بايقاۋ 27 -قازانعا دەيىن جالعاسادى. بۇل كۇنى شارانىڭ جابىلۋ سالتاناتى ءوتىپ، جەڭىمپازدار ماراپاتتالادى.
— رەسپۋبليكالىق بايقاۋ امىرە قاشاۋبايەۆتىڭ شىعارماشىلىق مۇراسىن دارىپتەۋگە، ءداستۇرلى ءان ونەرىن دامىتۋعا جانە جاس ورىنداۋشىلاردى قولداۋعا باعىتتالعان. سونداي-اق ءبىرجان سال، اقان سەرى، ەستاي، مۇحيت سەكىلدى حالىق كومپوزيتورلارىنىڭ اسىل مۇراسىن قايتا جاڭعىرتۋ كوزدەلگەن، — دەلىنگەن اقپاراتتا.
بايقاۋعا 41 ءوتىنىم ءتۇستى. ىرىكتەۋ قورىتىندىسى بويىنشا رەسپۋبليكالىق كەزەڭگە 20-35 جاس ارالىعىنداعى 22 ءانشى جولداما الدى. ءىس-شارانىڭ اشىلۋى قارساڭىندا قاتىسۋشىلاردىڭ ساحناعا شىعۋ كەزەگى جەرەبە ارقىلى انىقتالدى.
بايقاۋ ەكى كەزەڭنەن تۇرادى. ءبىرىنشى كەزەڭدە قاتىسۋشىلار ورىنداۋشىلىق شەبەرلىگىن، وزىندىك ءان ايتۋ مانەرىن جانە ءداستۇرلى ءان مەكتەپتەرىنىڭ ەرەكشەلىكتەرىن قانشالىقتى مەڭگەرگەنىن كورسەتەدى.
قاتىسۋشىلاردىڭ ونەرىن انشىلەر مەن بەيىندى وقۋ ورىندارىنىڭ وقىتۋشىلارىنان قۇرالعان قازىلار القاسى باعالايدى. ولاردىڭ قاتارىندا جاقسىكەلدى كەمالوۆ، قايرات كاكىموۆ، نۇرجان جانپەيىسوۆ، شولپان دارجان جانە گۇلميرا سارينا بار.