قالا ورتالىعىندا تاقىرىپتىق الاڭدار ۇيىمداستىرىلىپ، قوناقتارعا فەرمەرلىك ونىمدەر، قولونەر بۇيىمدارى، گاسترونوميا، مۋزىكا جانە بۇكىل وتباسىعا ارنالعان ءتۇرلى ويىن-ساۋىق تۇرلەرى ۇسىنىلدى.
فەستيۆالدىڭ باستى ەرەكشەلىكتەرىنىڭ ءبىرى - الما. مەرەكەگە وراي تانىمال سورتتاردان باستاپ سيرەك كەزدەسەتىن جانە ايگىلى الماتىلىق اپورت، جالپى 200 توننادان استام الما جەتكىزىلدى.
16-Alma Qala فەستيۆالى پانفيلوۆ پەن قازىبەك ءبي كوشەلەرىنىڭ قيىلىسىندا ءوتىپ جاتىر. مۇندا الماتى اگلومەراتسياسىنىڭ فەرمەرلىك شارۋاشىلىقتارى ءوز ونىمدەرىن تانىستىرادى. كەلۋشىلەر المانىڭ ءتۇرلى سورتتارىنان ءدام تاتىپ، ساتىپ الا الادى.
فەستيۆال 10 تاقىرىپتىق ايماققا بولىنگەن. ۇلتتىق ايماقتا فولكلورلىق ۇجىمدار، ەتنيكالىق انسامبلدەر مەن كۇي ورىنداۋشىلارى ونەر كورسەتەدى. تەاتر ساحناسىندا الماتى تەاترلارى سپەكتاكلدەر قويىپ، بالالارعا ارنالعان قويىلىمدار مەن ادەبي وقۋلار ۇيىمداستىرىلدى.
كىشكەنتاي قوناقتارعا دا ارنايى الاڭ قاراستىرىلعان. مۇندا انيماتورلار جۇمىس ىستەپ، ءتۇرلى ويىندار مەن شىعارماشىلىق شەبەرلىك ساباقتارى وتەدى.
قولونەرشىلەر ايماعىندا 50 دەن استام ءوندىرۋشى مەن شىعارماشىلىق كاسىپكەر ءوز بۇيىمدارىن ۇسىنىپ جاتىر. كەلۋشىلەر شەبەرلەردىڭ جۇمىستارىن تاماشالاپ قانا قويماي، توقۋ، سۋرەت سالۋ، مۇسىندەۋ، اعاش ويۋ جانە اشەكەي بۇيىمدار جاساۋ بويىنشا وزدەرىن سىناپ كورە الادى.
فەستيۆالدىڭ گاسترونوميالىق بولىگىندە جەرگىلىكتى وندىرۋشىلەردىڭ ونىمدەرى ۇسىنىلعان. سورەلەردە توساپ، دجەم، پاستيلا، كەپتىرىلگەن جەمىستەر، الما چيپستەرى، بال، قۇرت جانە باسقا دا جەرگىلىكتى ونىمدەر بار.
جەكە الاڭ سيفرلىق تەحنولوگيالارعا ارنالعان. مۇندا الماتىنىڭ سيفرلىق مۋزەيى جاسالىپ، تەحنولوگيالاردىڭ دامۋىمەن بىرگە قالانىڭ قالاي وزگەرىپ جاتقانى تۋرالى اقپارات بەرىلەدى.
ۇيىمداستىرۋشىلار ەكولوگيالىق ماسەلەلەرگە دە نازار اۋدارعان. ەكو- ايماقتا كەلۋشىلەرگە قالدىقتاردى سۇرىپتاۋ جانە قايتا وڭدەۋ، سونداي-اق «تازا قازاقستان» باعدارلاماسى اياسىنداعى قالالىق ەكولوگيالىق باستامالار تۋرالى ايتىلادى. جانىندا وننان استام ۇيىم قاتىساتىن ۆولونتەرلەر ستانتسياسى جۇمىس ىستەيدى.
مۋزىكالىق باعدارلاما دا مەرەكەنىڭ ماڭىزدى بولىگىنە اينالدى. فەستيۆالدىڭ العاشقى كۇنىندە قوناقتار الدىندا الي وقاپوۆ، ءمادي رىمبايەۆ، نۇرعالىم امانباي، نۇرمۇحاممەد جاقىپ، اكەركە اماليات، كارىم مۋتۋرعانوۆ، جاس مۇقاسان جانە ILIGAI ونەر كورسەتتى.
Alma Qala فەستيۆالى 20-قىركۇيەككە دەيىن جالعاسادى. كەلۋشىلەردى ارتىستەردىڭ ونەر كورسەتۋى، تاقىرىپتىق الاڭدار، جەرگىلىكتى وندىرۋشىلەردىڭ جارمەڭكەسى جانە قالا كۇنىنە ارنالعان مەرەكەلىك باعدارلاما كۇتەدى.
قالانىڭ نەگىزگى الاڭدارىنا كىرۋ تەگىن.
ەسكە سالايىق، بۇعان دەيىن الماتىدا قالا كۇنى قالاي اتاپ وتىلەتىنىن حابارلادىق.