الەمگە 2027-جىلى اسەر ەتەتىن باستى وقيعالار اتالدى

استانا. قازاقپارات – ۇلى بريتانيانىڭ The Economist باسىلىمى ءداستۇرلى «The World Ahead» ارنايى شىعارىلىمىندا 2027-جىلى الەمگە ىقپال ەتۋى مۇمكىن نەگىزگى ۇردىستەردى اتادى.

Фото: ЖИ арқылы жасалған

باسىلىم رەداكتورى توم ستەنديدج الداعى جىلدى عىلىمي-فانتاستيكالىق فيلمگە تەڭەگەن، - دەپ حابارلايدى Massaget.kz.

عارىشقا كومپيۋتەر ورنالاستىرعىسى كەلەتىن زىمىران ميللياردەرى الەمدەگى العاشقى تريلليونەر اتاندى. دروندار سوعىستىڭ سيپاتىن وزگەرتتى. تاكسيلەر جۇرگىزۋشىسىز ءجۇرىپ جاتىر. جاساندى ينتەللەكت مودەلدەرى باقىلاۋدان شىعىپ بارادى. گۋمانويد روبوتتار ساحناعا شىقتى. ادامدارعا سالماق تاستاۋعا جانە دەنساۋلىعىن جاقسارتۋعا كومەكتەسەتىن ەكپەلەر پايدا بولدى. وسىنىڭ بارىندە جەتىسپەيتىنى - وزگە عالامشارلىقتار عانا. ءبىراق ولاردىڭ 2027-جىلى پايدا بولا قويۋى ەكىتالاي، - دەپ جازادى اۆتور.

جوعارىدا اتاپ وتكەندەي، جۇرگىزۋشىسىز كولىكتەر، گۋمانويد روبوتتار، عارىش جوبالارى مەن جاساندى ينتەللەكتىنىڭ دامۋى كۇندەلىكتى ءومىردىڭ ءبىر بولىگىنە اينالىپ كەلەدى. باسىلىم بولجامىنداعى كوپشىلىككە ماڭىزدى باعىتتاردى ىقشامداپ ۇسىنامىز.

قارىز الۋ قيىندايدى

مەملەكەتتىك شىعىنداردىڭ كوبەيۋى، جاساندى ينتەللەكت ينفراقۇرىلىمىنا سالىنعان ينۆەستيتسيالار جانە ەنەرگيا باعاسىنىڭ ءوسۋى ينفلياتسيالىق قىسىمدى كۇشەيتۋى مۇمكىن. سونىڭ سالدارىنان پايىزدىق مولشەرلەمەلەر جوعارى دەڭگەيدە ساقتالىپ، كومپانيالار مەن ازاماتتارعا قارىز الۋ قيىنداي تۇسەدى.

جاساندى ينتەللەكتىگە قارسىلىق كۇشەيەدى

ج ي كومپانيالارىنىڭ قارىزى مەن كيبەرشابۋىل قاۋپىنىڭ ءوسۋى قوعامداعى الاڭداۋشىلىقتى ارتتىرادى. جۇمىس ورىندارىنىڭ قىسقارۋى، دەرەكتەر ورتالىقتارىنىڭ ەنەرگيا مەن سۋدى كوپ تۇتىنۋى دا قىزۋ تالقىلانباق.

الايدا باسىلىم بۇل قاۋىپتەردىڭ ءبىر بولىگى ازىرگە ناقتى دەرەكتەردەن گورى بولجامعا كوبىرەك نەگىزدەلگەنىن اتاپ وتەدى.

تاياۋ شىعىستاعى تۇراقسىزدىق ساقتالادى

يران توڭىرەگىندەگى قاقتىعىستىڭ سالدارى 2027-جىلى دا سەزىلۋى مۇمكىن. گەوساياسي شيەلەنىس ەنەرگيا تاسىمالىنا اسەر ەتىپ، تىڭايتقىش تاپشىلىعى ارقىلى جاھاندىق ازىق-تۇلىك قاۋىپسىزدىگىنە قاتەر ءتوندىرۋى ىقتيمال.

