العاشقى الەم كۋبوگىنا قاتىسقان قازاق بوكسشىلارىنىڭ جەڭىسى

استانا. KAZINFORM - قازاقستاننىڭ ۇلتتىق وليمپيادا كوميتەتى قازاق بوكسشىلارى العاش رەت قاتىسقان 1979 -جىلعى الەم كۋبوگىنان فوتو جاريالادى.

وندا سەرىك قوناقبايەۆ، ۆيكتور دەميانەنكو، ۆلاديمير شين (وزبەكستان) جانە كاميل سافين بەينەلەنگەن.

Фото: olympic.kz

ءۇش سپورتشى دا سول جارىستا جەڭىس تۇعىرىنا كوتەرىلدى. ۆيكتور دەميانەنكو 60 كەلىدە، سەرىك قوناقبايەۆ 63,5 كەلىدە التىن مەدال جەڭىپ الدى. پەتروپاۆل وبلىسىنىڭ تۋماسى كاميل سافين (48 كەلى) كۇمىسكە قول جەتكىزدى. بۇل سۋرەتتىڭ تاريحى جايلى Olympic.kz ماتەريالىن وقىرمان نازارىنا ۇسىنامىز.

1979 -جىل بوكس الەمىندەگى ماڭىزدى وقيعالاردىڭ ءبىرى بولدى. ءدال وسى جىلى العاش رەت الەم كۋبوگى ۇيىمداستىرىلدى. تاريحي جارىسقا العاش رەت قاتىسقان سپورتشىلار اراسىندا ك س ر و قۇرامىندا ونەر كورسەتكەن قازاقستاندىق بوكسشىلار دا بار.

وتاندىق بىلعارى قولعاپ شەبەرلەرى ۇلكەن جەتىستىككە جەتىپ، ولاردىڭ ەسىمى ايگىلى Madison Square Garden-دەگى ارنايى تاقتاعا جازىلدى.

العاشىندا تۋرنيرگە الەمنىڭ 30 مەملەكەتىنەن جۇزدەن اسا بوكسشى جينالۋى ءتيىس ەدى. الايدا، كوماندالار تولىق قۇراممەن كەلە الماي، افريكانىڭ ەكىنشى قۇراماسى ا ق ش-قا جەتكەن جوق.

مەدالدار 11 سالماق دارەجەسىندە ويناتىلدى. ال كۋبوك يەلەرى جيعان ۇپاي سانى بويىنشا انىقتالدى. نەگىزگى باسەكە ا ق ش پەن ك س ر و قۇرامالارى اراسىندا بولاتىنى بولجانعان. ايتقانداي-اق، ەكى ەل سپورتشىلارى فينالعا كوبىرەك جولداما الدى.

تۋرنيردە جەتى التىن، ەكى كۇمىس جانە ءبىر قولا مەدال يەلەنگەن امەريكالىقتار كۋبوكتى ءوز ەلىندە قالدىردى (49 ۇپاي).

كەڭەستىك بوكسشىلار ءۇش التىن، بەس كۇمىس جانە ەكى قولامەن (39 ۇپاي) ەكىنشى ورىنعا تۇراقتادى. ءبىر قىزىعى، سول باسەكەگە قاتىسقان ءۇش قازاقستاندىق سپورتشى دا تۇعىر بيىگىنەن كورىندى.

60 كەلى سالماقتاعى فينالدىق باسەكەدە ۆيكتور دەميانەنكو امەريكالىق دەيۆ ارمسترونگقا ايلا قالدىرمادى.

63,5 كەلىدە جۇدىرىقتاسقان سەرىك قوناقبايەۆ اقتىق سىندا لەمۋەەل ستەپلستەن باسىم ءتۇستى.

ال كۇمىس مەدالدى پەتروپاۆل تۇلەگى كاميل سافين (48 كەلى) ەنشىلەدى.

اعا باپكەر الەكسەي كيسەليەۆ الەم كۋبوگى اياقتالعان بويدا سافيننىڭ امەريكالىق ريچي ساندوۆالدى جەڭەتىن مۇمكىندىگى بولعانىن ايتتى.

