البانيانىڭ بۇرىنعى پرەزيدەنتى سىبايلاس جەمقورلىققا قاتىسى بار دەگەن كۇدىكپەن قاماۋعا الىندى

استانا. KAZINFORM - البانيانىڭ بۇرىنعى پرەزيدەنتى جانە «بوستاندىق» پارتياسىنىڭ نەگىزىن قالاۋشى يلير مەتا سىبايلاس جەمقورلىققا قارسى ارنايى پروكۋراتۋرانىڭ بۇيرىعىمەن ۇستالدى.

ول اقشا جىلىستاتۋ، سىبايلاس جەمقورلىق پەن كىرىستى جاسىردى دەگەن كۇدىككە ءىلىندى، دەپ جازادى Euronews.

تۇتقىنداۋ كەزىندە يلير مەتا قارسىلىق كورسەتپەك بولعان. قاماۋ فاكتىسىن ونىڭ ادۆوكاتى راستادى.

ول بۇعان دەيىن بايلىعىن جاسىردى جانە اقشا جىلىستاتتى دەگەن كۇدىكپەن تەرگەۋدە بولعان. بۇرىنعى مەملەكەت باسشىسى بارلىق ايىپتى جوققا شىعاردى.

55 جاستاعى يلير مەتا البانيانىڭ سولشىل بوستاندىق پارتياسىنىڭ جەتەكشىسى جانە 2017-2022 -جىلدار ارالىعىندا ەل پرەزيدەنتى بولدى. ول - «كلەپتوكراتيالىق رەجيم ورناتتى» دەپ ايىپتايتىن پرەمەر-مينيستر ەدي رامانىڭ اشىق قارسىلاسى.

البانيانىڭ دەموكراتيالىق پارتياسىنىڭ باسشىسى سالي بەريشا دا وتكەن جىلدىڭ جەلتوقسان ايىنان بەرى سىبايلاس جەمقورلىققا قاتىسى بار دەگەن كۇدىكپەن ءۇيقاماقتا وتىر. وپپوزيتسيا رامانى قارسىلاستارىن ساياسي استارلى قۋدالادى دەپ ايىپتايدى. پرەمەر-مينيستر مۇنى جوققا شىعارادى.

بۇعان دەيىن البانيا استاناسىندا تارتىپسىزدىكتەر مەن قاقتىعىستار بولعان. وپپوزيتسيا پرەمەر- ءمينيستردىڭ وتستاۆكاعا كەتۋىن تالاپ ەتتى.

يتاليا ميگرانتتاردىڭ ءبىرىنشى توبىن البانياداعى باسپانا ورتالىقتارىنا جىبەردى.

اۆتور

ەركەجان سماعۇلوۆا