پاۆەل دۋروۆ فرانسيادا ۇستالدى - ب ا ق

استانا. KAZINFORM - رەسەيدەن شىققان ميللياردەر، Telegram نەگىزىن قالاۋشى پاۆەل دۋروۆ فرانسيادا ۇستالدى. بۇل جايىندا فرانسۋزدىڭ LCI تەلەارناسىنا سىلتەمە جاساپ تاسس حابارلادى.

تەلەارنانىڭ مالىمەتىنشە، ونىڭ جانىندا قۇربىسى جانە وققاعارى بولعان.

پاۆەل دۋروۆ پاريج ماڭىنداعى لە- بۋرجە اۋەجايىندا ۇستالعان. فرانسياعا كاسىپكەر جەكە بيزنەس-دجەتىمەن ازەربايجاننان ۇشىپ كەلگەن دەيدى تەلەارنادان.

بۇعان دەيىن ول فرانسيادا ىزدەۋ جاريالانعان ادامدار تىزىمىندە بولعان.

«قۇقىق قورعاۋ ورگاندارى Telegram-دا مودەراتسيانىڭ جوقتىعى جانە جەرگىلىكتى قىزمەتتەرمەن ىنتىماقتاسۋعا قۇلىقسىزدىق دۋروۆتى ەسىرتكى ساۋداسىنا، بالالارعا قارسى قىلمىستارعا جانە الاياقتىق سحەمالارعا سىبايلاس ەتەدى دەپ سانايدى» دەپ حابارلايدى جەرگىلىكتى TF1 تەلەارناسى.

Vc.ru مالىمەتىنشە، وسى جاڭالىقتان كەيىن ميللياردەرگە تيەسىلى Toncoin كريپتوۆاليۋتاسىنىڭ قۇنى  بەتەر تومەندەپ كەتكەن.

كەيبىر ب ا ق تاعىلعان ايىپتار بويىنشا ول 20 جىلعا دەيىن سوتتالۋى مۇمكىن دەگەن بولجام ايتىپ وتىر.

پاۆەل دۋروۆ - بىرنەشە جىلدان بەرى فرانسيا ازاماتى. دەگەنمەن سوڭعى جىلدارى نەگىزىنەن بىرىككەن اراب امىرلىكتەرىندە تۇرىپ كەلدى.

ەسكە سالا كەتەيىك، وسى جازدا پاۆەل دۋروۆ قازاقستانعا ساپارلاپ كەلگەن بولاتىن.

ونىڭ ايتۋىنشا، 20 ميلليون قازاقستاندىقتىڭ 12,5 ميلليونى اي سايىن Telegram پايدالانادى.

سونداي-اق تاياۋدا پاۆەل دۋروۆتىڭ بۋرابايداعى Iqanat مەكتەبىنىڭ وقۋشىلارىنا ارناپ 356 مىڭ دوللار قارجى بولگەنى بەلگىلى بولدى.

اۆتور
جانات قاپالبايەۆا