شىعىستاعى قانداستارىمىزدىڭ ۇلتتىق ونەرگە دەگەن قۇرمەتى ەرەكشە. ىلە، التاي، تارباعاتاي جانە شىينجاڭ ءوڭىرىن مەكەندەگەن قازاقتار اتا-بابادان قالعان كۇيشىلىك، انشىلىك جانە اسپاپتىق مەكتەپتەردى كۇش-قۋاتىنا قاراي ساقتاپ، دامىتىپ كەلەدى. سولاردىڭ ءبىرى شەرتپە كۇي ءداستۇرىنىڭ كورنەكتى وكىلى نۇرىمباي سۇلەيمەن ۇلى ەدى. جاستايىنان ونەردەن سۋساپ وسكەن كومپوزيتوردىڭ ارتىندا 60-تان اسا كۇي قالدى. بۇگىندە ونەر يەسىنىڭ مۇراسىن قىزى ءنۇربيبى جالعاستىرىپ ءجۇر. ول ءتورت جىل بۇرىن اتامەكەنگە ورالىپتى. كونسەرۆاتوريا ساحناسىندا اكەسىنىڭ «ىستىق ۇيا» كۇيىن تارتىپ بەردى.
ءنۇربيبى نۇرىمباي قىزى، كۇيشى:
- ول كىسى جاستايىنان ونەرلى وتباسىندا ەر جەتكەن. اكەم التى جاسىنان باستاپ دومبىرانى وزىنە بويتۇمار ەتىپ ۇستاپ، كەيىننەن كوپتەگەن كۇيلەر شىعاردى. ءوز جانىنان 63 كۇي شىعاردى. سوسىن سىبىزعىنىڭ ءۇنىن ەستىپ وسكەندىكتەن، كوبىنە دومبىرادا شىعارعان كۇيلەرى دە سىبىزعى ۇنىنە جاقىن.
سىبىزعى - تابيعات سىرىن جەتكىزگەن كونە اسپاپ. ول اڭ-قۇستىڭ، تاۋ مەن تاستىڭ ءۇنىن اينىتپاي سالادى. شينجاڭ قازاقتارى ونىڭ سىرلى سازىن ۇرپاقتان-ۇرپاققا اماناتتاپ كەلەدى. جيىرما جىلدان بەرى قولىنان سىبىزعىسى تۇسپەگەن اقجول ءجۇسىپ بۇگىنگى كەشتە سماعۇلدىڭ «قايران توتاي» كۇيىن ورىندادى.
اقجول ءجۇسىپ، سىبىزعىشى:
- نەگىزى، مەن ءوزىم قىتاي جاقتا جۇرگەن كەزىمدە قولىمداعى سىبىزعىنى ەرمەك قىلىپ ءجۇردىم. ەرەنقابىرعا جاقتا ايگىلى سىبىزعىشى بەيىلحان قالياقپار ۇلى ءومىر سۇرگەن. سول كىسىگە بارىپ، سىبىزعى ونەرىنىڭ ءمان-جايىن سۇراستىرىپ، شاكىرت بولدىم. وسى سىبىزعىنىڭ ءداستۇرلى ويناۋ ادىستەرىن يگەردىم.
بۇل كونسەرت الىستاعى اعايىن اراسىندا ۇلتتىق ونەردىڭ وشپەگەنىن، قازاق حالقىنىڭ ءان-كۇيى گەوگرافيالىق شەكارامەن شەكتەلمەيتىنىن كورسەتتى. كەشتە قىتاي كومپوزيتورلارىنىڭ شىعارمالارى دا ورىندالدى. مۇنداعى ماقسات - عىلىمي جانە مادەني ىنتىماقتاستىقتى نىعايتۋ.
24.kz