الاياقتار اكىمدەر مەن ءماسليحات دەپۋتاتتارىنىڭ اتىنان حات جازا باستادى
تۇركىستان. KAZINFORM - الەۋمەتتىك جەلىدە كەنتاۋ قالاسىنىڭ اكىمى مەن ورىنباسارىنىڭ اتىنان جالعان پاراقشالار اشىلدى. وندا الاياقتار ءتۇرلى جازبالار قالدىرىپ جاتىر.
كەنتاۋ قالاسى اكىمدىگىنىڭ حابارلاۋىنشا Facebook ،WhatsApp ،Instagram ،Messenger جانە Telegram پاراقشالارىندا كەنتاۋ قالاسىنىڭ اكىمى جاندوس تاسوۆتىڭ جانە ورىنباسارى عالىمجان تۋلەپوۆتىڭ اتىنان جالعان حابارلامالار جىبەرىلىپ جاتىر. سوندىقتان اكىمنىڭ فوتوسۋرەتى قويىلعان جاسىرىن نومىردەن قوڭىراۋ تۇسسە نەمەسە حابارلاما كەلسە، وعان ءمان بەرمەۋ قاجەت.
«ينتەرنەت الاياقتار جالعان جازبالار جىبەرۋدە. سىزدەردەن جالعان اقپاراتقا سەنىپ، بەيتانىس نومىرگە اقشا اۋدارماۋلارىڭىزدى سۇرايمىز. سونداي-اق كۇماندى سىلتەمەلەرگە وتپەڭىزدەر»، - دەلىنگەن اكىمدىك تاراپىنان تاراتىلعان اقپاراتتا.
ال، قالا اكىمى جاندوس تاسوۆ قازىرگى تاڭدا فەيك پاراقشانى قولدانۋشىنى انىقتاۋ ماقساتىندا قۇزىرلى ورگاندارعا ارىز جازىلعانىن جەتكىزدى.
«زاڭ اياسىندا جاۋاپكەرشىلىككە تارتىلاتىن بولادى. سوندىقتان، فەيك پاراقشادان جازىلعان قانداي دا ءبىر ءوتىنىش نەمەسە تاپسىرماعا، بوپسالاۋعا الدانىپ قالماۋلارىڭىزدى سۇرايمىن»، - دەپ جازدى ول جەلىدەگى رەسمي پاراقشاسىندا.
تۇركىستان قالالىق ءماسليحاتىنىڭ دەپۋتاتى باعداۋلەت تۇرمانوۆتىڭ دا بۇگىن جەلىدە جالعان پاراقشاسى پايدا بولعان. بۇل جايىندا پىكىر بىلدىرگەن دەپۋتات، الاياقتار جەكە فوتوسىن پايدالانىپ جالعان پاراقشا اشقانىن ايتتى. سونداي-اق، كوپشىلىكتى الاياقتاردان ساق بولۋعا شاقىردى.
اۆتور
قايرات زاينيشەۆ