— بۇل جولدى 8 جولاقتى قىلىپ جاسايمىز دەگەندە كەرەمەت باستاپ ەدى. 2027 -جىلعا دەيىن ءبىراز جۇمىستى ءبىتىرىپ تاستايدى دەپ ەل قۋاندى. ءبىراق قازىر ونداي قارقىن جوق. اعاشتاردى كەسىپ، تەحنيكا كەلىپ، كەرەمەت جۇمىس بولىپ ەدى. سول قارقىن باسىلىپ قالدى. «قازاۆتوجول» جۇمىستاردى قاي ۋاقىتتا بىتىرەيىن دەپ وتسىزدار، - دەيدى بەينەجازبا ەركەبۇلان ەسىمدى تۇرعىن.
اتالعان بەينەجازباعا «قازاۆتوجول» ۇ ك» ا ق باسپا ءسوز قىزمەتى پىكىر ءبىلدىرىپ، تۇسىنىكتەمە بەردى. كومپانيا جاۋابىنا سايكەس، الماتى - بىشكەك اۆتوموبيل جولىنىڭ 19- 27 شاقىرىم ۋچاسكەسىندە قولدانىستاعى جول توسەمىن بۇزۋ جانە جاڭا جول جابىنىن توسەۋ بويىنشا نەگىزگى جۇمىستاردى 2027 -جىلدىڭ كوكتەمىندە باستاۋ جوسپارلانعان.
مۇنداي شەشىم قىسقى كەزەڭنىڭ جاقىنداۋىنا جانە جوبانى ىسكە اسىرۋدىڭ تەحنولوگيالىق ەرەكشەلىكتەرىنە بايلانىستى قابىلدانعان. جوبا اياسىندا اۆتوموبيل جولىن سەگىز قوزعالىس جولاعىنا دەيىن كەڭەيتۋ كوزدەلگەن. بۇل جۇمىستار اياسىندا جول توسەمىنىڭ كونسترۋكسياسىن تولىعىمەن اۋىستىرۋ، بيىكتىك بەلگىلەرىن وزگەرتۋ، سونداي-اق قولدانىستاعى ءبولۋ جولاعىن جانە وندا ورنالاسقان جارىقتاندىرۋ تىرەكتەرىن دەمونتاجداۋ تالاپ ەتىلەدى.
«قازاۆتوجول» ۇ ك» ا ق مالىمەتىنشە، بۇل جۇمىستار تەحنولوگيالىق رەتتىلىكتى ساقتاي وتىرىپ، كەزەڭ-كەزەڭىمەن ورىندالادى. ءبىرىنشى كەزەكتە ينجەنەرلىك كوممۋنيكاتسيالاردى قايتا ورناتۋ جۇمىستارى اياقتالادى، سودان كەيىن قولدانىستاعى جول توسەمىن دەمونتاجداۋ جانە جاڭا جول توسەمىنىڭ كونسترۋكتسياسىن سالۋ جۇمىستارى جۇرگىزىلەدى.
— قىسقى كەزەڭ قارساڭىندا اۋقىمدى دەمونتاجداۋ جۇمىستارىن باستاۋ ونسىز دا كۇردەلى جول قوزعالىسى جاعدايىن ودان ءارى قيىنداتىپ (قوزعالىس قارقىندىلىعى تاۋلىگىنە 100 مىڭ اۆتوكولىك)، جۇرگىزۋشىلەر مەن جەرگىلىكتى تۇرعىندارعا ايتارلىقتاي قولايسىزدىقتار تۋعىزادى. قازىرگى ۋاقىتتا نەگىزگى نازار جول وتكەلدەرى مەن كولىك ايرىقتارىن سالۋعا، ينجەنەرلىك كوممۋنيكاتسيالاردى قايتا ورناتۋعا جانە قاجەتتى جول-قۇرىلىس ماتەريالدارىن دايىنداۋعا اۋدارىلدى، — دەلىنگەن كومپانيا جاۋابىندا.
ەسكە سالايىق، بيىل پرەزيدەنت تاپسىرماسى نەگىزىندە الماتىدان قاسكەلەڭ قالاسىنا دەيىنگى اۆتوجول ۋچاسكەسىنىڭ 8 شاقىرىمدىق بولىگىن 8 جولاققا دەيىن كەڭەيتۋ جوباسى باستالدى. مۇندا ەكى جولايرىق پەن 9 جەرۇستى جاياۋ جۇرگىنشىلەر وتكەلىن سالۋ جوسپارلانىپ وتىر. ناتيجەسىندە اتالعان ۋچاسكەنىڭ وتكىزۋ قابىلەتى 2 ەسە ارتادى.
جوبانى قارجىلاندىرۋ قازاقستاننىڭ دامۋ بانكى ارقىلى جۇزەگە اسىرىلىپ جاتىر. بۇل جۇمىسقا جالپى 33,9 ميلليارد تەڭگە جۇمسالادى.
اۆتورلار
دوسبول اتاجان