الماتىدا تاعى دا قازاق ۇلتتىق ۋنيۆەرسيتەتىنىڭ ستۋدەنتى قازا تاپتى

الماتى. KAZINFORM - ءال-فارابي اتىنداعى قازاق ۇلتتىق ۋنيۆەرسيتەتىنىڭ گەوگرافيا جانە تابيعاتتى پايدالانۋ فاكۋلتەتىندە وقىعان ءبىرىنشى كۋرس ستۋدەنتى مەرت بولدى.

Фото: wikipedia.org

جەلىدە تاراعان اقپاراتقا سايكەس، تۇندە ستۋدەنتتەر اراسىندا توبەلەس بولعان.

الماتى قالالىق پوليتسيا دەپارتامەنتى ستۋدەنتتىڭ ولىمىنە قاتىستى قىلمىستىق ءىس قوزعالعانىن حابارلادى.

- اتالعان دەرەك بويىنشا بوستاندىق اۋداندىق پوليتسيا باسقارماسى قىلمىستىق ءىس قوزعادى. كۇدىكتى ۇستالدى، - دەپ مالىمدەدى پوليتسيا دەپارتامەنتى.

ازىرگە ستۋدەنتتىڭ قانداي جاعدايدا قازا تاپقانى بەلگىسىز. وقيعانىڭ ءمان-جايى تەرگەۋ بارىسىندا انىقتالادى.

ۋنيۆەرسيتەتتىڭ باسپا ءسوز قىزمەتى مارقۇمنىڭ اتا-اناسى مەن جاقىندارىنا كوڭىل ايتىپ، وقيعانىڭ ءمان-جايىن قۇقىق قورعاۋ ورگاندارى انىقتاپ جاتقانىن مالىمدەدى.

- ءال-فارابي اتىنداعى قازاق ۇلتتىق ۋنيۆەرسيتەتىنىڭ ۇجىمى گەوگرافيا جانە تابيعاتتى پايدالانۋ فاكۋلتەتىنىڭ ءبىرىنشى كۋرس ستۋدەنتىنىڭ مەزگىلسىز قازاسىنا بايلانىستى اتا-اناسى مەن تۋعان-تۋىستارىنا قايعىرا كوڭىل ايتادى. قازىر قۇقىق قورعاۋ ورگاندارى وقيعانىڭ ءمان-جايىن انىقتاپ جاتىر. ۋنيۆەرسيتەت جاعدايدىڭ جان-جاقتى ءارى ءادىل قارالۋىنا بارىنشا قولداۋ كورسەتەدى، - دەلىنگەن وقۋ ورنىنىڭ حابارلاماسىندا.

سونداي-اق وقۋ ورنى كوپشىلىكتى قارا جامىلعان وتباسىنىڭ قايعىسىنا قۇرمەتپەن قاراپ، رەسمي راستالماعان اقپاراتتى تاراتپاۋعا شاقىردى.

ەسكە سالساق، بۇعان دەيىن دە قازۇۋ- دا ستۋدەنت ولىمىنە قاتىستى قىلمىستىق ءىس قوزعالدى.

عىلىم جانە جوعارى ءبىلىم ءمينيسترى ساياسات نۇربەك ءال-فارابي اتىنداعى قازۇۋ ستۋدەنتىنىڭ قايتىس بولۋىنا قاتىستى پىكىر ءبىلدىرىپ، ۋنيۆەرسيتەت باسشىلىعى مارقۇمنىڭ وتباسىنا قاجەتتى كومەك كورسەتكەنىن ايتتى.