Xinhua اگەنتتىگىنىڭ مالىمەتىنشە، 28-قازاندا پاكىستان اۋماعىنان اتىلعان سناريادتار اۋعانستاننىڭ شىعىسىنداعى نانگارحار پروۆينتسياسىنا تۇسكەن. سالدارىنان ەكى ادام قازا تاۋىپ، تاعى ەكەۋى جارالاندى.
وقيعا «تورحام» شەكارالىق وتكىزۋ بەكەتى ماڭىندا بولعان.
اۋعانستان قورعانىس مينيسترلىگى دە پاكىستاننىڭ ءتورت ۇشقىشسىز ۇشۋ اپپاراتى پاكتيكا پروۆينتسياسىنداعى اسكەري نىساندارعا سوققى جاساعانىن حابارلادى. بۇعان جاۋاپ رەتىندە اۋعان اسكەري قىزمەتشىلەرى پاكىستان اۋماعىنا وق اتقان.
ال پاكىستان شەكارا قىزمەتىنىڭ مالىمەتىنشە، ەلدىڭ سولتۇستىك- باتىسىنداعى تومەنگى وڭتۇستىك ۆازيريستان اۋدانىندا اۋعانستان تاراپىنان جاسالعان مينومەت شابۋىلى سالدارىنان ءبىر ادام قازا تاۋىپ، تاعى بەس ادام جارالانعان.
جاڭا قاقتىعىستار كورشىلەس ەكى ەل اراسىنداعى شيەلەنىس ساقتالىپ وتىرعان تۇستا بولدى.
17 -قازاندا دا اۋعانستان مەن پاكىستان شەكاراسىندا قارۋلى قاقتىعىس بولعان. يسلامابادتىڭ مالىمدەۋىنشە، پاكىستان اسكەرى اۋعان كۇشتەرىنىڭ شابۋىلىنا جاۋاپ رەتىندە اۋىر قارۋ قولدانعان.
18 -قازاندا دوحادا وتكەن كەلىسسوزدەر بارىسىندا اۋعانستان مەن پاكىستان وكىلدەرى شەكارادا اتىستى دەرەۋ توقتاتۋعا كەلىسكەن ەدى. كەلىسسوزدەر قاتار مەن تۇركيانىڭ اراعايىندىعىمەن ءوتتى. تاراپتار ەكى ەل اراسىنداعى بەيبىتشىلىك پەن تۇراقتىلىقتى نىعايتۋ تەتىكتەرىن قۇرۋ جونىندە دە ۋاعدالاستى.
ايتا كەتەيىك، قىركۇيەك ايىنىڭ سوڭىندا اۋعانستان پاكىستاننان كەلگەن 28 سودىردىڭ كوزىن قۇرتقانىن مالىمدەگەن ەدى.