ەندىگى ماسەلە - بالىققا سۇرانىس ارتقان سايىن سالادا باسەكە دە كۇشەيدى. اسىرەسە اقسەركە مەن كوكسەركە، تۋنەس، بەكىرە، سكۋمبريا سورەدە جاتپايدى. قىتاي الەمدەگى بالىق ءوندىرىسى كولەمىنىڭ شامامەن 35 پايىزىن قامتاماسىز ەتەدى. جىل سايىن 68 ميلليون توننادان استام بالىق اۋلايدى.
ال ەۋروپادا بالىق شارۋاشىلىعى نورۆەگيادا جاقسى دامىعان. اسىرەسە اقسەركە بالىعىن ءوندىرۋ مەن ەكسپورتتاۋ بويىنشا جەتەكشى ورىنداردىڭ بىرىندە. نورۆەگيا شارۋاشىلىقتارىندا بالىق ءوسىرۋ ءۇشىن زاماناۋي تەحنولوگيالار قولدانىلادى. اۆتوماتتى جۇيەلەر قورەكتەندىرسە، دروندار ولاردىڭ جاعدايىن جانە سۋدىڭ ساپاسىن باقىلايدى. سونىڭ ارقاسىندا 20 سانتيمەترلىك شاباق شامامەن ءبىر جارىم جىلدا 5 كەلىلىك بالىققا اينالادى.
بالىقتىڭ قۇندىلىعى ونىڭ ەتىمەن عانا شەكتەلمەيدى. اسقازانى مەن تورسىلداعىنا سۇرانىس جوعارى. بۇگىندە بالىقتىڭ اسقازانى دا التىنمەن تەڭ باعالانادى.
كريسپين نيامۆەيا، كەنيا بالىق شارۋاشىلىعى ينستيتۋتىنىڭ عىلىمي قىزمەتكەرى:
- بالىقتىڭ تورسىلداعى وڭتۇستىك-شىعىس ازيادا جوعارى باعالانادى. ونى تاعام رەتىندە دە، كوسمەتيكا وندىرىسىندە دە پايدالانادى. اسىرەسە قارتايۋعا قارسى كوسمەتيكا جاساۋعا سۇرانىس بار. سوندىقتان ونىڭ قۇنى دا جوعارى.
بالىقتىڭ پايداسى ونىڭ قۇرامىنداعى پايدالى زاتتارعا بايلانىستى. قىزىل بالىق، سكۋمبريا، ساردينا مەن مايشاباقتا ومەگا-3 ماي قىشقىلى كوپ. ول جۇرەك پەن مي جۇمىسىنا قاجەت. سوندىقتان ماماندار بالىق تاعامدارىن ءجيى تۇتىنۋعا كەڭەس بەرەدى.
ەريك ريمم، نۋتريتسيولوگ
- بالىقتى اپتاسىنا ەكى رەت تۇراقتى تۇتىنۋ جۇرەك ساۋلىعىنا پايدالى. ول اعزاعا قاجەتتى قورەكتىك زاتتاردى بەرەدى جانە جەڭىل قورىتىلادى. اسىرەسە ەتتى كوپ جەيتىن ادامدار ءۇشىن بالىق راتسيوندى ءارتاراپتاندىرۋدىڭ جاقسى جولى. سوندىقتان ونى اس مازىرىنە جيىرەك قوسىپ تۇرعان ابزال.
بالىقتى وسىرە بىلسە، ونىڭ پايداسى دا كول-كوسىر. دۇنيەجۇزىلىك دەنساۋلىق ساقتاۋ ۇيىمى ءبىر ادامعا جىلىنا 20 كەلىدەن كەم ەمەس مولشەردە بالىق ەتىن جەۋگە كەڭەس بەرەدى. «الايدا كليماتتىڭ وزگەرۋى مەن تابيعي اپاتتار بالىق شارۋاشىلىعىنىڭ بولاشاعىنا كەرى اسەر ەتۋى دە مۇمكىن»، - دەيدى ماماندار.
الداعى ەكى جىلدا قازاقستانداعى اكۆاشارۋاشىلىقتاردىڭ ءوندىرىس قۋاتى ەكى جارىم ەسە ارتادى. ال بالىق تۇتىنۋ كولەمى جان باسىنا شاققاندا 7-دەن 9 كەلىگە دەيىن جەتەدى. مۇنى اۋىل شارۋاشىلىعى مينيسترلىگى مالىمدەدى. بۇگىندە اكۆاشارۋاشىلىعىمەن اينالىساتىن 1200-دەن استام كاسىپكەر تىركەلگەن. سولاردىڭ ىشىندە 73 كومپانيا شيكىزاتتى وڭدەيدى. بىلتىر ەلدە وڭدەلگەن ءونىم كولەمى 37 مىڭ تونناعا جەتىپ، الدىڭعى جىلداعى كورسەتكىشتەن $- عا ءوستى. تاۋار ىشكى نارىقپەن قاتار 21 مەملەكەتكە ەكسپورتتالادى.
24.kz