بۇل تۋرالى ىشكى ىستەر مينيسترلىگى اقپاراتتىق ساياسات دەپارتامەنتىنىڭ باسقارما باستىعى شۇعىلا تۇرلىبەك 24KZ تەلەارناسىنا بەرگەن سۇحباتىندا ايتتى. مينيسترلىك وكىلىنىڭ سوزىنشە، كەيىنگى بەس جىلدا مال ۇرلىعى تۇراقتى تۇردە ازايىپ كەلەدى. دەگەنمەن كۇزگى- قىسقى كەزەڭدە مال يەلەرىنىڭ ساقتىق شارالارىن كۇشەيتكەنى ماڭىزدى.
پوليتسيا جول بويىنداعى بەكەتتەردە مال تيەلگەن كولىكتەردى تەكسەرىپ، اۋىلدىق جەرلەردە ۋچاسكەلىك ينسپەكتورلار ۆەتەرينارلارمەن بىرلەسىپ جۇمىس ىستەيدى. مال ۇرلىعىنىڭ الدىن الۋدا ءتورت تۇلىكتى تاڭبالاۋ، ەن سالۋ جانە چيپتەۋ ماڭىزدى ءرول اتقارادى. ويتكەنى مالدىڭ يەسى انىق كورسەتىلمەسە، ونى تاپقان كۇننىڭ وزىندە كىمگە تيەسىلى ەكەنىن دالەلدەۋ قيىنعا سوعۋى مۇمكىن. مال يەسى ەڭ الدىمەن ءوز تۇلىگىن تاڭبالاپ، ەن سالۋى كەرەك.
قازىر جاقسى ناتيجە بەرەتىن تاسىلدەردىڭ ءبىرى - چيپتەۋ. ماسەلەن، وتكەن جىلى اباي وبلىسىندا ۇرلانعان مالدى گازەل كولىگىمەن تاسىمالداپ بارا جاتقاندا پاترۋلدىك پوليتسيا توقتاتقان. قىزمەتكەرلەردىڭ پلانشەتى ارقىلى مالعا سالىنعان چيپ تەكسەرىلىپ، ونىڭ كىمگە تيەسىلى ەكەنى انىقتالدى. وسىلايشا ۇرلىقتىڭ بەتى اشىلدى، - دەدى شۇعىلا تۇرلىبەك.
مال يەلەرى ءتورت تۇلىگىن ساتاتىن كەزدە دە ءتيىستى قۇجاتتاردى راسىمدەۋى قاجەت. ول ءۇشىن ۆەتەرينار مەن ۋچاسكەلىك پوليتسيا ينسپەكتورىنان مالدىڭ تاڭباسى بارىن جانە زاڭدى يەسىنە تيەسىلى ەكەنىن راستايتىن انىقتاما الۋ كەرەك. بۇل مالدى تاسىمالداۋ كەزىندە دە زاڭدىلىعىن دالەلدەۋگە مۇمكىندىك بەرەدى. سونىمەن قاتار پوليتسيا جوعالعان مال تۋرالى حاباردى كەشىكتىرمەۋگە شاقىرادى. ويتكەنى ۋاقىت وتكەن سايىن ۇرلانعان مالدى باسقاعا ساتىپ جىبەرۋى نەمەسە سويىپ تاستاۋى مۇمكىن. ال جوعالعان ءار مال مىندەتتى تۇردە ۇرلىققا بايلانىستى بولا بەرمەيدى. كەيدە قاراۋسىز جايىلعان ءتورت تۇلىك اداسىپ كەتەدى، جىرتقىشتارعا جەم بولادى نەمەسە قىسقى ايازدا، مۇز استىندا قالىپ قويادى. سوندىقتان مال يەلەرى مۇنداي جاعدايلاردىڭ الدىن الۋ ءۇشىن دە باقىلاۋدى كۇشەيتۋى كەرەك.
مال ۇرلىعى ءۇشىن جاۋاپكەرشىلىك 2019 -جىلى كۇشەيتىلدى. قىلمىستىق كودەكسكە ارنايى 188-باپ ەنگىزىلدى. جاسالعان ارەكەتتىڭ اۋىرلىعىنا قاراي جازا تاعايىندالادى. ەگەر قىلمىس ۇيىمداسقان توپپەن جاسالسا نەمەسە كوپ مولشەردە مال ۇرلانسا، مۇلكى تاركىلەنىپ، 12 جىلعا دەيىن باس بوستاندىعىنان ايىرۋ جازاسى قاراستىرىلعان، - دەدى ءى ءى م وكىلى.
مينيسترلىكتە مال ۇرلىعىنا قارسى ءىس-قيمىل بويىنشا ارنايى ۆەدومستۆولىق باعدارلاما جۇمىس ىستەيدى. ونىڭ اياسىندا ءار وڭىردەگى قىلمىس جاعدايى تالدانىپ، سوعان قاراي رەيدتەر مەن جەدەل- پروفيلاكتيكالىق شارالار ۇيىمداستىرىلادى. بۇل جۇمىسقا ۋچاسكەلىك ينسپەكتورلارمەن قاتار پاترۋلدىك پوليتسيا مەن جەدەل ۋاكىلدەر دە تارتىلادى. بۇدان بولەك، ءىرى قالالارداعى ەت جانە مال بازارلارىندا تەكسەرۋ جۇرگىزىلەدى.