العاش رەت كوماندالىق ايتىس وتەدى
استانا. قازاقپارات - بيىل ەلىمىزدە تۇڭعىش رەت «AMANAT» پارتياسىنىڭ قولداۋىمەن، ايتىس اقىندارى مەن جىرشى-تەرمەشىلەردىڭ حالىقارالىق وداعى ر ق ب ۇيىمداستىرۋىمەن رەسپۋبليكالىق كوماندالىق ايتىس وتەدى.
وسىعان بايلانىستى «AMANAT» پارتياسى ورتالىق اپپاراتىندا ءماجىلىس دەپۋتاتى امانجول ءالتاي، ايتىسكەر اقىن سەرىكزات دۇيسەنعازى مەن ايتىسكەر اقىن، جىرشى ەركەبۇلان قاينازاردىڭ قاتىسۋىمەن باسپا ءسوز جيىنى ءوتتى.
ءىس-شارا بارىسىندا ءسوز العان امانجول دۇيسەنباي ۇلى بايقاۋدىڭ نەگىزگى شارتتارى تۋرالى باياندادى.
«اتالمىش جوبا 9-ناۋرىز سىر ەلى قىزىلوردا تورىنەن باستاۋ الادى. ءبىر جارىم جىلعا سوزىلاتىن مەگا بايقاۋ 4 كەزەڭنەن تۇرادى. وندا ايتىسكەرلەردەن بولەك، جىرشى-تەرمەشىلەر، ءداستۇرلى انشىلەر مەن كۇيشىلەردەن قۇرالعان كوماندالار باسەكەگە تۇسەدى. ءاربىر ايماقتىڭ مادەني، ونەر بايلانىسىن نىعايتۋ ماقساتىندا وسى ءىس-شارانى قولعا الىپ وتىرمىز.
ونىڭ ۇستىنە بيىل ايتىستىڭ فورماتى جىلداعىدان وزگەشە، جاڭاشا نۇسقادا ۇيىمداستىرىلماق. ياعني ءبىرىنشى كەزەڭىنە ەلىمىزدىڭ بارلىق ايماعىنان 20 كوماندا قاتىسادى. جەڭىسكە جەتكەن 10 كوماندا جوبانىڭ ەكىنشى اينالىمىنا جولداما الادى. بۇل كەزەڭنەن وتكەن 4 كوماندا ءۇشىنشى كەزەڭدە باق سىناسىپ، سوڭىندا ىرىكتەلىپ كەلىپ، 2 كوماندا جۇلدە ءۇشىن تالاسقا تۇسەدى»، - دەدى دەپۋتات.
بۇدان بولەك سپيكەر بايقاۋدىڭ نەگىزگى ەرەكشەلىكتەرى مەن بيىل وتەتىن ءىس-شارالاردى دا ءسوز ەتتى.
كوماندالىق ايتىستىڭ نەگىزگى ەرەكشەلىگى - ايتىستىڭ كونە تۇرلەرىن جاڭعىرتۋ، اسىرەسە سۇرە ايتىس، قايىم ايتىس، ءتۇر ايتىس، قىز بەن جىگىت ايتىسىن دامىتۋ. اقىندار وسى اتالعان باعىت بويىنشا جۇلدەگە تالاسادى.
2024 -جىلى «اقىندار مەن جىرشى تەرمەشىلەر» حالىقارالىق وداعى بىرنەشە جاڭا جوبانى جوسپارلاپ وتىر. ونىڭ ىشىندە ۇرپاق ساباقتاستىعىن نەگىزگە الا وتىرىپ، وقۋشىلاردى، جاستاردى ۇلتتىق ونەرگە تارتۋ ماقساتىندا 3 نەگىزگى دەڭگەيلى جوبانى وتكىزبەكشىمىز. ناقتىراق ايتساق، بۇعان وقۋشىلار ايتىسى «قولا دومبىرا»، جاستار ايتىسى (ستۋدەنتتەر قاتىسادى) اراسىندا «كۇمىس دومبىرا» جانە مايتالماندار اراسىندا وتەتىن «التىن دومبىرا» ايتىسى جاتادى. جانە ەڭ ماڭىزدىسى، بيىل «التىن دومبىرا» بايقاۋىنىڭ ەرەجەسىنە وزگەرتۋلەر ەنگىزىلدى. اتالمىش بايقاۋدىڭ قورىتىندى كەشى ەندى تەك ەلوردامىز استانا قالاسىندا عانا وتەدى. ايتىس ونەرى «Amanat» پارتياسىنىڭ قامقورلىعىندا بولعاندىقتان، بيىل بولاتىن جوبانىڭ بارلىعى پارتيا قولداۋىمەن وتەدى.
سونداي-اق ءبىرىنشى جارتىجىلدىقتا قىرعىز- قازاق اراسىندا ەلارالىق ايتىس ۇيىمداستىرۋ جوسپارلانىپ وتىر. مۇندا دا وبلىسارالىق كوماندالىق ايتىستىڭ فورماتى سەكىلدى قاتىسۋشىلار بىرنەشە ءداستۇرلى ونەردىڭ جانرلارى بويىنشا تارتىسقا تۇسەدى. ونىڭ نەگىزگى ۇيىمداستىرۋشىسى - مادەنيەت جانە اقپارات مينيسترلىگى»، - دەدى ا. ءالتاي.
داريعا قۇرمانالى،
ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ 4-كۋرس ستۋدەنتى
«ايقىن» گازەتى