جەر سىلكىنىسى 28-قىركۇيەك ساعات 09:38 دە تىركەلدى. جەراستى دۇمپۋلەرىنىڭ كۇشى الماتىدا 3-4 بالل بولدى.
جەر سىلكىنىسىنەن كەيىن ت ج م سەيسمولوگيالىق باقىلاۋلار مەن زەرتتەۋلەر ۇلتتىق عىلىمي ورتالىعىنىڭ كوميسسياسى گەوفيزيكالىق، سەيسمولوگيالىق، گيدروحيميالىق، گيدروديناميكالىق جانە باسقا دا باقىلاۋلاردىڭ دەرەكتەرىن تالدادى.
مامانداردىڭ ايتۋىنشا، بۇل جەر سىلكىنىسى ايماقتاعى قالىپتى سەيسميكالىق بەلسەندىلىك اياسىندا بولعان.
- الماتى بولجامدىق پوليگونىنداعى قازىرگى سەيسميكالىق جاعداي تۇراقتى دەپ باعالاندى. كوميسسيانىڭ قازىرگى باعالاۋىنا سايكەس، الماتى بولجامدىق پوليگونى اۋماعىندا جويقىن جەر سىلكىنىسىن كۇتۋگە نەگىز جوق،- دەپ حابارلادى ت ج م.
سونىمەن قاتار ورتالىق سەيسميكالىق جاعدايدى باقىلاۋ جالعاسىپ جاتقانىن اتاپ ءوتتى. ماماندار دەرەكتەردى تۇراقتى تۇردە تالداپ جاتىر.
بۇعان دەيىن ت ج م جەر سىلكىنىسىنەن كەيىن «قازسەلدەنقورعاۋ» ماماندارى وزەن ارنالارى، گيدروتەحنيكالىق قۇرىلىستار، كوشكىن جانە سەل قاۋپى بار ۋچاسكەلەر، سونداي-اق تىرشىلىكتى قامتاماسىز ەتۋ نىساندارىن تەكسەرگەنىن حابارلاعان ەدى. زاقىمدانۋ فاكتىلەرى انىقتالعان جوق. قيراۋ نەمەسە زارداپ شەككەندەر تۋرالى اقپارات تۇسكەن جوق.