الماتىدا 45 مىڭ ورىندىق ستاديون قۇرىلىسى قالاي ءجۇرىپ جاتىر

الماتى. KAZINFORM - الماتىدا ۋەفا 4 ساناتىنىڭ تالاپتارىنا ساي جاڭا ستاديون سالىنىپ جاتىر.

Фото: instagram/@etnomura

الداعى جىلدارى مەگاپوليستىڭ باستى الاڭىنا اينالاتىن 45 مىڭ كورەرمەنگە ارنالعان جاڭا ستاديون قۇرىلىسى قانداي ساتىدا ەكەنىن Kazinform اگەنتتىگى انىقتاپ كوردى.

زەرتتەۋ مەن سىناق جۇرگىزىلىپ جاتىر

الماتى قالاسى قۇرىلىس باسقارماسىنىڭ مالىمەتىنشە، قازىر جالپى اۋدانى 32 گەكتار قۇرىلىس الاڭىندا نەگىزگى قۇرىلىس جۇمىستارىن باستاۋعا دايىندىق جانە ينجەنەرلىك-گەولوگيالىق زەرتتەۋ جۇمىستارى جۇرگىزىلىپ جاتىر. سەبەبى نىسان سالىناتىن قۇلجا جانە تالعار تاسجولدارىنىڭ اراسىنداعى بۇل اۋماقتىڭ سەيسميكالىق قاۋىپتىلىگى - 10 بال.

- قۇرىلىس كونسترۋكسيالارىنىڭ ورنىقتىلىعى مەن قاۋىپسىزدىگىن قامتاماسىز ەتۋ ماقساتىندا قازاق قۇرىلىس جانە ساۋلەت عىلىمي-زەرتتەۋ جانە جوبالاۋ ينستيتۋتىمەن (قازقسعزي) بىرلەسىپ، ينجەنەرلىك-گەولوگيالىق زەرتتەۋلەر جۇرگىزىلىپ كەلەدى. اتاپ ايتقاندا: توپىراقتىڭ فيزيكالىق- مەحانيكالىق قاسيەتتەرىن، بەرىكتىگىن جانە جۇك كوتەرۋ قابىلەتىن انىقتاۋ بويىنشا جۇمىستار اتقارىلۋدا، - دەپ حابارلادى باسقارمادان.

ستاديون ىرگەتاسىنىڭ قۇرىلىسى باستالمادى

ودان بولەك ۆەدومستۆو وكىلدەرى قۇرىلىس الاڭىندا سىناق قادالارى قاعىلىپ جاتقانىن دا اتاپ ءوتتى. بۇل جۇمىستار بولاشاق ستاديون كونسترۋكتسيالارىنىڭ جۇكتەمەسىن كوتەرەتىن قادالاردىڭ بەرىكتىگى مەن ورنىقتىلىعىن انىقتاۋ ءۇشىن قاجەت.

- ستاديون ىرگەتاسىنىڭ قۇرىلىسىن باستاۋ سىناق قادالارىن سىناۋ ناتيجەلەرىنە جانە ينجەنەرلىك- گەولوگيالىق زەرتتەۋلەردىڭ قورىتىندىلارىنا تىكەلەي بايلانىستى. سول سەبەپتى قازىرگى ۋاقىتتا نەگىزگى ىرگەتاس كونسترۋكسيالارىن بەتونداۋ جۇمىستارى باستالعان جوق. سىناق ناتيجەلەرى بويىنشا ءتيىستى تەحنيكالىق قورىتىندىلار الىنعاننان كەيىن ىرگەتاس قۇرىلىسىن باستاۋ كوزدەلگەن، - دەلىنگەن قۇرىلىس باسقارماسىنىڭ جاۋابىندا.

سونداي-اق ستاديون قۇرىلىسىنا دايىندىق اياسىندا ءىشىنارا جەر جۇمىستارى ورىندالعان. ونىڭ ىشىندە: قۇرىلىس الاڭىنداعى توپىراقتىڭ وسىمدىك قاباتىن الۋ جانە اۋماقتى باستاپقى تەگىستەۋ جۇمىستارى جۇرگىزىلگەن. دەگەنمەن، اۋماقتى تەگىستەۋ تولىق اياقتالعان جوق. ۆەدومستۆو جاۋابىنا سايكەس، جەر قازۋ جانە كەرى تولتىرۋ جۇمىستارى جوبالىق شەشىمدەر مەن قۇرىلىس كەزەڭدەرىنە سايكەس جۇزەگە اسىرىلادى.

جىل سوڭىنا دەيىن نە ىستەلەدى

الماتى قالاسى قۇرىلىس باسقارماسى باسشىسىنىڭ ورىنباسارى نۇربەك جاسىبايەۆ 2026 -جىلدىڭ سوڭىنا دەيىن قۇرىلىس الاڭىندا مىنا جۇمىستاردى اياقتاۋ جوسپارلانعانىن ايتتى:

• سىناق قادالارىن قاعۋ جانە سىناۋ جۇمىستارىن اياقتاۋ، ولاردىڭ ناتيجەلەرى بويىنشا ءتيىستى تەحنيكالىق قورىتىندىلاردى ازىرلەۋ؛

• ستاديون ارەناسى مەن وعان ىرگەلەس جاتتىعۋ الاڭدارىنىڭ اۋماعىندا جوبادا كوزدەلگەن جەر قازۋ، توپىراقتى وڭدەۋ جانە تەگىستەۋ جۇمىستارىن ورىنداۋ؛

• قۇرىلىس الاڭىن قاجەتتى ۋاقىتشا جانە تۇراقتى ينجەنەرلىك كوممۋنيكاتسيالارمەن، ونىڭ ىشىندە ەلەكترمەن، سۋمەن جانە سىرتقى جارىقتاندىرۋمەن قامتاماسىز ەتۋ بويىنشا جۇمىستاردى جۇرگىزۋ؛

• جوبالىق قۇجاتتاماعا سايكەس قادالاردى ورناتۋ جانە ولاردى بەتونداۋ جوسپارلانىپ وتىر.

بۇعان دەيىن الماتى قالاسىن دامىتۋ ورتالىعى قالادا بوي كوتەرەتىن ستاديوننىڭ بولاشاق بەينەسىمەن بولىسكەن بولاتىن.

ەسكە سالايىق، بىلتىر الماتىدا 35 مىڭ ورىندىق جاڭا ستاديون سالىناتىنى حابارلاندى.

كەيىن تۇرعىندار مەن قوعام ۇسىنىسى ەسكەرىلىپ، الاڭ سىيىمدىلىعى 45 مىڭ ورىنعا ۇلعايتىلدى.

جاڭا ستاديوننىڭ قۇرىلىسىن 2028 -جىلدىڭ ناۋرىزىندا اياقتاۋ جوسپارلانعان.