الايدا ۇلى بريتانيا كورولى III چارلز، جاپونيا يمپەراتورى نارۋحيتو مەن يمپەراتريتسا ماساكوعا شەتەلگە ساپارلاۋ ءۇشىن پاسپورت قاجەت ەمەس. ءبىر قىزىعى، ۇشەۋىنىڭ پاسپورتسىز ءجۇرۋىنىڭ سەبەبى بىردەي ەمەس.
III چارلز وزىنە ءوزى پاسپورت بەرە المايدى
ۇلى بريتانيا كورولدىك وتباسىنىڭ رەسمي سايتىندا شەتەلگە شىققاندا كورولگە بريتان پاسپورتى قاجەت ەمەس ەكەنى جازىلعان. ونىڭ سەبەبى بريتان پاسپورتىنىڭ وزىندە جاتىر. ەل ازاماتتارىنا پاسپورت مونارحتىڭ اتىنان بەرىلەدى. قۇجاتتا كورولدىڭ اتىنان پاسپورت يەسىن بوگەتسىز وتكىزۋ، قاجەت كەزدە وعان كومەك پەن قورعاۋ كورسەتۋ سۇرالادى.
دەمەك، III چارلزدىڭ ءوز اتىمەن وزىنە پاسپورت راسىمدەۋىنىڭ قاجەتى جوق. بۇل ارتىقشىلىق كورول اۋلەتىنىڭ باسقا مۇشەلەرىنە بەرىلمەيدى. ولار شەتەلگە پاسپورتپەن شىعادى.
III چارلز مۇنداي مارتەبەگە 2022-جىلى اناسى II ەليزاۆەتا قايتىس بولىپ، تاققا وتىرعاننان كەيىن يە بولدى. وعان دەيىن پاسپورتسىز ساپارلاۋ قۇقىعى II ەليزاۆەتادا بولعان.
جاپونيا يمپەراتورى مەن يمپەراتريتساسىندا دا پاسپورت جوق
جاپونيا يمپەراتورى نارۋحيتو مەن ونىڭ جۇبايى ماساكو دا شەتەلگە ادەتتەگى پاسپورتپەن شىقپايدى. Asienspiegel باسىلىمىنىڭ جازۋىنشا، بۇل ءتارتىپتىڭ تاريحى 1971-جىلدان باستالادى. سول كەزدە جاپونيا بيلىگى يمپەراتور مەن يمپەراتريتساعا قاراپايىم ازاماتتار سياقتى پاسپورت بەرۋدى ولاردىڭ مارتەبەسىنە ساي ەمەس دەپ تاپقان.
سوندىقتان ولاردىڭ شەتەل ساپارى بولەك تارتىپپەن راسىمدەلەدى. جاپونيانىڭ سىرتقى ىستەر مينيسترلىگى باراتىن ەلگە ساپار تۋرالى الدىن الا حابارلاپ، قاجەتتى قۇجاتتاردى ديپلوماتيالىق جولمەن رەتتەيدى. بۇل جەڭىلدىك يمپەراتور اۋلەتىنىڭ وزگە مۇشەلەرىنە جۇرمەيدى. ولار شەتەلگە ءتيىستى پاسپورتپەن شىعادى.
نارۋحيتو 2019-جىلعى 1-مامىردا اكەسى اكيحيتو تاقتان كەتكەننەن كەيىن جاپونيا يمپەراتورى بولدى. ال يمپەراتريتسا ماساكو كورول اۋلەتىنە كەلمەي تۇرىپ ديپلومات بولعان. ول گارۆارد ۋنيۆەرسيتەتىندە ءبىلىم الىپ، كەيىن جاپونيانىڭ سىرتقى ىستەر مينيسترلىگىندە قىزمەت ەتكەن.
ءبىراق ريم پاپاسى پاسپورت قولدانادى
مەملەكەت باسشىسى بولۋ پاسپورتتان اۆتوماتتى تۇردە بوساتادى دەگەن ءسوز ەمەس. مىسالى، ۆاتيكان باسشىسى ريم پاپاسى حالىقارالىق ساپارلاردا ءتيىستى جول ءجۇرۋ قۇجاتتارىن پايدالانادى.
ياعني ماسەلە ادامنىڭ قانشالىق جوعارى لاۋازىم يەسى ەكەنىندە ەمەس. III چارلزدىڭ جاعدايىندا بۇل – ۇلى بريتانياداعى پاسپورت بەرۋ تارتىبىنەن تۋىندايتىن ەرەكشەلىك. ال جاپونيادا يمپەراتور مەن يمپەراتريتسانىڭ ساپارى ولاردىڭ مەملەكەتتىك مارتەبەسىنە بايلانىستى بولەك راسىمدەلەدى.
سوندىقتان پرەزيدەنتتەر، پرەمەر-مينيسترلەر مەن كورول اۋلەتىنىڭ وزگە وكىلدەرى پاسپورتپەن ساپارلاسا، III چارلز، نارۋحيتو مەن ماساكوعا مۇنداي قۇجات قاجەت ەمەس.
el.kz