«الاكول» قورىعىنىڭ بىرنەشە باسشىسى پارا الدى دەپ سوتتالدى

استانا. KAZINFORM - «الاكول مەملەكەتتىك تابيعي قورىعى» ر م م ديرەكتورى سوتتالدى، دەپ حابارلايدى انتيكور.

- جەتىسۋ وبلىسىندا الاكول اۋداندىق سوتىمەن ەكولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتىنىڭ «الاكول مەملەكەتتىك قورىعى» ر م م ديرەكتورى ق.ءابىلقاسىموۆ، ونىڭ ورىنباسارى ن. بەيسەنوۆ جانە ءبولىم باسشىسى ر. شالاپانوۆ سوتتالدى. ولار قىزمەت كورسەتىلەتىن اۋماقتا زاڭسىز ءشوپ شابۋ بويىنشا اكىمشىلىك جاۋاپكەرشىلىككە تارتپاعانى ءۇشىن جەرگىلىكتى تۇرعىنداردان الدىن الا ءسوز بايلاسۋ ارقىلى ادامدار توبىندا بىرنەشە رەت پارا العانى ءۇشىن كىنالى دەپ تانىلدى. ابىلقاسىموۆ پەن شالاپانوۆتىڭ ءارقايسىسىنا 10,5 ميلليلن تەڭگە، ال بەيسەنوۆكە 15,7 ميلليون تەڭگە كولەمىندە ايىپپۇل سالىندى. وسى ۇكىممەن، الاكول اۋدانىنىڭ تۇرعىندارى و. بۋلگۋنچينوۆ مەن ك. كاناگاتوۆ اتالمىش لاۋازىمدى تۇلعالارعا پارا بەرگەنى ءۇشىن سايكەسىنشە 6 ميلليون تەڭگە جانە 2,2 ميلليون تەڭگە ايىپپۇلعا سوتتالدى، - دەلىنگەن انتيكور حابارلاماسىندا.

سونىمەن قاتار، سوتتالعاندارعا ءومىر بويى مەملەكەتتىك قىزمەتتە جانە كۆازيمەملەكەتتىك سەكتوردا قىزمەت اتقارۋعا تىيىم سالىنادى.

سوت ۇكىمى زاڭدى كۇشىنە ەندى.