پاۆەل دۋروۆ قاماۋدان شىققاننان كەيىنگى العاشقى مالىمدەمەسىن جاسادى

استانا. قازاقپارات - Telegram نەگىزىن قالاۋشى پاۆەل دۋروۆ فرانسيادا ۇستالۋىنا قاتىستى العاش رەت تۇسىنىكتەمە بەردى، دەپ حابارلايدى تاسس اقپارات اگەنتتىگى.

دۋروۆ بۇل ءوزى ءۇشىن كۇتپەگەن جاعداي بولعانىن اتاپ ءوتىپ، فرانسۋز بيلىگى ءوز شاعىمدارىن جەكە وزىنە ەمەس، Telegram-عا جولداۋى كەرەك ەدى دەگەن پىكىر ءبىلدىردى.

«ەگەر ءبىر ەلدىڭ ينتەرنەت قىزمەتىنە كوڭىلى تولماسا، قالىپتاسقان تاجىريبە بويىنشا بۇل قىزمەتتىڭ وزىنە قارسى سوتقا شاعىمدانۋى كەرەك ەدى. باس ديرەكتوردى ءوزى باسقاراتىن پلاتفورمادا ءۇشىنشى تۇلعالار جاساعان قىلمىستار ءۇشىن ايىپتاۋعا سمارتفوندار پايدا بولعانعا دەيىن قولدانىلعان زاڭداردى قولدانۋ - قاتە ءتاسىل»، - دەپ جازدى دۋروۆ ءوزىنىڭ Telegram ارناسىندا.

ول، سونداي-اق، ەگەر بۇل قۇرالداردىڭ ىقتيمال تەرىس پايدالانىلۋى ءۇشىن جەكە ادام جاۋاپتى بولۋى مۇمكىن ەكەنىن بىلسە، ەشبىر يننوۆاتور ەشقاشان جاڭا قۇرالداردى جاسامايتىنىن قوسىپ ايتتى.

ونىڭ ايتۋىنشا، قۇپيالىلىق پەن قاۋىپسىزدىك اراسىنداعى دۇرىس تەپە-تەڭدىكتى ساقتاۋ قيىن، ويتكەنى قۇپيالىلىق تۋرالى زاڭداردى ءارتۇرلى ۆەدومستۆو تالاپتارى مەن زاڭدارىمەن ۇيلەستىرۋ قاجەت.

«پلاتفورما رەتىندە ءسىز ءوزىڭىزدىڭ پروتسەستەرىڭىزدىڭ بۇكىل الەم بويىنشا دايەكتى بولۋىن جانە زاڭ ۇستەمدىگى ءالسىز ەلدەردە قياناتقا ۇشىراماۋىن قالايسىز. ءبىز دۇرىس تەڭگەرىمدى تابۋ ءۇشىن باقىلاۋشى ورگاندارمەن ءوزارا ارەكەتتەسۋگە تىرىسامىز»، - دەپ اتاپ ءوتتى كاسىپكەر.

ول، سونداي-اق، كومپانيانىڭ ە و-دا سۇراۋلار جىبەرۋگە بولاتىن رەسمي وكىلى بار ەكەنىن اتاپ ءوتتى.

دۋروۆ فرانسيا بيلىگىنىڭ ءوتىنىشى بويىنشا لاڭكەستىكپەن كۇرەسۋ ءۇشىن Telegram ارقىلى سەنىم تەلەفونىن قۇرۋعا كومەكتەسكەنىن باياندادى.

سونداي-اق، ول مەسسەندجەردى «انارحيستىك جۇماققا» اينالدى دەگەن ايىپتاۋدى جوققا شىعاردى.

ونىڭ ايتۋىنشا، پايدالانۋشىلار سانىنىڭ 950 ميلليونعا دەيىن ءوسۋى قىلمىسكەرلەرگە پلاتفورمانى ءوز ماقساتتارى ءۇشىن پايدالانۋعا مۇمكىندىك بەرەتىن جاڭا سىناقتارعا اكەلدى. بولاشاقتا دۋروۆ Telegram-دى تەرىس پايدالانۋ مۇمكىندىگىنە قاتىستى جاعدايدى جاقسارتۋعا نيەتتى.

فرانسۋز اقپارات قۇرالدارىنىڭ حابارلاۋىنشا، پاۆەل دۋروۆ 24-تامىزدا ءپاريجدىڭ لە بۋرجە اۋەجايىندا بالالارعا قارسى قىلمىسقا، ەسىرتكى ساۋداسىنا جانە الاياقتىققا قاتىسى بار دەگەن ايىپپەن ۇستالعان.

يلون ماسك دۋروۆتىڭ ۇستالۋىن ءسوز بوستاندىعىنا كەپىلدىك بەرەتىن اقش كونستيتۋتسياسىنا ەنگىزىلگەن ءبىرىنشى تۇزەتۋدىڭ «جارناماسى» دەپ اتادى.

ال Telegram كومانداسى پلاتفورماداعى قيانات تۋرالى ايىپتاۋلاردىڭ اقىلعا قونىمسىز ەكەنىن ايتتى.

ەۋروپالىق Politico باسىلىمى فرانسيادا Telegram نەگىزىن قالاۋشى پاۆەل دۋروۆتىڭ اعاسى نيكولاي دۋروۆقا دا ىزدەۋ جاريالانعانىن حابارلادى.

اۆتور
زارينا تۋعانبايەۆا