الماتى ونكولوگيالىق ورتالىعىنىڭ كونسۋلتاتسيالىق- دياگنوستيكالىق ءبولىمىنىڭ مەڭگەرۋشىسى اقبوتا ءادىلوۆانىڭ ايتۋىنشا، ءسۇت بەزى وبىرى قازىر قازاقستانداعى ايەلدەر اراسىندا ەڭ كوپ تاراعان ونكولوگيالىق اۋرۋ بولىپ وتىر. دەگەنمەن، سكرينينگتىڭ ارقاسىندا كەيىنگى جىلدارى ءولىم-ءجىتىم ازايعان.
- سوڭعى 10 جىلدا ءسۇت بەزى وبىرىنان بولاتىن ءولىم-ءجىتىم سكرينينگ پەن ەرتە ەمدەۋدىڭ ارقاسىندا ەكى ەسەگە جۋىق تومەندەدى. بۇل وتە ماڭىزدى، ويتكەنى اتالعان اۋرۋ ايەلدەر اراسىنداعى ونكولوگيالىق دياگنوزدىڭ ىشىندە ەڭ كوپ تاراعانى بولىپ وتىر. اۋرۋ نەعۇرلىم ەرتە انىقتالسا، ونى ءتيىمدى ەمدەۋ مۇمكىندىگى سوعۇرلىم جوعارى بولادى، - دەدى اقبوتا ءادىلوۆا.
«قىزعىلت قازان» ايلىعى ايەلدەرگە پروفيلاكتيكالىق تەكسەرۋىڭ ماڭىزىن ەسكە سالىپ، ەم الىپ جاتقانداردى قولداۋعا باعىتتالعان. قازاقستاندا اكتسيا اياسىندا ونكولوگيالىق ورتالىقتار اشىق ەسىك كۇنىن وتكىزەدى. ايەلدەر ونكوماممولوگتاردان تەگىن كەڭەس الىپ، ۋدز بەن مامموگرافيادان وتە الادى.
- 1-31-قازان ارالىعىندا وتەتىن «قىزعىلت قازان» دارىگەرلەردى، ناۋقاستار مەن ايەل دەنساۋلىعىنا بەيجاي قارامايتىن بارلىق ازاماتتى بىرىكتىرەدى. اشىق ەسىك كۇنى مامانعا جۇگىنىپ، تەكسەرۋدەن اقىسىز وتە الاسىز. الماتىدا مۇنداي ءىس-شارانىڭ وتەتىن كۇنى مەن ۋاقىتى تۋرالى اقپاراتتى الماتى ونكولوگيالىق ورتالىعىنىڭ @almaty_onco پاراقشاسىنان الۋعا بولادى، - دەدى مامان.
ونىڭ سوزىنشە، بۇگىندە الماتىدا ءسۇت بەزى وبىرى دياگنوزىمەن ديسپانسەرلىك ەسەپتە 9520 پاتسيەنت تۇر. بيىل 8 ايدا العاش رەت 659 ناۋقاس انىقتالعان. ال جىل قورىتىندىسى بويىنشا ولاردىڭ سانى 990 بولۋى مۇمكىن.
اقبوتا ءادىلوۆا تەگىن مامموگرافيالىق سكرينينگ 40 تان 76 جاسقا دەيىنگى ايەلدەرگە تىركەلگەن ەمحاناسىندا ەكى جىلدا ءبىر رەت قولجەتىمدى ەكەنىن ەسكە سالدى.