ول «قاراپايىم، ءبىراق نەگىزگى قاعيدانى» ەسكە سالدى: قۇندىلىعى بىردەي ەڭبەككە بىردەي اقى تولەنۋگە ءتيىس.
- اڭگىمە وتباسىن، كاسىپورىنداردى، قوعامداستىقتار مەن ەكونوميكانى قولداپ وتىرعان، الايدا ەڭبەگىنە ءالى دە ءادىل سىياقى الا الماي جۇرگەن ميلليونداعان ايەل تۋرالى بولىپ وتىر، - دەدى ول.
ۋنگبونىڭ ايتۋىنشا، ۇكىمەتتەر، جۇمىس بەرۋشىلەر مەن جۇمىسكەرلەر بىرلەسكەن كۇش-جىگەر ارقىلى قازىرگى ادىلەتسىزدىككە نەگىز بولىپ وتىرعان قۇرىلىمدىق كەدەرگىلەردى جويىپ، ەڭبەكاقىنىڭ تەڭ بولۋىن قامتاماسىز ەتۋگە ىقپال ەتەتىن زاڭناما مەن ينستيتۋتتاردى نىعايتا الادى. الەۋمەتتىك ديالوگ، ونىڭ ىشىندە ۇجىمدىق كەلىسسوزدەر ارقىلى ايەلدەر ەڭبەگىنىڭ تومەن باعالانۋ ماسەلەسىن شەشۋگە، جالاقى جۇيەسىنىڭ اشىقتىعىن ارتتىرۋعا، ادىلەتتىرەك ەڭبەكاقى قۇرىلىمىن قالىپتاستىرۋعا جانە ايەلدەردىڭ ءوز ەكونوميكالىق ومىرىنە قاتىستى شەشىمدەر قابىلداۋعا تەڭ دارەجەدە قاتىسۋىن قامتاماسىز ەتۋگە بولادى.
- ەڭبەك سالاسى تۇبەگەيلى وزگەرىستەردى باستان وتكەرىپ جاتىر، الايدا ءبىزدىڭ قاعيداتتارىمىز وزگەرىسسىز قالادى. بىردەي ەڭبەككە بىردەي اقى تولەۋ - ءاربىر جۇمىسكەردىڭ قۇقىعى، قاعيداتى، قادىر-قاسيەتى مەن الەۋمەتتىك ادىلەتتىلىگىنە قاتىستى ماسەلە، - دەدى جيلبەر ۋنگبو.
گەندەرلىك الشاقتىقتى جويۋ
«ب ۇ ۇ- ايەلدەر» قۇرىلىمىندا قۇندىلىعى بىردەي ەڭبەككە بىردەي اقى تولەۋ قاعيداتى تەك ادىلەتتىلىك ماسەلەسى عانا ەمەس، ەكونوميكالىق دامۋدىڭ ماڭىزدى شارتى ەكەنىن اتاپ ءوتتى. ەڭبەكاقىداعى گەندەرلىك الشاقتىق ايەلدەردىڭ ءومىر بويى تابىسىنىڭ ازايۋىنا، زەينەتاقى جيناقتارىنىڭ تومەندەۋىنە جانە الەۋمەتتىك تەڭسىزدىكتىڭ كۇشەيۋىنە اكەلەدى.
«ب ۇ ۇ- ايەلدەر» قۇرىلىمى ميگرانتتار، مۇگەدەكتىگى بار ايەلدەر، سونداي-اق ناسىلدىك جانە ەتنيكالىق ازشىلىق وكىلدەرى سياقتى نەعۇرلىم وسال توپتاردىڭ جاعدايىنا ەرەكشە نازار اۋداردى. ولار ءۇشىن ەڭبەكاقىداعى ايىرماشىلىق كوبىنە ودان دا جوعارى بولادى.
ۇيىم مالىمدەمەسىندە 2026-جىلى ەڭبەكاقى تەڭدىگى ماسەلەسىن ىلگەرىلەتۋ باعىتىندا بەلگىلى ءبىر ناتيجەلەرگە قول جەتكىزىلگەنى ايتىلعان. ب ۇ ۇ- نىڭ ايەلدەر جاعدايى جونىندەگى كوميسسياسىنىڭ 70-سەسسياسىندا ۇكىمەتتەر، جۇمىس بەرۋشىلەر جانە جۇمىسكەرلەر وكىلدەرى ايەلدەردىڭ ەڭبەك نارىعىنا تولىققاندى قاتىسۋىنا كەدەرگى كەلتىرەتىن قۇرىلىمدىق توسقاۋىلداردى جويۋعا دايىن ەكەندەرىن راستادى.
«ب ۇ ۇ- ايەلدەر» قۇرىلىمى گەندەرلىك الشاقتىقتى جويۋعا بولاتىنىن، الايدا بۇل ءۇشىن ءاربىر ايەلدىڭ ەڭبەگىن ءادىل باعالاۋدى قامتاماسىز ەتەتىن باتىل شارالار قاجەت ەكەنىن اتاپ ءوتتى.
بۇدان بۇرىن WTA ايەل تەننيسشىلەر ءۇشىن مىندەتتى گەندەرلىك تەست ەنگىزگەنىن جازعانبىز.