ينۆەستيتسيالىق دوڭگەلەك ۇستەلگە JPMorgan Chase, AstraZeneca, BP جانە Brookfield Asset Management كومپانيالارىن قوسا العاندا، 70-تەن استام كومپانيا، ينۆەستيتسيالىق قور، بانك جانە ساراپتامالىق ۇيىمداردىڭ وكىلدەرى قاتىستى. قاتىسۋشىلارعا Alatau City- ءدى دامىتۋ تۇجىرىمداماسى، قالانىڭ ينۆەستيتسيالىق مۇمكىندىكتەرى، پەرسپەكتيۆالى ينفراقۇرىلىمدىق جوبالار جانە ولاردى جۇزەگە اسىرۋعا شەتەلدىك كاپيتالدى تارتۋ تەتىكتەرى تانىستىرىلدى.
— روۋد-شوۋدى الەمدەگى جەتەكشى قارجى جانە قۇقىق ورتالىقتارىنىڭ ءبىرى — لوندوندا باستاۋىمىز كەزدەيسوق ەمەس. ۇلى بريتانيا — ءبىزدىڭ ستراتەگيالىق سەرىكتەسىمىز. Alatau City — پرەزيدەنت قاسىم-جومارت توقايەۆتىڭ باستاماسىمەن جۇزەگە اسىرىلىپ جاتقان ۇلتتىق جوبا. ءبىز ەۋروپا مەن ازيا اراسىنداعى ەكونوميكالىق ءوزارا ءىس-قيمىلدىڭ ماڭىزدى بۋىنىنا اينالۋعا ءتيىس بيزنەس، قارجى، تەحنولوگيا جانە لوگيستيكا سالالارىنىڭ جاڭا ورتالىعىن قۇرىپ جاتىرمىز، — دەدى قانات بوزىمبايەۆ.
دوڭگەلەك ۇستەل اياسىندا «Alatau City Authority» ارنايى باسقارۋ ۇيىمىنىڭ باس اتقارۋشى ديرەكتورى الىشەر ءابدىقادىروۆ قالانى دامىتۋدىڭ نەگىزگى باعىتتارىن، ونىڭ ىشىندە زاماناۋي ينجەنەرلىك جانە كولىك ينفراقۇرىلىمىن، ونەركاسىپتىك، ىسكەرلىك جانە لوگيستيكالىق ايماقتاردى قۇرۋ جوسپارلارىن تانىستىردى. Arup حالىقارالىق ينجەنەرلىك- كونسالتينگتىك كومپانياسى قاتىسۋشىلاردى كەڭىستىكتى جوسپارلاۋ جانە قالالىق ينفراقۇرىلىمدى دامىتۋ تاسىلدەرىمەن تانىستىردى. ال «بايتەرەك» حولدينگى ينۆەستيتسيالىق جوبالاردى قارجىلاندىرۋ قۇرالدارىن ۇسىندى.
Alatau City- ءدىڭ باستى ارتىقشىلىقتارىنىڭ ءبىرى — 2026 -جىلعى 8 -مامىرداعى كونستيتۋتسيالىق زاڭدا كوزدەلگەن ارناۋلى قۇقىقتىق رەجيم. ول انگليا مەن ۋەلس قۇقىعىنىڭ قاعيداتتارىن قولدانۋ مۇمكىندىگىن، ينۆەستيتسيالاردى قورعاۋدىڭ زاماناۋي تەتىكتەرىن جانە بولجامدى ىسكەرلىك ورتا قالىپتاستىرۋدى كوزدەيدى.
Norton Rose Fulbright, Reed Smith جانە Boies Schiller Flexner حالىقارالىق زاڭگەرلىك كومپانيالارىنىڭ قاتىسۋىمەن وتكەن ساراپتامالىق سەسسيادا ينۆەستيتسيا تارتۋدىڭ قۇقىقتىق تەتىكتەرى، مەملەكەتتىك- جەكەشەلىك ارىپتەستىك، حالىقارالىق تورەلىك، سيفرلىق اكتيۆتەردى رەتتەۋ جانە كوممەرتسيالىق داۋلاردى شەشۋ ماسەلەلەرى تالقىلاندى. سونداي-اق اعىلشىن قۇقىعىنىڭ قاعيداتتارىن قولدانۋعا نەگىزدەلگەن Alatau City- ءدىڭ مامانداندىرىلعان ينۆەستيتسيالىق سوتىن قۇرۋ پەرسپەكتيۆالارى قاراستىرىلدى.
