بيىل وليمپيادانىڭ ىرىكتەۋ كەزەڭىنە الەمنىڭ 28 ەلىندەگى 125 تەن استام قالادان شامامەن 1500 مەكتەپ وقۋشىسى قاتىستى. ىرىكتەۋ ناتيجەسىندە 49 كوماندا فينالعا جولداما الىپ، ولاردىڭ 47-شەشۋشى كەزەڭدە باق سىنادى. فينالعا 15 ەلدەن 118 وقۋشى قاتىستى.
حالىقارالىق جارىستا قازاقستان، ارمەنيا، بەلارۋس، يسپانيا، يتاليا، كيپر، قىرعىزستان، ماروككو، موڭعوليا، رەسەي، رۋمىنيا، تاجىكستان، تايلاند، تۇرىكمەنستان جانە فيليپپين ەلدەرىنىڭ وقۋشىلارى ءوز بىلىمدەرى مەن قابىلەتتەرىن كورسەتتى.
وليمپيادا كوماندالىق فورماتتا وتكىزىلىپ، قاتىسۋشىلار باعدارلامالاۋ، دەرەكتەردى تالداۋ، ماتەماتيكا جانە ماشينالىق وقىتۋ باعىتتارى بويىنشا كۇردەلى تاپسىرمالاردى ورىندادى. فينالدىق كەزەڭ ەكى تۋردان تۇردى.
جارىس قورىتىندىسى بويىنشا گران-پري رەسەي كومانداسىنا بۇيىردى. I ورىندى رەسەيدىڭ 3 كومانداسى، II ورىندى قازاقستان، رەسەي، تايلاند جانە كيپر ەلدەرىنىڭ 8 كومانداسى، III ورىندى قازاقستان، رۋمىنيا، رەسەي، يسپانيا جانە موڭعوليا ەلدەرىنىڭ 12 كومانداسى يەلەندى. وليمپيادانىڭ جالپى جۇلدە قورى 11 ميلليون تەڭگەنى قۇرادى.
FAIO وليمپياداسى بيىل ءۇشىنشى رەت ۇيىمداستىرىلدى. 2024-جىلى تەك قازاقستاندىق وقۋشىلار قاتىسقان ءبىلىم سايىسى بۇگىندە حالىقارالىق دەڭگەيگە كوتەرىلدى. بۇل جارىس جاس دارىنداردىڭ جاساندى ينتەللەكت پەن ماشينالىق وقىتۋ سالاسىنداعى ءبىلىمىن جەتىلدىرۋگە، تاجىريبە الماسۋىنا جانە زاماناۋي تەحنولوگيالارعا دەگەن قىزىعۋشىلىعىن ارتتىرۋعا مۇمكىندىك بەرەدى.
حالىقارالىق وليمپيادانىڭ وتۋىنە ءبىرقاتار ءىرى تەحنولوگيالىق، قارجىلىق جانە ءبىلىم بەرۋ ۇيىمدارى قولداۋ كورسەتتى. اتاپ ايتقاندا، activ 5G تەلەكوممۋنيكاتسيالىق سەرىكتەس، Freedom Holding Corp. تەحنولوگيالىق سەرىكتەس، ANSA Qory يننوۆاتسيالار جونىندەگى سەرىكتەس، Halyk يمپاكت- سەرىكتەس رەتىندە قاتىستى. سونىمەن قاتار Mastercard ،investbanq ،MA7 Ventures ،Silkroad Innovation Hub جانە Marine Health ۇيىمدارى جوبانى قولدادى.
وسىنداي حالىقارالىق زياتكەرلىك جارىستاردى قازاقستاندا وتكىزۋ ەلىمىزدىڭ ءبىلىم بەرۋ الەۋەتىن تانىتۋعا، دارىندى وقۋشىلاردى قولداۋعا جانە جاساندى ينتەللەكت سالاسىنداعى حالىقارالىق ىنتىماقتاستىقتى دامىتۋعا ىقپال ەتەدى.