الاكولدە العاش رەت امبەباپ قۇتقارۋ بولىمشەسى اشىلدى

استانا. KAZINFORM - الاكول كۋرورتتىق ايماعىندا شومىلۋ ماۋسىمى قارساڭىندا العاشقى امبەباپ قۇتقارۋ بولىمشەسى ىسكە قوسىلدى.

اشىلۋ راسىمىنە توتەنشە جاعدايلار ءمينيسترى شىڭعىس ءارىنوۆ پەن اباي وبلىسىنىڭ اكىمى بەرىك ءۋالي قاتىستى. ءىس-شاراعا جەرگىلىكتى تۇرعىندار دا جينالدى.

جاڭا بولىمشە ەكى جۇزدەن استام دەمالىس ايماعىنىڭ قاۋىپسىزدىگىن قامتاماسىز ەتەدى. جىل سايىن الاكولگە ونداعان مىڭ تۋريست كەلەدى. بۇل فورمات ءوڭىر ءۇشىن جاڭا - بۇعان دەيىن مۇنداي كەشەندى قۇتقارۋ قىزمەتى بولماعان.

- بۇل نىسان دەمالۋشىلاردىڭ قاۋىپسىزدىگىن كۇشەيتىپ، تۋريستىك ينفراقۇرىلىمدى دامىتۋعا سەرپىن بەرەدى. قاۋىپسىزدىك جوعارى بولعان سايىن، ىشكى تۋريزم دە قارقىندى داميدى، - دەدى شىڭعىس ءارىنوۆ.

قۇتقارۋ بولىمشەسى تولىق قاجەتتى تەحنيكامەن جابدىقتالعان. قىزمەت تاۋلىك بويى ۇيىمداستىرىلادى. قۇتقارۋشىلارعا ارنايى اۆتوكولىكتەر، كاتەر جانە جول تالعامايتىن تەحنيكا بەرىلگەن. عيماراتتا قىزمەتكەرلەردىڭ جۇمىس ىستەۋى مەن دەمالۋىنا بارلىق جاعداي جاسالعان.

بولىمشە تەك جاز مەزگىلىندە عانا ەمەس، قىسقى كەزەڭدە دە جۇمىس ىستەيدى، سەبەبى بۇل ۋاقىتتا دا توتەنشە جاعدايلار تۋىنداۋى مۇمكىن.

سالتاناتتى ءراسىم بارىسىندا ۇزدىك قىزمەتكەرلەر ماراپاتتالىپ، ءىس- شارا سوڭىندا قاتىسۋشىلار اعاش كوشەتتەرىن وتىرعىزدى.