ول شىڭعا شىعۋدىڭ بارلىعى دەرلىك قاۋىپتى ەكەنىن جەتكىزدى. تۋريستەردىڭ ۇستىنە تاس ءتۇسىپ، اۋا رايى اياقاستى قۇبىلىپ، تاجىريبە مەن ارناۋلى جابدىقتى قاجەت ەتەتىن قيىن جەرلەرگە دە تاپ بولۋى مۇمكىن.
قاي شاتقالدار قاۋىپتى؟
قۇتقارۋشى مەدۆەجە جانە كۇمبەلسۋ شاتقالدارىنا ەرەكشە نازار اۋداردى.
«مەدۆەجە شاتقالىندا ءۇش سارقىراما بار. مۇنداي ۋچاسكەدەن ءوتۋ ءۇشىن ارناۋلى جابدىق قاجەت بولىپ قالۋى مۇمكىن. دايىندىعى جوق تۋريستەر ول جاققا ءوز بەتىنشە بارماعانى ءجون. كۇمبەلسۋ شاتقالى - وتۋگە كەلمەيتىن قيىن جەر»، - دەپ ەسكەرتتى پاۆەل ۆوسكوبوينيكوۆ.
ونىڭ ايتۋىنشا، كەيبىرى ءتىپتى قاجەت جابدىقتى دۇرىس تاڭداماي جولعا شىعادى.
«جولعا شىقپاس بۇرىن مارشرۋتتى مۇقيات زەرتتەپ، تۋىستارىڭىزعا نەمەسە دوستارىڭىزعا ناقتى قاي باعىتپەن جۇرەتىنىڭىزدى حابارلاۋىڭىز كەرەك. «تاۋعا كەتتىم» دەگەن ءسوز بولمايدى. قۇتقارۋشىلار كەم دەگەندە شاتقالدىڭ اتاۋى مەن باراتىن جەرىڭىزدى ءبىلىپ وتىرۋى قاجەت»، - دەيدى پاۆەل ۆوسكوبوينيكوۆ.
تاۋعا شىعاتىندارعا كەڭەس
گەولوكاتسيا ناقتى بولعان جاعدايدا ىزدەستىرۋ-قۇتقارۋ وپەراتسياسىنىڭ ۇزاقتىعى شامامەن ەكى ەسەگە قىسقارۋى مۇمكىن. كوورديناتتار بەلگىسىز بولسا، قۇتقارۋشىلارعا ۇلكەن اۋماقتى تەكسەرۋگە تۋرا كەلەدى، كەيبىر جاعدايدا ۇيرەتىلگەن يتتەرى بار كينولوگيالىق توپتاردى شاقىرۋعا تۋرا كەلەدى.
پاۆەل ۆوسكوبوينيكوۆتىڭ ايتۋىنشا، تاۋعا شىعاتىندار ەكى تەلەفون نەمەسە قوسىمشا قۋات كوزىن الىپ ءجۇرۋى كەرەك، سونداي-اق، مارشرۋتتى ەلەكترون تۇردە عانا ەمەس، قاعاز نۇسقاسىندا دا ساقتاعان ءجون. كارتانىڭ ءبىر داناسىن تۋىستارىڭىزعا قالدىرعان دۇرىس. قايتاتىن ۋاقىتتى دا دۇرىس ەسەپتەۋ كەرەك.
«تۇسكە دەيىن جوسپارلاعان جەرىڭىزگە جەتپەسەڭىز، كەرى قايتىڭىز. ايتپەسە قاراڭعى تۇسكەن كەزدە جولدان اداسىپ كەتۋىڭىز مۇمكىن»، - دەدى قۇتقارۋشى.
قانداي كيىم كيگەن ءجون؟
جابدىققا دا ەرەكشە كوڭىل ءبولۋ قاجەت. تاۋعا شىعاردا توبىقتى جاۋىپ، ونى تۇگەل قىمتاپ تۇراتىن اياق كيىم تاڭداعان دۇرىس.
كۇن ىستىق بولعان جاعدايدا دا ۇزىن شالبار، دەنەنى تولىق جاباتىن كيىم، كۇرتە مەن باس كيىم الىپ جۇرگەن ءجون.