الاكولدە جاعاجاي بار دا، جاعداي جوق

استانا. KAZINFORM - ەكى كۇن بۇرىن مەملەكەت باسشىسى ۇكىمەتكە تەز ارادا ەلدەگى بارلىق تۋريستىك باعىتتىڭ جاعدايىن رەتتەپ، ولقىلىق جىبەرگەن جاۋاپتىلاردى جازالاۋدى تاپسىردى. تۋريستىك ينفراقۇرىلىمنىڭ السىزدىگى مەن قىزمەت ساپاسىنىڭ تومەندىگى قازاقستانداعى تۋريزم سالاسىنىڭ ەڭ باستى ماسەلەسىنە اينالىپ وتىر. اتالعان جاعداي اسىرەسە ىشكى تۋريزمنىڭ ءىرى نۇكتەلەرىنىڭ ءبىرى سانالاتىن الاكولدە قاتتى بايقالادى.

- قازىر الەۋمەتتىك جەلىلەردى قاراپ وتىرساڭىز، تەك الاكول ەمەس، بالقاش سىندى سۋ ايدىندارىنا دا وتانداستارىمىز كوپتەپ بارىپ جاتىر. ءبىراق دەمالۋشىلار تاراپىنان قوناقۇيلەرگە قاتىستى شاعىم ءجيى تۇسەدى. قىزمەت ساپاسى مەن جايلىلىق جەتكىلىكسىز، - دەيدى «Kazakh Tourism» ۇلتتىق كومپانياسى جوبالاردى سۇيەمەلدەۋ دەپارتامەنتىنىڭ ديرەكتورى الىشەر تۇرسىن Jibek joly ارناسىنىڭ «بۇگىن LIVE» باعدارلاماسىنا بەرگەن سۇحباتىندا.

الاكول - ەلىمىزدىڭ ىشكى تۋريزمىندەگى باستى باعىتتاردىڭ ءبىرى. دەگەنمەن ينفراقۇرىلىم مەن قىزمەت ساپاسى جاعىنان ءالى دە كەنجە قالىپ تۇر. كوپتەگەن نىساندا اعىلشىن ءتىلىن بىلەتىن قىزمەتكەرلەر جوق، بۇل شەتەلدىك تۋريستەر ءۇشىن كەدەرگى.

- قوناق ۇيلەردىڭ كوبى قوناقجاي فورماتىندا، ياعني تەك قولجەتىمدى باعاداعى قاراپايىم قىزمەتتەر ۇسىنادى. حالىقارالىق دەڭگەيدەگى برەندتەر جوقتىڭ قاسى. قازىر ءبىز تايلاندتان ءبىر ءىرى قوناق ءۇي جەلىسىن شاقىرىپ وتىرمىز. ولار جەرگىلىكتى نارىقپەن تانىسىپ، فرانشيزالىق مودەل ەنگىزۋ بويىنشا ۇسىنىس بەرەدى. تايلاند تۋريزمىنىڭ ۇلگىسىن ەنگىزۋ ارقىلى جاعاجاي تۋريزمى دامىپ، شەتەلدىك تۋريستەردىڭ قىزىعۋشىلىعىن ارتتىرۋ كوزدەلىپ وتىر، - دەيدى سپيكەر.

بۇگىنگى تاڭدا ەلىمىزدە قوناق ۇيلەرگە جۇلدىز بەرۋ جۇيەسى تەك ۇسىنىمدىق سيپاتقا يە. بۇل ساپانى ناقتى باقىلاۋعا مۇمكىندىك بەرمەيدى.

فوتو: الىشەر تۇرسىننىڭ جەكە ارحيۆىنەن

- ەگەر زاڭنامالىق وزگەرىستەر قابىلدانسا، وندا قوناق ۇيلەردى جۇيەلى تۇردە تەكسەرىپ، ولاردىڭ جۇلدىزىن تومەندەتۋ نە مۇلدە الىپ تاستاۋ قۇقىعىنا يە بولار ەدىك. بۇل سالاداعى ساپانى كوتەرۋدىڭ بىردەن-ءبىر جولى، - دەدى الىشەر تۇرسىن.

قازاقستاندىقتار ىشكى تۋريستىك ايماقتاردى جاقسى بىلسە دە، ولارعا جەتۋ جولى ۇلكەن قيىندىق تۋدىرادى. ۇشاقپەن جەتۋ ءۇشىن بيلەت تابۋ قيىن، تەمىرجولدا - ۆاگون تاپشىلىعى.

- بيىل بۇل باعىتتا ءبىراز ىلگەرىلەۋ بار. استانا - ءۇشارال جانە الماتى - ءۇشارال باعىتتارىنا كولىك مينيسترلىگى تاراپىنان 6,5 ميلليارد تەڭگە سۋبسيديا ءبولىندى. قازىر اپتاسىنا 7 رەيس تۇراقتى تۇردە ۇشادى. تەمىرجول سالاسىندا دا وڭ وزگەرىستەر بار. 11-شىلدەدەن باستاپ استانادان بۋرابايعا قاتىنايتىن جاڭا «Burabay Express» ەلەكتر پويىزى ىسكە قوسىلدى. جولاۋشىلارعا قولايلى جاعداي جاسالعان. وسىنداي پويىزداردى الداعى ۋاقىتتا الاكول باعىتىنا دا قويۋدى جوسپارلاپ وتىرمىز، - دەيدى دەپارتامەنت ديرەكتورى.

جاز ايلارىندا قازاقستاندىقتار نەگىزىنەن الاكول، بالقاش، الماتىنىڭ تاۋ كلاستەرى، سايرام-وگەم ۇلتتىق پاركى مەن كاسپي تەڭىزىنىڭ جاعالاۋىنا ءجيى بارادى ەكەن.

- ال شەتەلدىك تۋريستەر الماتى، استانا قالالارىنا، سونداي-اق اقمولا مەن ماڭعىستاۋ وبلىستارىنا كوبىرەك كەلەدى. ىسكەرلىك تۋريزم بويىنشا اتىراۋ وبلىسى ءجيى تاڭدالادى، - دەيدى الىشەر تۇرسىن.

قازىرگى تاڭدا پرەزيدەنت اكىمشىلىگى باسشىسىنىڭ ورىنباسارى باستاعان ارنايى كوميسسيا الاكول وڭىرىندە ىسساپارمەن ءجۇر. ولار تۋريستىك باعىتتىڭ ينفراقۇرىلىمىن، كولىك قاتىناسىن، قىزمەت كورسەتۋ جاعدايىن ساراپتاپ جاتقان كورىنەدى.

- تۋريزمدى دامىتۋعا مەملەكەتتىك دەڭگەيدە كوڭىل ءبولىنىپ جاتىر. ءبىراق ناقتى ناتيجەگە جەتۋ ءۇشىن زاڭناما، قىزمەت ساپاسى مەن ينفراقۇرىلىم قاتار دامۋى كەرەك، - دەپ تۇيىندەدى ستۋديا قوناعى.

ايتا كەتەيىك، «AMANAT» پارتياسى جاقىندا تاۋ تۋريزمىن دامىتۋ جوباسىن ىسكە قوستى.

ودان بولەك، تۋريزم جانە سپورت مينيسترلىگى 2026 -جىلدان باستاپ ۇيالى دەرەكتەر نەگىزىندە سيفرلىق ستاتيستيكاعا كوشپەك.

اۆتور

ارۋجان ماحمۋت