ءى ءى م بوپسالاۋ، قورقىتۋ جانە قۇقىق قورعاۋ ورگاندارى قىزمەتكەرلەرىنىڭ مارتەبەسىن زاڭسىز پايدالانۋ فاكتىلەرىنە بايلانىستى قىلمىستاردىڭ جولىن كەسۋ بويىنشا جۇيەلى جۇمىستى جالعاستىرىپ جاتىر.
— الماتىدا وزدەرىن ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى رەتىندە تانىستىرىپ، قارۋ قولدانىپ، مەگاپوليس تۇرعىنىنان اقشا تالاپ ەتكەن ادامدار ۇستالدى.
اتاپ ايتقاندا، 10-تامىزدا ءبىر توپ ادام الدىن الا ءسوز بايلاسىپ، جابىرلەنۋشىنىڭ سوڭىنان اڭدىعان. وزدەرىن پوليتسيا قىزمەتكەرلەرى رەتىندە تانىستىرىپ، تاپانشامەن قورقىتىپ، ونى كولىككە وتىرۋعا ماجبۇرلەگەن جانە قالا سىرتىنا الىپ كەتكەن.
ولار قىسىم كورسەتىپ جابىرلەنۋشىنى تۋىسىنا قوڭىراۋ شالۋعا ماجبۇرلەگەن. وسىلايشا تۋىسى ولار كورسەتكەن نومىرگە 3 ميلليون تەڭگە اۋدارعان، — دەلىنگەن ءى ءى م حابارلاماسىندا.
وسى اۋىر قىلمىستى جاساعانى ءۇشىن ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى بۇرىن سوتتالعان ءتورت ادامدى ۇستادى. ولاردىڭ بىرەۋى بۇعان دەيىن ادام ولتىرگەنى ءۇشىن جازاسىن وتەگەن. بارلىعى ۋاقىتشا ۇستاۋ يزولياتورىنا قامالدى.
— ءتىنتۋ بارىسىندا 2 مىلتىق، كارابين، گاز تاپانشاسى جانە وق-دارىلەر تاركىلەندى. تەرگەۋ امالدارى جالعاسىپ جاتىر، — دەلىنگەن حابارلامادا.
وسىعان ۇقساس قىلمىستىق ءىس اقتوبە وبلىسىندا دا قوزعالدى. وندا بۇرىن سوتتالعان جەرگىلىكتى تۇرعىن ۇستالدى. ول دا ءوزىن ۇيىمداسقان قىلمىسقا قارسى كۇرەس باسقارماسىنىڭ قىزمەتكەرى رەتىندە تانىستىرىپ، جەرگىلىكتى تۇرعىنداردان پسيحولوگيالىق قىسىم كورسەتۋ ارقىلى اقشا تالاپ ەتكەن.
ءى ءى م ازاماتتاردى قىراعى بولۋعا جانە وزدەرىن قۇقىق قورعاۋ ورگاندارىنىڭ قىزمەتكەرلەرى رەتىندە تانىستىراتىن ادامداردىڭ قورقىتۋى مەن قىسىمىنا بەرىلمەۋگە شاقىرادى.
مۇنداي جاعدايلار تۋىنداعان كەزدە دەرەۋ پوليتسياعا جۇگىنۋ قاجەت.
ايتا كەتەلىك ب ق و سوتىندا بوپسالاۋمەن اينالىسقان ۇيىمداسقان توپتىڭ ءىسى قارالىپ جاتقانى تۋرالى جازعان ەدىك.