقشى.

«ترانسكاسپي دالىزىنەن بولەك اۋە جولىنداعى بايلانىستاردان ۇلكەن الەۋەت كورىپ وتىرمىز. قازاقستاننىڭ اۋە تاسىمالىن پايدالانۋ كورسەتكىشى 90 پايىزعا ارتتى. بۇل تۇرعىدان العاندا، ءبىزدىڭ مينيسترلىك الدىندا تۇرعان نەگىزگى مىندەتتەردىڭ ءبىرى - ءبىزدىڭ اۋەجايلار بازاسىندا CargoHub تار (حالىقارالىق كولىك-ەكسپەديتورلىق حولدينگ) قۇرۋ.

اۆتوجول سالاسىنا جەكە توقتالعىم كەلەدى. ءبىز الداعى 6 جىلدىڭ ىشىندە جاڭا 5 مىڭ شاقىرىم جول سالىپ، رەكونسترۋكتسيالاعىمىز كەلەدى. ينۆەستيتسيانىڭ جيىنتىق قۋاتى 15 ميلليارد دوللار بولماق. مۇنىڭ ءبارى قازاقستان ق ح ر مەن رەسەي فەدەراتسياسى اراسىنداعى، ق ح ر مەن ەۋروپا اراسىنداعى تولىققاندى ترانزيت حابىنا اينالۋ ءۇشىن جاسالىپ وتىر»، - دەدى مارات قارابايەۆ.