الاكولدە دەمالۋ شەتەلدەن قىمبات پا - اكىم جاۋاپ بەردى

تالدىقورعان. KAZINFORM - جەتىسۋ وبلىسى الاكول اۋدانىنىڭ اكىمى الماس ءابدينوۆ الاكولدەگى دەمالىس قۇنى تۋرالى پىكىر ءبىلدىردى.

اۋدان اكىمى الەۋمەتتىك جەلىدە تاراعان «مىسىردا دەمالۋ وتاندىق كۋرورتقا قاراعاندا ارزان» دەگەن پىكىرگە قاتىستى ويىن ايتتى.

- بۇل -نارىق. بىرەۋ مىسىرعا بارادى. بۇل - ولاردىڭ تاڭداۋى. مۇمكىن ورىندى دا شىعار. ءبىراق مەن الاكولدە دەمالۋ قىمباتىراق دەپ ايتا المايمىن. ءبارى قىزمەت كورسەتۋ دەڭگەيى مەن دەمالۋشىلاردىڭ قالاۋىنا بايلانىستى. ءيا، بىزدە قىزمەت ساپاسىنا قاراي باعاسى جوعارى دەمالىس ورىندارى بار، ءبىراق ءۇش مەزگىل تاماعىمەن كۇنىنە 17- 20 مىڭ تەڭگە بولاتىن قولجەتىمدى ورىندار دا جوق ەمەس. تاۋلىگىنە 100 مىڭ تەڭگەدەن اساتىن نومىرلەر دە بار - بۇل باسقا سانات. جالپى باعا 15 مىڭ تەڭگەدەن 300 مىڭ تەڭگەگە دەيىن وزگەرەدى. بىرەۋگە بۇل قىمبات كورىنۋى مۇمكىن، ال بىرەۋ ءۇشىن ورىندى. ءيا، قىمبات قوناقۇيلەر بار، ءبىراق ولاردىڭ باعا قويۋىنا تىيىم سالا المايمىز. مۇمكىن ەل بويىنشا بەلگىلى ءبىر باعا ساياساتى نەمەسە نورماتيۆتەر ازىرلەۋ قاجەت بولار. ازىرگە بۇل - نارىق. قاراساڭىز، ءتىپتى قىمبات قوناقۇيلەردە دە بوس ورىن جوق، - دەدى الماس ءابدينوۆ.

سونىمەن قاتار اكىم ءۇشارال اۋەجايى مەن تەمىرجول ۆوكزالىنان اقشي جانە كوكتۇما كۋرورتتىق ايماقتارىنا دەيىنگى تاكسي باعاسىنىڭ قىمباتتاۋىنا شاعىمدانعان تۋريستەردىڭ پىكىرىنە دە توقتالدى. ونىڭ ايتۋىنشا، ماسەلەنى شەشۋ ءۇشىن اقشي اۋىلىنان تۇراقتى اۆتوبۋس باعىتىن ىسكە قوسۋعا سۋبسيديا بولىنگەن، قازىر كونكۋرس وتكىزىلىپ جاتىر. ودان بولەك ءبىرقاتار قوناقۇيلەر مەن دەمالىس ورىندارى قوناقتارىن جەتكىزۋ قىزمەتىن ۇيىمداستىرادى - بۇل دا ولاردىڭ قىزمەت باعاسىنا اسەر ەتەدى.

- تاكسي ماسەلەسى راسىندا كۇردەلى. مەن تاكسي جۇرگىزۋشىلەرىمەن دە سويلەستىم. ءارقايسىسىنىڭ ايتارى ءارتۇرلى. ولارعا «جول جاقسى، بەنزين دە قىمباتتاپ جاتقان جوق» دەيمىن. ءبىراق ءبارى قايتادان نارىقتىق قاتىناستارعا تىرەلەدى. ولاردىڭ رەسمي تىركەلگەن- تىركەلمەگەنىن سۇرايمىن - بۇل كەزدە جاۋاپتان جالتارىپ كەتەدى. بۇل ماسەلەمەن اينالىسىپ جاتىرمىز. ءوز تاراپىمىزدان باقىلاۋ جۇرگىزەمىز، - دەدى اۋدان اكىمى.

ەسكە سالايىق، بۇعان دەيىن الاكولدەگى قاۋىپسىزدىك پەن سانيتاريا ماسەلەسى ۇكىمەت دەڭگەيىندە قارالاتىنىن جازعانبىز.

سونداي-اق قازاقستان مەن ازەربايجان الاكولدە شيپاجاي كەشەنىن سالاتىنىن جازعان ەدىك.