ماماندار ينتەرنەتتى شامادان تىس پايدالانۋ دەگەندە الەۋمەتتىك جەلىلەرگە، ونلاين ويىندارعا، قۇمار ويىندارعا، ينتەرنەت- دۇكەندەرگە جانە باسقا دا سيفرلىق قىزمەتتەرگە باقىلاۋسىز اۋەستەنۋدى ايتىپ وتىر.
ماسەلە ينتەرنەتتە قانشا ۋاقىت وتكىزۋدە عانا ەمەس. ەگەر ادامنىڭ جەلىدەگى ارەكەتتەرى ۇيقىسىنا، وقۋىنا، جۇمىسىنا، وتباسىلىق قارىم-قاتىناسىنا نەمەسە كۇندەلىكتى ومىرىنە كەدەرگى كەلتىرسە، ونى پروبلەمالىق پايدالانۋ دەپ قاراستىرۋعا بولادى.
ساراپشىلار مۇنداي ادەتتەر مازاسىزدىق، دەپرەسسيا، ۇيقىنىڭ بۇزىلۋى جانە جالعىزدىق سياقتى ماسەلەلەرمەن قاتار كەزدەسەتىنىن انىقتاعان. سونداي-اق ينتەرنەتتى باقىلاۋسىز پايدالانۋ وقۋ مەن جۇمىس ونىمدىلىگىنىڭ تومەندەۋىمەن جانە ادامدار اراسىنداعى قارىم-قاتىناستىڭ ناشارلاۋىمەن بايلانىستى بولۋى مۇمكىن.
اسىرەسە جاستار، پسيحيكالىق دەنساۋلىعىندا قيىندىقتارى بار ادامدار جانە تابىسى تومەن ەلدەردىڭ تۇرعىندارى وسىنداي ماسەلەلەرگە كوبىرەك تاپ بولۋى ىقتيمال.
ءبىر قىزىعى، ساراپشىلار ماسەلەنىڭ سەبەبىن تەك ادامنىڭ ءوزىن- ءوزى باسقارا الماۋىنان ىزدەۋگە بولمايتىنىن ايتادى. ولاردىڭ پىكىرىنشە، كوپتەگەن سيفرلىق پلاتفورمالار قولدانۋشىنىڭ جەلىدە مۇمكىندىگىنشە ۇزاق وتىرۋىنا ارنايى بەيىمدەلگەن.
ماسەلەن، الەۋمەتتىك جەلىدەگى جاڭالىقتار تاسپاسىنىڭ شەكسىز جالعاسۋى، بەينەلەردىڭ اۆتوماتتى تۇردە قوسىلۋى جانە تەلەفونعا ۇزدىكسىز كەلەتىن حابارلامالار ادامنىڭ قوسىمشادان شىعۋىن قيىنداتۋى مۇمكىن.
ال جاساندى ينتەللەكت الگوريتمدەرى ءار قولدانۋشىنىڭ قىزىعۋشىلىعىن تالداپ، وعان نازارىن كوبىرەك اۋداراتىن كونتەنت ۇسىنادى. سونىڭ ناتيجەسىندە ادام باستاپقىدا بىرنەشە مينۋتقا عانا كىرگەن قوسىمشادا الدەقايدا ۇزاق ۋاقىت وتكىزىپ قويۋى ىقتيمال.
وسىعان بايلانىستى ساراپشىلار ۇكىمەتتەرگە پلاتفورمالاردىڭ جۇمىس ىستەۋ ءتارتىبىن قايتا قاراۋدى ۇسىنعان. اتاپ ايتقاندا، قولدانۋشىنى جەلىدە ۇزاق ۇستاۋعا باعىتتالعان فۋنكتسيالاردى شەكتەۋ، الگوريتمدەردى تاۋەلسىز تەكسەرۋدەن وتكىزۋ جانە بالالارعا ارنالعان قاۋىپسىزدىك تالاپتارىن كۇشەيتۋ قاجەت دەپ ەسەپتەيدى.
ولاردىڭ پىكىرىنشە، الەۋمەتتىك جەلىلەرگە تەك جاس شەكتەۋىن ەنگىزۋ جەتكىلىكسىز. ويتكەنى بۇل پلاتفورمالاردىڭ ادامداردى قايتا-قايتا كىرۋگە يتەرمەلەيتىن مۇمكىندىكتەرىن وزگەرتپەيدى.
دەگەنمەن ساراپشىلار ينتەرنەتتى شامادان تىس پايدالاناتىن ءار ادامدا پسيحيكالىق اۋرۋ نەمەسە تاۋەلدىلىك بار دەگەن قورىتىندى جاسامايدى. ال الەم حالقىنىڭ 10 پايىزدان استامىنا قاتىستى كورسەتكىش ازىرگە باعالاۋ عانا: زەرتتەۋلەردە پروبلەمالىق پايدالانۋ ءارتۇرلى ادىسپەن انىقتالعان.
بۇل ماسەلەنى زەرتتەگەن مامانداردىڭ اراسىندا دا ءبىرىڭعاي پىكىر جوق. كەيبىر عالىمدار ينتەرنەتتەگى ءارتۇرلى ارەكەتتەردى ءبىر عانا تاۋەلدىلىك تۇرىنە جاتقىزۋ دۇرىس ەمەس ەكەنىن ەسكەرتەدى.
سوعان قاراماستان، حالىقارالىق كوميسسيا سيفرلىق پلاتفورمالار پايدالانۋشىلاردىڭ دەنساۋلىعى مەن قاۋىپسىزدىگىنە كوبىرەك جاۋاپ بەرۋى كەرەك دەپ ەسەپتەيدى. ساراپشىلاردىڭ نەگىزگى ۇسىنىسى - ينتەرنەتتەن باس تارتۋ ەمەس، ونىڭ ادام ومىرىنە زيان كەلتىرمەيتىندەي جاسالۋىن قامتاماسىز ەتۋ.