سونداي-اق رەيتينگتە مەحيكو، چيكاگو، دۋبلين جانە نيۋ-يورك پەن پاريج قالالارى دا بار. بۇگىندە الەمنىڭ 30-دان اسا ەلىندە، دالىرەك ايتقاندا 218 قالادا كولىكتەردىڭ لەگىن جاساندى ينتەللەكت رەتتەيدى. ينتەللەكتۋالدى باعدارلامانى «سيدنەي جول قوزعالىسىن باسقارۋ جۇيەسى» دەپ تە اتايدى. جوبا اۆستراليانىڭ جاڭا وڭتۇستىك ۋەلس شتاتىندا ازىرلەنگەن. جۇيە جەكە باعدارشامداردى عانا ەمەس، قالاداعى بۇكىل قوزعالىستى ۇيلەستىرىپ باسقارۋعا مۇمكىندىك بەرەدى. سونىڭ ناتيجەسىندە جۇرگىزۋشىلەر بىرنەشە باعدارشامنان توقتاماي وتە الادى.
جالپى «اقىلدى» باعدارشامدار، داتچيكتەر، بولجاۋ جۇيەلەرى كەپتەلىستى 20-25 پايىز ازايتاتىنىن كورسەتكەن. تاعى ءبىر ارتىقشىلىعى - قوعامدىق كولىك پەن جادەل جاردەم قىزمەتىنە باسىمدىق بەرىلەدى. ماسەلەن، اۆتوبۋس جاقىنداعاندا باعدارشامنىڭ قىزىل ءتۇسى دەرەۋ جاسىلعا اۋىسادى. مۇنداي تاجىريبە ۇلى بريتانيا، نيدەرلاند، شۆەيساريادا بار. «بۇل قوعامدىق كولىكتىڭ ءجۇرۋ ۋاقىتىن قىسقارتادى»، - دەيدى ماماندار.
ا ق ش، كانادا، قىتاي جانە اۋستراليادا كەرى قوزعالىس جۇيەسى جۇمىس ىستەيدى. ياعني جولاقتاردىڭ باعىتى تاۋلىكتىڭ ۋاقىتىنا قاراي وزگەرەدى. تاڭەرتەڭ كولىكتەر قالا ورتالىعىنا اعىلسا، جولاق وسى باعىتقا قاراي اشىلادى. جۇمىس ۋاقىتى اياقتالىپ، جۇرگىزۋشىلەر ۇيلەرىنە قايتقاندا، قوزعالىس كەرى اۋىسادى. جۇيە ەلەكتروندى جول بەلگىلەرى ارقىلى باسقارىلادى. جاسىل جول بەلگىسى - جولاق اشىق، ال قىزىلى قوزعالىسقا تىيىم سالىنعانىن بىلدىرەدى. بۇل جاڭا جول سالماي، قولدانىستاعى ينفراقۇرىلىمدى پايدالانىپ، كەپتەلىستى ازايتۋعا مۇمكىندىك بەرەدى. الايدا جۇرگىزۋشىلەر ەلەكتروندى بەلگىلەرگە مۇقيات بولۋعا ءتيىس. ويتپەگەن جاعدايدا، قارسى باعىتتاعى كولىكپەن سوقتىعىسۋى مۇمكىن.
گەرمانيا مەن ا ق ش- تىڭ ءىرى قالالارىندا «Park and Ridе»، ياعني كولىكتى تۇراققا قويىپ، قوعامدىق كولىكپەن ءجۇرۋ» جۇيەسى ىسكە قوسىلدى. ياعني مەترو ستانسالارى مەن اۆتوبۋستىڭ سوڭعى ايالدامالارىنىڭ جانىنان اۆتوتۇراقتار سالىنعان. سىرتتان كەلەتىن جۇرگىزۋشىلەر تەمىر تۇلپارلارىن سول جەرگە قالدىرادى. ال شاھار ورتالىعىنا قوعامدىق كولىكپەن قاتىنايدى. قولايلىسى سول، اۆتوتۇراق تەگىن. مامانداردىڭ ايتۋىنا قاراعاندا، بۇل ماڭايداعى اۋىلداردان اعىلعان كولىكتەردىڭ ءجۇرىسىن ازايتادى. جالپى ساراپشىلار كولىك كەپتەلىسىن رەتتەۋ ءۇشىن كەشەندى شەشىمدەر قاجەت ەكەنىن ايتادى.
24.kz