ۆەدومستۆو مالىمەتىنە سايكەس، الماتىداعى زياندى شىعارىندىلارىنىڭ جىلدىق كولەمىنىڭ شامامەن 60 پايىزى اۆتوكولىككە تيەسىلى. بۇل جىلىنا 113 مىڭ تونناعا جۋىق زياندى زات. دەگەنمەن ماماندار مەگاپوليس اۋاسىن تەك كولىك لاستامايتىنىن ايتىپ وتىر.
— وعان كومىر جانە وتىنمەن جىلىتىلاتىن جەكە تۇرعىن ۇيلەر دە اسەر ەتەدى. سونداي-اق قاتتى جانە سۇيىق وتىن پايدالاناتىن نىسانداردان، سونىڭ ىشىندە مونشالار مەن قوعامدىق تاماقتانۋ ورىندارىنان، اسىرەسە كاۋاپحانالاردان شىعاتىن ءتۇتىن دە اۋانى لاستايدى، — دەدى باسقارما وكىلدەرى.
سونىمەن قاتار ەكولوگيا جانە قورشاعان ورتا باسقارماسىنىڭ ماماندارى الماتىنىڭ تابيعي ەرەكشەلىكتەرى دە اۋا ساپاسىنا اسەر ەتەتىنىن اتاپ ءوتتى. ولاردىڭ ايتۋىنشا، قالا ىلە الاتاۋىنىڭ بوكتەرىندە ورنالاسقان. قىستا، اسىرەسە جەلسىز كۇندەرى، تەمپەراتۋرالىق ينۆەرسيا قۇبىلىسى بايقالادى. ياعني، جىلى اۋا قاباتى زياندى شىعارىندىلاردىڭ جوعارى قاراي تارالۋىنا كەدەرگى كەلتىرەدى. سونىڭ سالدارىنان لاستاۋشى زاتتار اتموسفەرانىڭ تومەنگى قاباتىندا جينالىپ قالادى.
— الماتىداعى اۋا ساپاسىن جاقسارتۋ ءۇشىن ەكولوگيالىق تالاپتاردى كەزەڭ-كەزەڭىمەن ەنگىزۋ كوزدەلگەن. اتاپ ايتقاندا، 2025 -جىلى 30 -جەلتوقساندا بەكىتىلگەن اتموسفەرالىق اۋانى قورعاۋ قاعيدالارى لاستايتىن ستاتسيونارلىق كوزدەرگە باقىلاۋدى كۇشەيتۋدى، گاز تازارتۋ قوندىرعىلارىن پايدالانۋدى، سونداي-اق گاز تارتىلعان اۋدانداردا قاتتى جانە سۇيىق وتىن جاعۋدى شەكتەۋدى قاراستىرادى، — دەپ اتاپ ءوتتى ۆەدومستۆودان.
ەسكە سالايىق، اتموسفەرالىق اۋانى قورعاۋ قاعيدالارى بويىنشا بيىل الماتىدا شىعارىندىلارى تومەن ايماق (LEZ) پيلوتتىق رەجيمدە ىسكە قوسىلدى. ول بوگەنباي باتىر كوشەسى، اباي داڭعىلى، جەلتوقسان كوشەسى جانە دوستىق داڭعىلى شەكارالارىنداعى اۋماقتا قولدانىلىپ جاتىر.
كەيىن LEZ ايماعىنىڭ شەكتەۋلەرى مەن جۇمىس ءتارتىبى ءتۇسىندىرىلدى.
سونداي-اق بيىل 1-قىركۇيەكتەن باستاپ الماتىدا بەنزين، گاز جانە ديزەل وتىنىمەن جۇرەتىن اۆتوكولىكتەرگە ەكولوگيالىق نورماتيۆتەرگە سايكەستىگىن انىقتاۋ ءۇشىن تەحنيكالىق تەكسەرۋدەن ءوتۋ مىندەتتەلدى.