جالپى كەيىنگى 20 جىلدا ەلدەگى حالىق سانى 5 ميلليونعا ءوستى. الداعى جىلدارعا بولجام قانداي؟ بۇل تۋرالى 24KZ حابارلايدى.
كەيىنگى 20 جىلدا ەل حالقى 5 ميلليونعا ءوستى. ماسەلەن، 2006 -جىلى ەلدە 15 ميلليون 200 مىڭ ادام تۇرسا، بيىل 20 ميلليون 500 مىڭعا جەتتى. الداعى جىلدارى وتانداستارىمىزدىڭ قاتارى تاعى ارتادى. ەڭبەك رەسۋرستارىن دامىتۋ ورتالىعىنىڭ مالىمەتىنە سۇيەنسەك، ەندى 10 جىلدا، ياعني 2046 -جىلعا قاراي 24 ميلليوننان اسادى دەگەن بولجام بار. «اۋىل مەن قالا حالقىنىڭ اراسىنداعى كورسەتكىش تە وزگەرەدى»، - دەيدى ماماندار. قازىر ەل تۇرعىندارىنىڭ 64 پايىزى شاھارلاردا شوعىرلانعان. اۋىلدىڭ ۇلەسى - 36 پايىز. تاياۋ جيىرما جىلدا مەگاپوليستەر مەن ولارعا جاقىن وبلىستارداعى ادام سانى كوبەيەدى. سونىڭ ەسەبىنەن استانا حالقى ەكى ەسە وسەدى.
ماديار الدياروۆ، «ەڭبەك رەسۋرستارىن دامىتۋ ورتالىعى» ا ق دەپارتامەنتى ديرەكتورىنىڭ ورىنباسارى:
- الداعى 20 جىلدا نەگىزگى حالىقتىڭ سانىنىڭ ءوسىمى ءىرى قالالار، مەگاپوليستەر، ياعني استانا، الماتى، شىمكەنت قالالارى ەسەبىنەن بولاتىن بولادى. بۇلاردا، جالپى، مىسالى، استانا قالاسىندا حالىق سانى، ونىڭ ىشىندە ەڭبەككە، ەڭبەككە قابىلەتتى جاستاعى حالىقتىڭ سانى ەكى ەسە وسەدى. ال الماتى مەن شىمكەنت قالالارىندا ءبىر جارىم ەسەگە دەيىن ءوسۋى مۇمكىن. قازىر جەر- جاھاندا ۋرباندالۋ ۇدەرىسى ءجۇرىپ جاتىر.
دەگەنمەن ماماننىڭ ايتۋىنشا، بۇل قۇبىلىستىڭ باتىس وڭىرلەرگە قاتىسى جوق. ماسەلەن، اتىراۋ مەن ماڭعىستاۋ وبلىستارىندا اۋىل حالقىنىڭ قاراسى ارتىپ كەلەدى. سونداي-اق وڭتۇستىك ايماقتاردا دا تۋۋ كورسەتكىشى ءولىم-جىتىمنەن ارتىق. وسىعان ساي ەڭبەككە قابىلەتتى جاستاعى ادام دا كوبەيگەن.
ماديار الدياروۆ، «ەڭبەك رەسۋرستارىن دامىتۋ ورتالىعى» ا ق دەپارتامەنتى ديرەكتورىنىڭ ورىنباسارى:
- قازىرگى كەزدە 11,8 ميلليون، ياعني حالىق سانىنىڭ 57 پايىزى. جالپى، بىزدە باسقا ەلدەرمەن سالىستىرعاندا حالىقتىڭ جاسى سالىستىرمالى تۇردە جاس. 2036 -جىلعا قاراي ەڭبەككە قابىلەتتى جاستاردىڭ سانى 13 ميلليونعا، ال 2046 -جىلعا قاراي 14 ميلليونعا جەتەدى دەپ جوسپارلانۋدا.
ەلىمىز كورشى ماڭداعى كەيبىر ەلدەرمەن سالىستىرعاندا جاستاۋ كەلەدى. ورتاشا كورسەتكىش - 32 جاس. بۇل - ەكونوميكانىڭ العا باسۋى ءۇشىن ماڭىزدى فاكتور. اسىرەسە وڭتۇستىك، باتىس پەن ورتالىقتا جۇمىس كۇشى كوپ. ۇكىمەت بۇل كۇشتى شىعىس پەن سولتۇستىككە كوشىرۋگە كۇش سالىپ وتىر. ياعني ءتيىستى شارالار وڭتۇستىكتەگى جۇمىسسىزدىقتى جويىپ، سولتۇستىكتەگى كادر تاپشىلىعىن شەشۋگە ءتيىس.