بالالار مازاسىزدانىپ، ىشتەرى اۋىرعاندىقتان، اۋرۋحاناعا جەتكىزىلگەن. تەكسەرۋ كەزىندە ولاردىڭ اسقازان-ىشەك جولدارىنان بىرنەشە ماگنيت انىقتالعان.
دارىگەرلەر تەز ارادا وتا جاساۋعا شەشىم قابىلدادى. بوگدە زات 4 جاسار ءبۇلدىرشىننىڭ اسقازانى مەن اش ىشەگىنىڭ ءارتۇرلى بولىگىنە ءتۇسىپ كەتكەن ەكەن. ماگنيتتەر ءبىر-بىرىنەن الشاق جاتسا دا، ءبىر-بىرىنە تارتىلىپ، ىشەكتى قىسىپ تۇرعان. بىلىكتى ماماندار بالانىڭ اسقازانىنان 15 ماگنيت الىپ شىقتى. قالعان 14 ماگنيت اش ىشەكتەن تابىلعان.
سونىمەن قاتار دارىگەرلەر وتا كەزىندە بالانىڭ ىشەگىندە تۋا ءبىتتى كىشكەنتاي قالتا ءتارىزدى ءوسىندىنى، ياعني «مەككەل ديۆەرتيكۋلىن» دا الىپ تاستادى. وسىلايشا، ءبۇلدىرشىننىڭ اعزاسىنان بارلىعى 29 ماگنيت شىعارىلدى.
ال ۇلكەن بالانىڭ توق ىشەگىنەن ءبىر-بىرىنە جابىسىپ قالعان ءۇش ماگنيت تابىلدى. دارىگەرلەر لاپاروسكوپيالىق وتا جاساپ، ارنايى حيرۋرگيالىق ادىسپەن ماگنيتتەردى سوقىر ىشەك تۇسىنا جىلجىتىپ، سول جەردەن الىپ شىقتى. بۇل ءتاسىلدىڭ نەگىزگى ارتىقشىلىعى - ىشەكتى تىكەلەي كەسىپ اشپاي-اق، بوگدە زاتتاردى الىپ شىعۋعا مۇمكىندىك بەرەدى.
وبلىستىق بالالار كلينيكالىق اۋرۋحاناسىنىڭ حيرۋرگى اسقار قانازوۆتىڭ ايتۋىنشا، بالالار ماگنيتتەردى ۇيدە ويناپ ءجۇرىپ ابايسىزدا جۇتىپ قويعان. اتا- اناسى دەر كەزىندە جەدەل جاردەم شاقىرىپ، مەديتسينالىق كومەككە جۇگىنگەن.
- بىرنەشە ماگنيتتى جۇتىپ قويۋ بالانىڭ دەنساۋلىعىنا ۇلكەن قاۋىپ توندىرەدى. سەبەبى ماگنيتتەر ىشەكتىڭ ءارتۇرلى بولىكتەرىندە ورنالاسسا دا، ءبىر-بىرىنە تارتىلىپ، ىشەكتى قىسىپ قالۋى مۇمكىن. سونىڭ سالدارىنان قان اينالىمى بۇزىلىپ، ىشەك زاقىمدانۋى، ءتىپتى تەسىلىپ كەتۋى ىقتيمال. مۇنداي جاعدايدا ۋاقىت جوعالتۋ اۋىر زارداپتارعا اكەلۋى مۇمكىن. سوندىقتان مەديتسينالىق كومەككە دەر كەزىندە جۇگىنۋ وتە ماڭىزدى. بۇل بالالار ماگنيتتەردى جۇتقاننان كەيىن شامامەن 5 ساعات وتكەن سوڭ اۋرۋحاناعا ءتۇستى. ولاردىڭ ۋاقىتىلى جەتكىزىلۋى مەن مەديتسينا ماماندارىنىڭ ۇيلەسىمدى جۇمىسىنىڭ ارقاسىندا قاۋىپتىڭ الدىن الدىق، - دەدى حيرۋرگ.
وتادان كەيىن اعالى-ءىنىلى تولىق تەكسەرۋدەن ءوتتى. ولاردىڭ اعزاسىنان قوسىمشا ماگنيتتەر انىقتالعان جوق. دارىگەرلەردىڭ جەدەل شەشىمى مەن كاسىبي جۇمىسىنىڭ ارقاسىندا بالالار جازىلىپ، 9 كۇننەن كەيىن ۇيلەرىنە شىعارىلدى.
دارىگەرلەر اتا-انالاردى بالالاردىڭ قاۋىپسىزدىگىنە ەرەكشە ءمان بەرۋگە شاقىرادى.
- ماگنيتتى كونسترۋكتورلار، ۇساق ويىنشىقتار مەن ماگنيت بولشەكتەرى، اسىرەسە، كىشكەنتاي بالالار ءۇشىن ءقاۋىپتى. ماگنيت جۇتقان بالادا باستاپقىدا ەشقانداي بەلگى بايقالماۋى مۇمكىن. ءول وزىن جاقسى سەزىنىپ، ادەتتەگىدەي ويناپ ءجۇرۋى دە ىقتيمال. الايدا ۋاقىت وتە كەلە اسقىنۋلار دامىپ، ءىشى اۋىرىپ، كەبۋى، جۇرەگى اينۋى، قۇسۋى، تابەتى تومەندەۋى مۇمكىن. سونداي-اق بالا مازاسىزدانىپ، ءجيى جىلاۋى، دەنە قىزۋى كوتەرىلىپ، ۇلكەن دارەتى بۇزىلۋى ىقتيمال، - دەپ ەسكەرتتى ماماندار.
دارىگەرلەردىڭ ەسكەرتۋىنشە، بالا ماگنيت جۇتىپ قويعانىنا كۇدىك بولسا، ەشقانداي بەلگى بايقالماسا دا، ۇيدە باقىلاپ ۋاقىت جوعالتپاي، دەرەۋ مەديتسينالىق كومەككە جۇگىنۋ قاجەت.