قالالىق پوليتسيا دەپارتامەنتىنىڭ مالىمەتىنشە، وزگە تۇلعالاردىڭ مالىمەتىن جامىلىپ جۇمىس ىستەگىسى كەلگەندەرگە جەكە كۋالىك، جۇرگىزۋشى كۋالىگى مەن كولىكتىڭ تەحنيكالىق پاسپورتىنان تۇراتىن دايىن قۇجاتتار جيىنتىعىن جاساپ بەرىپ جۇرگەن ازامات ۇستالدى. زاڭسىز كاسىپتى جولعا قويعان كۇدىكتىنى كريمينالدىق پوليتسيا قىزمەتكەرلەرى قولعا تۇسىرگەن.
ول اقىعا قازاقستان ازاماتتارىنىڭ قولدانىستاعى ج س ن مەن كۋالىك نومىرلەرىن پايدالانا وتىرىپ، جالعان قۇجاتتار دايىنداعان. تەك سۋرەتى مەن دەربەس مالىمەتتەرىن اۋىستىرىپ وتىرعان. مۇنداي قۋلىق تاپسىرىس بەرۋشىلەرگە اتى-ءجونىن جاسىرىپ، جەتكىزۋ سەرۆيستەرى مەن جولاۋشى تاسىمالداۋ قوسىمشالارىنا تىركەلۋگە مۇمكىندىك بەرگەن.
- الدىن الا دەرەكتەر بويىنشا نەگىزگى تاپسىرىس بەرۋشىلەر ورتالىق جانە وڭتۇستىك ازيا ەلدەرىنەن كەلگەن ازاماتتار بولعان. ولار جاساندى قۇجاتتاردى نەگىزىنەن كۋرەر نەمەسە جۇرگىزۋشى بولىپ جۇمىسقا ورنالاسۋ ءۇشىن پايدالانعان. جەدەل ىزدەستىرۋ شارالارى بارىسىندا كۇدىكتى قولعا ءتۇستى. ونىڭ كەڭسەسىن تىنتۋ كەزىندە جالعان قۇجات جاساۋعا پايدالانىلدى دەگەن كۇدىكپەن كومپيۋتەرلىك تەحنيكا مەن ۇيالى تەلەفون تاركىلەنىپ، ساراپتاماعا جىبەرىلدى، - دەپ حابارلادى دەپارتامەنتتەن.
ودان بولەك پوليتسيا ونىڭ بۇل ارەكەتتەرىنە زاڭسىز ميگراتسيانى ۇيىمداستىرۋ بابى بويىنشا قۇقىقتىق باعا بەرۋ ماسەلەسىن قاراستىرىپ جاتىر.
ەسكە سالايىق، بۇعان دەيىن الماتى وبلىسىندا پوليتسەيلەر كولىكتى توقتاتۋ ءۇشىن قارۋ قولداندى.