ا ق ش- تا ساياسي باسەكە قىزادى

ارالىق سايلاۋدان كەيىن دونالد ترامپتىڭ ساياسي مۇراگەرى بولۋعا ۇمتىلاتىن تۇلعالار اراسىنداعى تارتىس كۇشەيەدى. سوعان قاراماستان ترامپ بيلىكتەگى ىقپالىن ساقتاپ، جاڭا جارلىقتار مەن قاتاڭ ساياسي قادامدارعا بارۋى مۇمكىن.

تايۆان ماسەلەسى باستى نازاردا بولادى

The Economist قىتاي مەن تايۆان اراسىنداعى شيەلەنىس 2027-جىلدىڭ باستى گەوساياسي تاۋەكەلدەرىنىڭ ءبىرى بولىپ قالاتىنىن بولجايدى. قىتاي ارمياسىنىڭ اسكەري دايىندىعىن كۇشەيتۋى وڭىردەگى الاڭداۋشىلىقتى ارتتىرا تۇسپەك.

عارىشقا ۇشۋ ارزاندايدى

SpaceX كومپانياسىنىڭ Starship زىمىرانى جەرسەرىكتەردى تۇراقتى تۇردە عارىشقا شىعارا باستاسا، ۇشۋ قۇنى تومەندەۋى مۇمكىن. بۇل جەكە عارىش ستانتسيالارىن دامىتۋعا جانە وربيتادا دەرەكتەر ورتالىقتارىن ورنالاستىرۋعا جول اشادى.

اۋا رايى بۇرىنعىدان دا ىستىق بولۋى مۇمكىن

2027-جىل تاريحتاعى ەڭ ىستىق جىلداردىڭ بىرىنە اينالۋى ىقتيمال. اپتاپ ىستىق، قۇرعاقشىلىق، ورمان ورتتەرى جانە باسقا دا تابيعي قۇبىلىستار جيىلەۋى مۇمكىن.

باسىلىم «سۋپەر ەل-نينو» قۇبىلىسىنا نازار اۋدارعان. بۇل - مۇحيت سۋىنىڭ قاتتى جىلىنۋى سالدارىنان الەمنىڭ ءتۇرلى ايماقتارىندا ىستىق پەن قۋاڭشىلىقتى كۇشەيتەتىن كليماتتىق قۇبىلىس.

«وزەمپيك ەففەكتىسى»

ارىقتاۋعا ارنالعان دارىلەر سالماق تاستاۋعا كومەكتەسىپ قانا قويماي، تۇتىنۋشىلاردىڭ ادەت-سالتىن دا وزگەرتىپ جاتىر. ارىقتاپ، جاڭا ءومىر باستاعانداي كۇي كەشكەن ادامدار كيىم مەن كوسمەتيكاعا، فيتنەسكە اقشانى كوپتەپ جۇمسايدى. ەندى فارماتسيەۆتيكا كومپانيالارى ادام ءومىرىن ۇزارتاتىن تەراپيالارعا قىزىعۋشىلىق تانىتا باستايدى.

گولليۆۋد تانىمال فرانشيزالارعا قايتا ورالادى

2027-جىلى «جۇلدىزدى سوعىستار»، «كەك الۋشىلار» جانە دجەيمس بوند سەكىلدى تانىمال كينوفرانشيزالاردىڭ قايتا جاندانۋى كۇتىلەدى. بۇل گولليۆۋدتىڭ كورەرمەندى كينوتەاترعا قايتارۋ ءۇشىن بۇرىننان بەلگىلى جوبالارعا سۇيەنەتىنىن كورسەتەدى.

The Economist بولجامىنا سۇيەنسەك، 2027-جىلى ەكونوميكا، ساياسات، تەحنولوگيا جانە كليمات سالالارىندا ەلەۋلى وزگەرىستەر بولۋى مۇمكىن. كەشە عانا فانتاستيكا بولىپ كورىنگەن قۇبىلىستار بىرتىندەپ كۇندەلىكتى ءومىر شىندىعىنا اينالىپ كەلەدى.