ىسكەرلىك باعدارلاما اياسىندا لوندون قور بيرجاسىنىڭ، Brookfield Asset Management, Socىété Générale, J. P. Morgan جانە ەۋروپالىق قايتا قۇرۋ جانە دامۋ بانكىنىڭ باسشىلىعىمەن كەلىسسوزدەر جۇرگىزىلدى. تاراپتار ينستيتۋتسيونالدىق كاپيتال تارتۋ، جوبالىق قارجىلاندىرۋ قۇرالدارىن پايدالانۋ جانە حالىقارالىق قارجى ۇيىمدارىن قالانىڭ ەنەرگەتيكالىق، كولىك جانە ينجەنەرلىك ينفراقۇرىلىمىن دامىتۋعا قاتىستىرۋ مۇمكىندىكتەرىن قاراستىردى.
— ءىس-شارا قورىتىندىسى بويىنشا حالىقارالىق سەرىكتەستەرمەن جالپى ينۆەستيتسيالىق الەۋەتى $1,3 ميلليارد بولاتىن 9 كەلىسىمگە قول قويىلدى. كەلىسىمدەر ينفراقۇرىلىمدىق جانە ينۆەستيتسيالىق جوبالاردى قارجىلاندىرۋ، ءبىلىم بەرۋ جانە دەنساۋلىق ساقتاۋ ينفراقۇرىلىمىن دامىتۋ، سونداي- اق حالىقارالىق ىنتىماقتاستىقتى كەڭەيتۋ باعىتتارىن قامتيدى، — دەلىنگەن ۇكىمەت حابارلاماسىندا.
اتاپ ايتقاندا، University of ەxeter، Brighton College جانە Repton Group قاتىسۋىمەن ءبىلىم بەرۋ ۇيىمدارىن اشۋ جوبالارىن پىسىقتاۋ كوزدەلگەن. AstraZeneca جانە Crescent Meditours كومپانيالارىمەن ىنتىماقتاستىق مەديتسينالىق ينفراقۇرىلىمدى دامىتۋ، ينۆەستيتسيا تارتۋ جانە عىلىمي تاجىريبە الماسۋ ماسەلەلەرىن قامتيدى.
— قازىرگى ۋاقىتتا Alatau City- ءدىڭ ينۆەستيتسيالىق پورتفەلىندە جالپى قۇنى شامامەن $6,9 ميلليارد بولاتىن 67 جوبا بار. ولاردى جۇزەگە اسىرۋ ناتيجەسىندە 55 مىڭعا جۋىق جۇمىس ورنىن اشۋ كوزدەلگەن. سونىمەن قاتار قالادا ەنەرگيامەن، سۋمەن جانە گازبەن جابدىقتاۋ، كارىز جەلىلەرى مەن اۆتوموبيل جولدارىن دامىتۋعا باعىتتالعان 28 ينفراقۇرىلىمدىق جوبا بويىنشا جۇمىس ىستەلىپ جاتىر. بۇل ماقساتقا 35,3 ميلليارد تەڭگە بولىنگەن، - دەلىنگەن حابارلامادا.
ينۆەستيتسيالىق روۋد-شوۋ اياسىندا ۇلى بريتانيانىڭ مەملەكەتتىك ورگاندارى، قارجى ينستيتۋتتارى جانە ستراتەگيالىق سەرىكتەستەر وكىلدەرىمەن كەلىسسوزدەر جالعاسادى. ەۋروپالىق روۋد-شوۋدىڭ كەلەسى كەزەڭى گەرمانيادا وتەدى.
ايتا كەتەلىك Alatau City-دەگى يندۋستريالىق ايماقتار ءبىرىڭعاي ەكونوميكالىق جۇيەگە بىرىكتىرىلەدى.