قازاقستاننىڭ سولتۇستىك-باتىسىندا اۋا رايى بۇزىلسا، ال وڭتۇستىكتە، كەرىسىنشە، شىلىڭگىر ىستىق بولادى.
- باتىس سيكلونى قازاقستان اۋماعىنىڭ باسىم بولىگىندەگى اۋا رايىنا ءالى دە اسەرىن ساقتاپ، تۇراقسىز اۋا رايىن قالىپتاستىرادى. سيكلوننىڭ ورتالىعى ەلىمىزدىڭ سولتۇستىك-باتىسىندا بولادى. وسىعان بايلانىستى مۇندا جاڭبىر جاۋىپ، نايزاعاي وينايدى. جەل كۇشەيىپ، داۋىلعا اينالۋى جانە بۇرشاق جاۋۋى مۇمكىن،-دەلىنگەن حابارلامادا.
مەكەمە مالىمەتىنشە، 11-13-ماۋسىم كۇندەرى قوستاناي جانە اقتوبە وبلىستارىندا، ال 11-ماۋسىمدا الماتى وبلىسى مەن جەتىسۋ وبلىسىنىڭ تاۋلى جانە تاۋ بوكتەرىندەگى اۋداندارىندا شەلەكتەپ جاڭبىر جاۋادى.
كۇندىز ەلىمىزدىڭ وڭتۇستىگىندە اۋا تەمپەراتۋراسى 35° c- تان 40° c قا دەيىن، وڭتۇستىك-شىعىسىندا 30° c تان 37° c قا دەيىن كوتەرىلىپ، اپتاپ ىستىق بولادى.
ال باسقا ايماقتاردا اۋا تەمپەراتۋراسى ءبىر قالىپتى ساقتالىپ، ايتارلىقتاي وزگەرىس بولجانىپ وتىرعان جوق.
ايتا كەتەيىك، بۇعان دەيىن وسكەمەن مەن سەمەي قالالارىندا اۋا ساپاسى ناشارلايتىنىن جازعانبىز.