الماتى مەتروسىنىڭ «قالقامان» ستانسياسى جەلتوقساندا اشىلادى

استانا. قازاقپارات - وسىلايشا، جەر استى جولى تاعى ۇزارا تۇسەدى. قازىر دايىندىق جۇمىستارى ءجۇرىپ جاتىر. ايتا كەتەتىن جايت، بيىل 1 -جەلتوقساندا الماتى مەتروپوليتەنىنىڭ ىسكە قوسىلعانىنا 15 جىل تولادى، دەپ حابارلايدى 24KZ.

Фото: Алматы метрополитені

«قالقامان» ستانسياسى - الماتىنىڭ باتىسىندا ورنالاسقان. ول «باۋىرجان مومىش ۇلى» بەكەتىنەن كەيىن جايعاسقان. 12- بەكەتتىڭ قابىرعاسىنا قالقامان باتىر مەن مامىر سۇلۋدىڭ سۋرەتى سالىنىپتى. عاشىقتار داستانىنا ارقاۋ بولعان قوس كەيىپكەردىڭ بەينەسى بۇل جەردىڭ ەرەكشەلىگىن ايقىنداي تۇسەدى. قازىر قۇرىلىس- مونتاج جۇمىستارى تولىق اياقتالعان، تەك ماماندار قوزعالىس جۇيەلەرىن تەكسەرىپ جاتىر.

رەنات الدابەرگەنوۆ، «مەتروپوليتەن» ك م ك كۇردەلى قۇرىلىس قىزمەتىنىڭ باس ينجەنەرى:

- قازىرگى ۋاقىتتا ىسكە قوسۋ، باپتاۋ جۇمىستارى ءجۇرىپ جاتىر. سونداي-اق ستانسيانىڭ جوعارى بولىگىندەگى اباتتاندىرۋ جۇمىستارى دا تولىق اياقتالدى. جاڭا «قالقامان» ستانسياسى اشىلعاننان كەيىن الماتى مەتروسى تاۋلىگىنە 130 مىڭعا جۋىق جولاۋشى تاسىمالدايدى.

 مەترو - قالا تۇرعىندارى ءۇشىن ۋاقىت ۇنەمدەۋدىڭ ءتيىمدى جولى. اسىرەسە قاربالاس ۋاقىتتا جەر ۇستىندەگى كولىك كەپتەلىسىن اينالىپ وتەتىن تاماشا مۇمكىندىك. الماتى مەتروسى - قالا تاريحىنداعى ماڭىزدى جوبالاردىڭ ءبىرى. وسىدان تۋرا 15 جىل بۇرىن العاشقى جولاۋشىلارىن قابىلداعان مەترو بۇگىندە مىڭداعان تۇرعىننىڭ كۇندەلىكتى قاتىناس قۇرالىنا اينالدى.

 الماتى مەتروپوليتەنىنىڭ تاريحى 2011 -جىلدان باستاۋ الادى. سول جىلى جەلتوقسان ايىندا العاشقى جەتى بەكەت قولدانىسقا بەرىلىپ، جالپى ۇزىندىعى 8,6 شاقىرىم بولاتىن جەلى ىسكە قوسىلدى. كەيىن كەزەڭ-كەزەڭىمەن ۇزارتىلدى. 2015 -جىلى «سايران» مەن «ماسكەۋ»، ال 2022 -جىلى «سارى ارقا» مەن «باۋىرجان مومىش ۇلى» بەكەتتەرى قولدانىسقا بەرىلدى. قازىر 11 ستانسيا بار.

ءانۋار راسيلوۆ، «مەتروپليتەن» ك م ك قىزمەتكەرى:

 - مەتروپوليتەندە جۇمىس ىستەپ جۇرگەنىمە 10 جىلداي بولدى. جىلدان جىلعا جولاۋشىلار كوبەيىپ جاتىر. جاز كەزىندە سالقىن، سۋىق كەزدە جىلى. باسىندا اشىلعان كەزدە جولاۋشىلار از ەدى. قازىر جىلدان جىلعا كوبەيىپ جاتىر.

قوعامدىق كولىكتىڭ بۇل ءتۇرى 15 جىل ىشىندە تالاي جولاۋشىنى دىتتەگەن جەرىنە جەتكىزدى. قالا ۇلكەيگەن سايىن قالا كوشەلەرىنە تۇسەتىن جۇكتەمە دە ارتىپ كەلەدى. سوندىقتان مەترو جەلىسىن ودان ءارى كەڭەيتۋ ماڭىزدى. الداعى ۋاقىتتا «قالقامان» بەكەتىنەن «بارلىق» بازارىنا دەيىن تاعى ءۇش ستانسيا سالۋ جوسپارلانىپ وتىر. «بۇل شاھاردىڭ باتىس بولىگىندەگى كولىك قاتىناسىن جاقسارتۋعا مۇمكىندىك بەرەدى»، - دەيدى ماماندار.