«جىگىتتەر ەش ساسقان جوق، ءوز مۇمكىندىگىن تولىق كورسەتتى. ەگەر تورەشىلەر قىرىن قاراماعاندا، ناتيجە باسقاشا بولار ەدى. كاميل سافين امەريكالىق بوكسشىمەن جۇدىرىقتاسقاندا جانىپ كەتتى. قارسىلاسىنا جول بەرسە دە، جەڭىسكە جەتەتىن الەۋەتى بار ەدى. ۆيكتور دەميانەنكو جاقسى ونەر كورسەتتى. 60 كەلىدەگى الەم مىقتىلاارىنىڭ ءبىرى ەكەنىن دالەلدەپ، ارمسترونگتى ايقىن باسىمدىقپەن جەڭدى. سەرىك قوناقبيەۆ ءوز كەزدەسۋىن ساۋاتتى ءارى تەحنيكالىق تۇرعىدان ءمىنسىز وتكىزدى. ءسال اسىعىس تانىتقان شىعار، ءبىراق جاقسى جەڭدى»، - دەدى سول كەزدە «سوۆەتسكي سپورت» باسىلىمىنا سۇحبات بەرگەن كيسەليەۆ.

ايتا كەتەيىك، ك س ر و ساپىنداعى ءۇشىنشى التىندى وزبەكستاندا تۋعان ۆلاديمير شين جەڭىپ الدى.

جارىستان سوڭ باس كەيىپكەرلەردىڭ بارلىعى دا وسى ءبىر ەستەلىك سۋرەتكە ءتۇستى. بۇل فوتو كەيىن تاريح قوينۋىنا ەندى.

سۋرەتتە دەميانەنكو، قوناقبايەۆ، شين، سافين جانە دونالد حالل باستاعان حالىقارالىق فەدەراتسيانىڭ فۋنكتسيونەرلەرى بار.

وكىنىشكە قاراي، تاريحي فوتونىڭ اۆتورى بەلگىسىز. سۋرەت ۆيكتور دەميانەنكونىڭ جەكە مۇراعاتىنان الىندى.

سەرىك قوناقبايەۆ پەن ۆيكتور دەميانكەنكونىڭ ەسىمى Madison Square Garden-دەگى ءمارمار تاقتاعا الەم كۋبوگى جەڭىمپازدارىمەن بىرگە ويىلىپ جازىلعان.

ۆيكتور لەونديوۆيچ جەكە ءوزى كورمەگەنىن، الايدا، بۇل اقپاراتتان قۇلاعدار ەكەنىن ايتادى. سونداي- اق، داڭقتى بوكسشى تۋرنير قارساڭىندا نيۋ- يوركتە باسىنان وتكەن وقيعانى باياندادى.

«نيۋ-يوركتەگى قوناقۇيدە ك س ر و قۇراماسى مۇشەلەرى ليفتپەن ءوز بولمەمىزگە كوتەرىلىپ كەلە جاتتىق. كەزەكتى قاباتتاردىڭ بىرىنەن ءبىر توپ امەريكالىق بوكسشىلار كىردى. كەنەت 75 كەلىدە بوكستاساتىن سپورتشى مەنى قالاي ۇرىپ قۇلاتىنىن ىممەن كورسەتىپ، تىستەرىمدى ۇشىرىپ جىبەرەتىنىن دە يشارامەن كورسەتتى. مەن دە كوپ ويلانباي وعان سول سوققىلارىمدى كورسەتىپ، سوڭىندا ونى اياقپەن تەپكىلەپ تاستايتىنىمدى ايتتىم. وسىنى كورگەن قاسىمداعى جىگىتتەر كۇلكىلەرىن تىيا الماي، مەنى ارقامنان قاعا باستادى. ءسويتىپ ولارمەن دە دوستاسىپ كەتتىك»، - دەيدى ايگىلى بوكسشى.

راسىندا، سپورت حرونيكاسى ۇمىتىلماس ەستەلىكتەردەن جانە كۇتپەگەن وقيعالاردان تۇرادى. ال مۇنداعى سيۋجەتتەر فوتو مەن ۆيدەو شەڭبەرىنەن الدەقاشان اسىپ كەتكەن.

اۆتور

جانات قاپالبايەۆا