استانا. KAZINFORM - الماتىدا ەلەكتروساموكاتپەن جۇرگەن 44 جاستاعى ەر ادام جول اپاتىنان قازا تاپتى. وقيعا تۇنگى ۋاقىتتا ۆارلاموۆ كوشەسىندە، تولە بي داڭعىلىنا جاقىن ماڭدا بولعان، دەپ حابارلايدى turkystan.kz.
الدىن الا مالىمەت بويىنشا، ەر ادام ەلەكتروساموكاتتى باسقارا الماي، جول جيەگىندەگى جيەكتاسقا سوعىلىپ قۇلاعان. سالدارىنان اۋىر جاراقات العان.
وقيعا ورنىنا جەدەل جاردەم قىزمەتكەرلەرى جەتىپ، ەر ادامنىڭ ءومىرىن ساقتاپ قالۋعا ارەكەت جاساعان. الايدا العان جاراقاتتارىنىڭ اۋىرلىعىنا بايلانىستى ول كوز جۇمدى.
الدىن الا اقپارات بويىنشا، مارقۇم ەلەكتروساموكاتپەن جۇرگەن كەزدە شلەم جانە باسقا دا قورعانىس قۇرالدارىن پايدالانباعان.
قازىرگى ۋاقىتتا وقيعانىڭ بارلىق ءمان-جايى انىقتالىپ جاتىر.
بەيسەن سۇلتان
Сұлтан Бейсен Әл-Фараби атындағы ҚазҰУ-дың журналистика факультетінің түлегі. Еңбек жолын 2007 жылы "Жазушы" баспасында редактор болып бастаған. 2008 жылы "Ара" журналында, 2010-2011 жылы Алматы облысының "Талдықорған кеші" газетінде тілші, 2012 жылы "Талдықорған Севен" газетінде тілші болып жұмыс істеген. 2013 жылы сәуір айынан бастап "ҚазАқпарат" ХАА-нде Төте жазу редакциясында шығарушы редактор болып жұмысқа орналасқан