بۇل تۋرالى ب ۇ ۇ-نىڭ جاڭالىقتار قىزمەتى حابارلادى.
مۇنداي مىندەتتەمەلەر ب ۇ ۇ باس اسسامبلەياسىنىڭ پاندەميالاردىڭ الدىن الۋ، وعان دايىندىق جانە دەن قويۋ ماسەلەلەرى جونىندەگى ەكىنشى جوعارى دەڭگەيدەگى وتىرىسىندا ايتىلدى. كەزدەسۋدە 2023-جىلى وتكەن العاشقى جيىننان بەرگى ناتيجەلەر قارالدى.
ەلدەر سوڭعى ءۇش جىلدا پاندەميا ءقاۋپىن انىقتاۋ، وعان دايىندالۋ جانە دەن قويۋدىڭ جاھاندىق جۇيەسىن نىعايتۋ باعىتىندا ىلگەرىلەۋ بولعانىن اتاپ ءوتتى. وسى كەزەڭدە د د ۇ- نىڭ پاندەميا جونىندەگى كەلىسىمى قابىلدانىپ، 2005-جىلعى حالىقارالىق مەديتسينالىق-سانيتاريالىق ەرەجەلەرگە وزگەرىستەر ەنگىزىلدى.
سونىمەن قاتار ەپيدەميالار مەن پاندەميالاردى باقىلاۋ، قوزدىرعىشتارمەن الماسۋ، ۆاكتسينالار، ءدارى-دارمەك پەن دياگنوستيكالىق قۇرالداردى جەرگىلىكتى جەردە ءوندىرۋ باعىتىنداعى مۇمكىندىكتەر كەڭەيتىلدى.
د د ۇ باس ديرەكتورى تەدروس ادحانوم گەبرەيەسۋس قول جەتكىزىلگەن ناتيجەلەردى ساقتاپ، بولاشاقتاعى دەنساۋلىققا تونەتىن قاۋىپتەرگە دايىندىقتى كۇشەيتۋ ءۇشىن تۇراقتى ءىس-قيمىل مەن ينۆەستيتسيا قاجەت ەكەنىن ايتتى.
ونىڭ مالىمەتىنشە، COVID-19 پاندەمياسى 2020-2023 -جىلدارى الەمدە 20 ميلليوننان استام ارتىق ولىمگە سەبەپ بولىپ، جاھاندىق ەكونوميكاعا 10 تريلليون دوللاردان استام شىعىن كەلتىرگەن.
سونداي-اق مەملەكەتتەر پاندەميا جونىندەگى كەلىسىمگە پاتوگەندەرگە قول جەتكىزۋ جانە ودان تۇسەتىن پايدانى ءادىل ءبولۋ جۇيەسىن (PABS) ەنگىزەتىن قوسىمشا حاتتاما بويىنشا كەلىسسوزدەردى اياقتاۋ قاجەتتىگىن اتاپ ءوتتى.
ۇسىنىلىپ وتىرعان جۇيە پاندەميالىق الەۋەتى بار قوزدىرعىشتارمەن جەدەل الماسۋعا، سونداي- اق سونىڭ ناتيجەسىندە ازىرلەنگەن ۆاكسينالار، ءدارى-دارمەك، دياگنوستيكالىق جانە باسقا دا مەديتسينالىق ونىمدەردى ءادىل بولۋگە مۇمكىندىك بەرمەك.
قوسىمشا حاتتامانى 2027 -جىلعى مامىردا وتەتىن دۇنيەجۇزىلىك دەنساۋلىق ساقتاۋ اسسامبلەياسىندا قابىلداۋ جوسپارلانىپ وتىر.
جيىندا بولاشاق پاندەميالاردىڭ الدىن الۋ مەن ولارعا دەن قويۋدا حالىقارالىق ىنتىماقتاستىقتىڭ، ءتوزىمدى دەنساۋلىق ساقتاۋ جۇيەلەرىنىڭ جانە ادام، جانۋارلار مەن قورشاعان ورتا دەنساۋلىعىن ءوزارا بايلانىستىراتىن «ءبىرتۇتاس دەنساۋلىق» ءتاسىلىنىڭ ماڭىزى دا اتاپ ءوتىلدى.
ايتا كەتەيىك، بۇۇ يزرايل قونىستارىمەن بايلانىستى كومپانيالار ءتىزىمىن جاڭارتتى.
سونداي-اق ەردوعان بۇۇ مىنبەرىنەن الەم ەلدەرىن پالەستينانى مويىنداۋعا شاقىرعانىن جازدىق.