Alatau City Authority جوبالاۋ جانە قۇرىلىس نورمالارى دەپارتامەنتىنىڭ ديرەكتورى تيمۋر تاشمۇحامبەتوۆتىڭ جوبالاۋىنشا، 2040 -جىلعا قاراي تۇرعىندار سانى شامامەن 1 ميلليون ادامعا جەتۋى مۇمكىن. ول مۇنى Powerexpo Almaty 2026 كورمەسى اياسىندا وتكەن «الماتى ەنەرگەتيكاسى: دامۋدىڭ 105 جىلى جانە جاڭا ءوسۋ نۇكتەلەرى» اتتى پلەنارلىق سەسسيادا مالىمدەدى.
ونىڭ ايتۋىنشا، قالانى دامىتۋعا جاۋاپتى ۇيىم الاتاۋدىڭ الداعى 5، 15 جانە 30 جىلداعى دامۋ باعىتتارىن ايقىندايتىن باس جوسپار ازىرلەۋگە كىرىسكەن. بۇل جۇمىسقا باس جوسپارلاۋ جانە تالداۋ سالاسىنداعى حالىقارالىق ساراپشىلار – ۇلى بريتانيانىڭ Arup كومپانياسى مەن سينگاپۋردىڭ BCG كومپانياسى تارتىلعان.
ول ماماندار قالانىڭ دامۋ جوسپارىن ازىرلەپ، وزىق دامۋ ورتالىعى رەتىندەگى مارتەبەسىن قامتاماسىز ەتۋ ءۇشىن قاجەتتى ينفراقۇرىلىمدىق قۋاتتاردى الدىن الا ەسەپتەپ جاتقانىن اتاپ ءوتتى.
- قالانىڭ اۆتونومياسى تۋرالى كونستيتۋتسيالىق زاڭ قابىلدانۋى دامۋىمىزعا ۇلكەن مۇمكىندىك بەرەدى. سونىمەن قاتار قالانىڭ الداعى دامۋ باعىتى ءۇشىن ۇلكەن جاۋاپكەرشىلىك جۇكتەيدى. ءبىزدىڭ ستراتەگيالىق ارتىقشىلىعىمىز - ينجەنەرلىك جانە ەلەكتر ينفراقۇرىلىمىن قالىپتاسىپ قويعان قۇرىلىسقا بەيىمدەۋگە تىرىسپاي، ونى الدىن الا جوسپارلاپ، سالۋىمىزدا. بۇل رەتتە قازىر ازىرلەنىپ جاتقان جوسپاردى باسشىلىققا الامىز، - دەدى تاشمۇحامبەتوۆ.
ونىڭ سوزىنشە، قاجەتتى ەنەرگەتيكالىق قۋات كولەمى بىرنەشە دامۋ سەناريى نەگىزىندە ەسەپتەلىپ جاتىر.
- ءبىز بىرنەشە سەناري ازىرلەدىك. قازىر جۇمىس ىستەپ جاتقانىمىز - قالانى دامىتۋدىڭ وپتيميستىك سەناريى. وعان سايكەس، 2040 -جىلعا قاراي قالاعا شامامەن 1 ميلليون ادام كەلۋى ءتيىس، - دەپ اتاپ ءوتتى تيمۋر تاشمۇحامبەتوۆ.
وسى بولجام نەگىزىندە ەلەكتر ەنەرگياسىن ءوندىرۋ مەن تاراتۋ جۇيەلەرىن، ەلەكتر جانە جىلۋ جەلىلەرىن، سۋمەن جابدىقتاۋ، سۋ دايىنداۋ جانە تازارتۋ نىساندارىن بىرىكتىرەتىن زاماناۋي ينفراقۇرىلىمدىق حابتار قۇرۋ جوسپارلانىپ وتىر.
- قالانى دامىتۋ كەزىندە ەنەرگيا ءوندىرۋ كوزدەرىن ءارتاراپتاندىرۋعا جانە وزىق ەلەكتر ينفراقۇرىلىمىن قۇرۋعا دا باسىمدىق بەرەمىز. ماقساتىمىز - قالانى جوسپارلاۋ كەزەڭىنەن باستاپ ونداعان جىل بويى سەنىمدى ءارى تۇراقتى ەنەرگيامەن جابدىقتاۋدى قامتاماسىز ەتۋ، - دەدى تاشمۇحامبەتوۆ.
ينفراقۇرىلىمنىڭ تەحنيكالىق شەشىمدەرىن ازىرلەۋ جانە جوبالاۋ ءۇشىن وڭتۇستىك كورەيا، قىتاي، اقش پەن ۇلىبريتانيانىڭ حالىقارالىق سەرىكتەستەرى تارتىلىپ جاتىر.
تيمۋر تاشمۇحامبەتوۆتىڭ ايتۋىنشا، كوماندا قۇرامىندا مۇناي، تاۋ-كەن جانە ينفراقۇرىلىم سالالارىنداعى حالىقارالىق جوبالاردا تاجىريبە جيناعان قازاقستاندىق ماماندار دا بار.
- قازىر جەرگىلىكتى قامتۋعا باسىمدىق بەرۋ ماسەلەسى پىسىقتالىپ جاتىر. ساتىپ الۋ جونىندەگى جەكە نورماتيۆتىك اكت ازىرلەنىپ جاتىر. وندا مۇمكىندىگىنشە جەرگىلىكتى ءوندىرىستى قولداۋعا باسىمدىق بەرەمىز. اڭگىمە الاتاۋ قالاسىنىڭ قاجەتتىلىكتەرىنە ساي جۇمىس ىستەيتىن جانە قالادا تىكەلەي اشىلاتىن كاسىپورىندار تۋرالى بولىپ وتىر، - دەدى ول.
ەسكە سالايىق، 21- 22-قازاندا الماتىدا Powerexpo Almaty 2026 حالىقارالىق ەنەرگەتيكالىق كورمەسى ءوتىپ جاتىر.
بۇعان دەيىن الاتاۋ قالاسىندا قانداي ينفراقۇرىلىمدىق جوبالار ىسكە اسىرىلىپ جاتقانى حابارلاندى.